¹ Akawaambia, "Amin nawaambia, wako baadhi yenu wasimamao hapa ambao hawataonja mauti kabla ya kuuona ufalme wa Mungu ukija kwa nguvu." ² Na baada ya siku sita, Yesu aliwachukua Petro, Yakobo na Yohana pamoja naye juu ya mlima, peke yao. Kisha akageuka sura mbele yao. ³ Mavazi yake yakang'aa sana, meupe sana, meupe zaidi kuliko mng'arishaji yoyote duniani angeweza kuyafanya kuwa meupe. ⁴ Kisha Eliya pamoja na Musa walitokea mbele yao, na walikuwa wakiongea na Yesu. ⁵ Petro alijibu akamwambia Yesu, "Mwalimu, ni vyema sisi kuwa hapa, na tujenge vibanda vitatu, kimoja kwa ajili yako, kimoja kwa ajili Musa na kingine kwa ajili ya Eliya." ⁶ (Kwa maana hakujua la kusema maana waliogopa sana.) ⁷ Wingu likaja na kuwafunika. Kisha sauti ikatoka katika lile winguni, " Huyu ni mwanangu mpendwa. Msikieni yeye." ⁸ Ghafla, walipotazama huku na huko, hawakumuona tena mtu yeyote pamoja nao, isipokuwa Yesu tu. ⁹ Walipokuwa wanateremka kutoka mlimani, akawaamuru wasimwambia mtu yeyote yale yote waliyoyaona, mpaka Mwana wa Adamu atakapofufuka kutoka kwa wafu. ¹⁰ Kwa hiyo wakaweka jambo hilo ndani yao wenyewe, lakini walijadiliana wao kwa wao ni nini maana yake "kufufuka kutoka kwa wafu" ¹¹ Walimwuliza Yesu,"Kwa nini waandishi husema lazima Eliya aje kwanza?" ¹² Akawaambia, "Eliya anakuja kwanza kurejesha mambo yote. Kwa nini basi imeandikwa kwamba imempasa Mwana wa Adamu kupata mateso mengi na kudharauliwa? ¹³ Lakini nawaambia ya kwamba Eliya amekuja, na wakamfanyia walivyotaka, kama ilivyoandikwa juu yake. ¹⁴ Na walipofika kwa wanafunzi, waliona kundi kubwa limewazunguka na waandishi walikuwa wanabishana nao. ¹⁵ Na mara walipomwona Yesu, kundi lote lilishangaa na kumkimbilia kumsalimia. ¹⁶ Aliwauliza wanafunzi wake, "Mnabishana nao juu ya nini?" ¹⁷ Mtu mmoja katika kundi alimjibu, "Mwalimu, nilimleta mwanangu kwako; ana roho inayomfanya asiweze kuongea, ¹⁸ humkamata na kumwangusha chini, naye anatoa povu mdomoni na kusaga meno na kuwa mgumu. Niliwaomba wanafunzi wako wamtoe huyo pepo, lakini hawakuweza. ¹⁹ Akawajibu, "Kizazi kisichoamini, nitakaa nanyi hadi lini? Nitawavumilia mpaka lini? Mleteni kwangu." ²⁰ Wakamleta yule mvulana kwake. Roho mchafu alipomwona Yesu, ghafla ilimtia katika kutetemeka. Mvulana alianguka chini na kutoa povu mdomoni. ²¹ Yesu alimwuliza baba yake, "Amekuwa katika hali hii kwa muda gani?" Baba alisema, " Tangu utoto. ²² Mara nyingine humwangusha katika moto au kwenye maji, na kujaribu kumwangamiza. Kama unaweza kufanya chochote tuhurumie na utusaidie." ²³ Yesu akamwambia, "'Kama unaweza'? Kila kitu kinawezekana kwa yeyote aaminiye." ²⁴ Ghafla baba wa mtoto alilia na kusema, " Naamini! Nisaidie kutokuamini kwangu." ²⁵ Wakati Yesu alipoona kundi linawakimbilia, alimkemea roho mchafu na kusema, "wewe pepo bubu na kiziwi, nakuamuru