¹ Amin, Amini nawaambieni, yule asiyeingia kwa kupitia mlango wa zizi la kondoo, lakini anapanda kwa njia nyingine, mtu huyo ni mwizi na mnyang'anyi. ² Yeye aingiaye mlangoni ndiye mchungaji wa kondoo. ³ Kwake mlinzi wa mlango humfungulia. Kondoo waisikia sauti yake na huwaita kondoo zake kwa majina yao na kuwaongoza nje. ⁴ Anapowatoa nje hao walio wake, huwatangulia, na kondoo humfuata, kwa sababu wanaijua sauti yake. ⁵ Hawatamfuata mgeni lakini badala yake watamuepuka, kwa sababu hawaijui sauti ya wageni." ⁶ Yesu alisema mfano huu kwao, lakini hawakuyaelewa mambo haya ambayo alikuwa akisema kwao. ⁷ Yesu akasema nao tena, "Amini, amini, nawaambia, Mimi ni mlango wa kondoo. ⁸ Wote walionitangulia ni wezi na wanyang'anyi, lakini kondoo hawakuwasikiliza. ⁹ Mimi ni mlango. Yeyote aingiaye kupitia kwangu, ataokolewa; ataingia ndani na kutoka, naye atayapata malisho. ¹⁰ Mwizi haji isipokuwa kuiba, kuua, na kuangamiza. Nimekuja ili kwamba wapate uzima na wawe nao tele. ¹¹ Mimi ndimi mchungaji mwema. Mchungaji mwema huutoa uhai wake kwa ajili ya kondoo. ¹² Mtumishi aliyeajiriwa siyo mchungaji na kondoo si mali yake, akiwaona mbwa mwitu wakija, huwaacha na kuwakimbia kondoo na mbwa mwitu huwakamata na kuwatawanya. ¹³ Hukimbia kwa sababu ni mtumishi wa kuajiriwa na hawajali kondoo ¹⁴ Mimi ndimi mchungaji mwema, na ninawajua kondoo walio wangu, nao kondoo walio wangu wananijua mimi. ¹⁵ Baba ananijua, nami namjua Baba, nami nautoa uhai wangu kwa ajili ya kondoo. ¹⁶ Ninao kondoo wengine ambao si wa zizi hili. Hao pia, yanipasa kuwaleta, nao wataisikia sauti yangu ili kwamba pawepo na kundi moja na mchungaji mmoja. ¹⁷ Hii ndiyo sababu Baba ananipenda: Niutoe uhai wangu halafu niutwae tena. ¹⁸ Hakuna auchukuaye kutoka kwangu, lakini mimi nautoa mwenyewe. Ninayo mamlaka ya kuutoa, na ninayo mamlaka ya kuutwaa pia. Nimelipokea agizo hili kutoka kwa Baba." ¹⁹ Mgawanyiko tena ukatokea kati ya wayahudi kwa sababu ya maneno haya. ²⁰ Wengi wao wakasema, "Ana pepo na ni kichaa. Kwa nini mnamsikiliza?" ²¹ Wengine wakasema, "Haya siyo maneno ya mtu aliyepagawa na mapepo. Pepo linaweza kufungua macho ya kipofu?" ²² Ndipo ikaja Sikukuu ya Kuwekwa Wakfu kule Yerusalemu, nakulikuwa wakati wa baridi. ²³ Yesu alikuwa akitembea hekaluni katika ukumbi wa Selemani. ²⁴ Ndipo Wayahudi walipomzunguka na kumwambia, "Mpaka lini utatuweka katika mashaka? kama wewe ni Kristo, tuambie wazi. ²⁵ Yesu akawajibu, "Nimekwisha waambia lakini hamuamini. Kazi nizifanyazo kwa jina la Baba yangu, hizo zinashuhudia juu yangu. ²⁶ Hata hivyo hamuamini kwa sababu ninyi si kondoo wangu. ²⁷ Kondoo wangu waisikia sauti yangu; Nawajua, nao wanifuata mimi. ²⁸ Ninawapa uzima wa milele; hawataangamia kamwe, na hakuna hata mmoja atakayewanyakuwa kutoka mkononi mwangu. ²⁹ Baba yangu, aliyenipa hao, ni mkuu kuliko wengine wote, na hakuna hata mmoja awezaye kuwanyakua kutoka mkononi mwa Baba. ³⁰ Mimi na Baba tu mmoja." ³¹ Hapo Wayahudi wakachukua mawe ili wampige tena. ³² Yesu akawajibu, "Nimeshawaonesha kazi nyingi nzuri kutoka kwa Baba. Kwa kazi zipi kati ya hizo mnataka kunipiga mawe?" ³³ Wayahudi wakamjibu, "Hatukupigi mawe kwa kazi yoyote iliyo nzuri, lakini kwa kukufuru, kwa sababu wewe, uliye mtu, unajifanya kuwa Mungu." ³⁴ Yesu akawajibu, "Haikuandikwa katika sheria yenu, 'Nilisema, "Ninyi ni miungu"'?" ³⁵ Ikiwa aliwaita miungu, kwa wale ambao Neno la Mungu liliwajilia (na Maandiko hayawezi kuvunjwa), ³⁶ mnasema juu ya yule ambaye Baba alimtoa na kumtuma katika ulimwengu, 'Unakufuru,' kwa sababu nilisema, 'mimi ni Mwana wa Mungu'? ³⁷ "Ikiwa sifanyi kazi za Baba yangu, msiniamini. ³⁸ Hata hivyo, ikiwa ninazifanya, hata kama hamniamini, ziaminini kazi ili kwamba muweze kujua na kufahamu kwamba Baba yuko ndani yangu na mimi niko ndani ya Baba." ³⁹ Wakajaribu tena kumkamata, lakini Yesu alienda zake kutoka mikononi mwao. ⁴⁰ Yesu akaenda zake tena ng'ambo ya Yordani sehemu ambayo Yohana alikuwa akibatiza kwanza, na akakaa huko. ⁴¹ Watu wengi wakaja kwa Yesu huku wakisema, "Yohana kweli hakufanya ishara yoyote, lakini mambo yote aliyoyasema Yohana juu ya huyu mtu ni ya kweli." ⁴² Watu wengi wakamwamini Yesu hapo.