¹ Anhu aidhikana kuti remekedza kudhai, seAsenzi aKirisitu uye abhati ezviro zvakakura zvaMwari. ² Nemaonere aya, imwimwi abhati, munodhikana kutonyasa kudzibhata kuti muwe nekodzero rekuremekedzwa. ³ Asi kwandiri azvina bhasa kuti nditongwe nemwi kana munutongwa mupi anhu. Nokuti, kana ndega inini andidzitongi. ⁴ Inini andiripi kuwedzurira kumwe kupomwerwa mhoswa kwandakaizwa; asi azvibui kuti andina mhswa. Ndi Ishe anonditonga. ⁵ Saka, musatongwe kana tchipi hatcho kunze kwe nguwa, asati auya Ishe. Yena utchaunzisa patchiedza zviro zvakaigika padhima, uye atchapangidzira zvinangwa zve mwoyo. Hino, kadha munhu utchatambira rumbidzo rinobva kuna Mwari. ⁶ Zvino, hama, inini ndakakanda mutemo uyu kwandiri inini uye kuna Aporo nge ndaya yenyu, kuitira kuti mufunde nesu: " Musaende mberi kupinda zvakatarwa"; kudharo akuna anozvi kudza nge uyu uye etchi shora umweni. ⁷ Nokuti, ndiani anoona umwe musiano kwamuri ne amweni? Zvi zvamunazvo zvamusina kutambira nyore?, Kana makatambira nyore, ngei munodzikudza sekunge amuzi kutambira? ⁸ Imwimwi manazvo zvese zvamaidha! Matozoita apfumi! Matanga kutonga tisiripop isusui! Patchokwadhi, inini ndaitodha kuti mutongwe, zvadharo taidha kutonga tese. ⁹ Nokuti ndinofunga kuti Mwari watikanda isusu, maphositori, pekupedzesra, uye seanhu akapanitshwa rufu. Isusu tinosoizwa se mutambo panyika, kune ngirozi uye kune anhu. ¹⁰ Isusu tiri mapenzi ngondaya yaKirisitu, asi imwimwi muri awatchenjeri muna Kirisitu. Isusu tiri akaremba, asi imwimwi anhu akasimba. Imwimwi munoremekedzwa, asi isusu tino shorwa. ¹¹ Kudzamara ne nguwa ino, tiri anhu enzara uye nomukawha, atina kupfeka zvakanaka, tinopondwa sembava, uye atina nyumba. ¹² Tinosenza zvikuru, nonyara dzedhu. Tika shorwa, isusu tinokomborera,. Tika terwa, Isusu tino shingirira. ¹³ Tika nyeperwa zviro zvatisikazi kuita. Isusu tino buya zvakanaka. Isusu tazoita, uye tichirikuoniwa se tswina uye unuwhui we nyika yese. ¹⁴ Inini andiripi kutara izvi kudha kukutswerudzai, Asi kudha kukupangai se ana angu andinodha. ¹⁵ Nokuti, kunyangwe muno gumiremazana reanhu anokufundisai muna Kirisitu, amuna mabhabha akawanda. Nokuti, inini ndakadzita bhabha enyu muna Djeso Kirisitu kubhudhikidza neVangeri. ¹⁶ Zvakadharo, ndinoramba ndetchi iwai atedzeri angu. ¹⁷ Ngondaya yazvo, ndinokutumirai Timoti, mwana wangu wandinodha uye wakatendeka muna Ishe. Yena atchaku edzurirai makwanza angu muna Kirisitu, semafundisire andinoita kumbuto dzese uye kuma kereke ese. ¹⁸ Amwe enyu aita anhu anomusikazwa, etchiita sekunge anditcha uyi kuzomu shanyirai. ¹⁹ Asi kwedhedze pano ndirikuya kwamuri, kana Ishe akadha. Penepo nditchazoona kwete kuzwa zvanobuya asi nitcha ona simba rawo aya anomusikazwa. ²⁰ Nokuti umambo Mwari ausi wemasoko, asi simba. ²¹ Munodha tchii? Ndiuye kwamuri nemushapu kana nerudho uye mweya wokunaka?