toka kwake, usimwiiingie tena." ²⁶ Ikalia na kumhangaisha mvulana kwa nguvu na kisha ikamtoka. Mvulana alionekana kama amekufa, Ndipo wengi wakasema, "Amekufa," ²⁷ Lakini Yesu alimchukua kwa mkono akamwinua, na mvukana akasimama. ²⁸ Wakati Yesu alipoingia ndani ya nyumba, wanafunzi wake walimwuliza kwa faragha, "Kwa nini hatukuweza kuitoa?" ²⁹ Akawaambia, " Aina hii hatoki isipokuwa kwa maombi." ³⁰ Wakatoka pale na kupitia Galilaya. Hakutaka mtu yeyote ajue walipo, ³¹ kwa kuwa alikuwa anafundisha wanafunzi wake. Akawaambia, "Mwana wa Adamu atapeanwa mikononi mwa watu, na watamuua. Atakapokuwa amekufa, baada ya siku tatu atafufuka tena." ³² Lakini hawakuelewa maelezo haya, na waliogopa kumwuliza. ³³ Ndipo walifika Karperinaumu. Baada ya kuingia ndani ya nyumba akawauliza, ''Mlikuwa mnajadili nini njiani"? ³⁴ Lakini walikuwa kimya. Kwani walikuwa wanabishana njiani kwamba nani alikuwa mkubwa zaidi. ³⁵ Alipoketi chini akawaita kumi na wawili pamoja, na akawambia, "Kama yeyote anataka kuwa wa kwanza, ni lazima awe wa mwisho na mtumishi wa wote." ³⁶ Akamchukua mtoto mdogo akamweka katikati yao. Akamchukua katika mikono yake na akawambia, ³⁷ "Yeyote ampokeaye mtoto kama huyu kwa jina langu, pia amenipokea mimi, na ikiwa mtu amenipokea, hanipokei mimi tu, lakini pia aliyenituma." ³⁸ Yohana akamwambia, "Mwalimu, tulimwona mtu anatoa pepo kwa jina lako na tukamzuia, kwa sababu hatufuati." ³⁹ Lakini Yesu akasema, "Msimzuie, kwa kuwa hakuna atakayefanya kazi kubwa kwa jina langu na kisha baadaye aseme neno baya lolote juu yangu. ⁴⁰ Yeyote asiyekuwa kinyume nasi yuko upande wetu. ⁴¹ Yeyote atakayekupa kikombe cha maji ya kunywa kwa sababu wewe niwa Kristo, Amin nawaambia, hatapoteza thawabu yake. ⁴² Yeyote anayewakosesha mmojawapo wa wadogo hawa waniaminio mimi, ingekuwa vyema kwake kufungiwa jiwe la kusagia shingoni na kutupwa baharini. ⁴³ Kama mkono wako ukikukosesha ukate. Ni heri kuingia katika uzima bila mkono kuliko kuingia kwenye kuzimu ukiwa na mikono yote, katika moto usiozimika. ⁴⁴ (Zingatia: Mstari hii, "Mahali ambapo funza hawafi na moto usiozimika." haumo katika nakala za kale). ⁴⁵ Kama mguu wako ukikukosesha, ukate. Ni vyema kwako kuingia uzimani ukiwa kilema, kuliko kutupwa kuzimu na miguu miwili. ⁴⁶ (Zingatia: Mstari huu, "Mahali ambapo funza hawafi na moto usioweza kuzimika" haumo kwenye nakala za kale). ⁴⁷ Kama jicho lako likikukosesha ling'oe. Ni vyema kwako kuingia katika Ufalme wa Mungu ukiwa na jicho moja, kuliko kuwa na macho mawili na kutupwa kuzimu. ⁴⁸ Mahali ambapo funza wao hawafi, na moto usiozimika. ⁴⁹ Kwa maana kila mtu atatiwa chumvi kwa moto. ⁵⁰ Chumvi ni nzuri, lakini kama chumvi ikipoteza ladha yake, unawezaje kuifanya iwe chumvi tena? Muwe na chumvi ninyi kwa ninyi na muwe na amani mmoja na mwingine."