¹ Ninakuagiza mbele za Mungu na Kristo Yesu, atakaye wahukumu walio hai na wafu, na kwa sababu ya kufunuliwa kwake na Ufalme wake: ² Lihubiri Neno, Uwe tayari, wakati ufaao na usiofaa. Waambie watu dhambi zao, kemea, kuonya kwa uvumilivu wote na mafundisho. ³ Kwa maana wakati utakuja ambao watu watakapoyakataa mafundisho ya kweli, badala yake, watajitafutia walimu wa kufundisha kulingana na tamaa zao. ⁴ Wataacha kusikiliza mafundisho ya kweli, na kugeukia hadithi za uongo. ⁵ Lakini wewe uwe mwaminifu katika mambo yote, vumilia magumu, fanya kazi ya mhubiri wa Injili; timiza huduma yako. ⁶ Kwa maana mimi tayari nimekwisha kumiminwa, Muda wa kufariki kwangu umewadia. ⁷ Nimeshindana katika haki, Mwendo nimeumaliza, Imani nimeilinda. ⁸ Taji ya haki imewekwa kwa ajili yangu, ambayo Bwana, anayehukumu kwa haki, atanipa siku ile, na siyo kwangu tu bali pia kwa wote wanaongojea kwa shauku kuonekana kwake. ⁹ Jitahidi kuja kwagu haraka. ¹⁰ Kwa kuwa Dema ameniacha Ameupenda ulimwengu wa sasa na amekwenda Thesalonike, Kreseni amekwenda Galatia, na Tito amekwenda Dalmatia. ¹¹ Luka tu ndiye yuko pamoja nami. Umchukue Marko, uje naye, kwani yeye ni muhimu kwangu katika huduma. ¹² Nimemtuma Tikiko Efeso. ¹³ Lile joho ambalo nililiacha Troa kwa Karpo, utakapokuja lilete, pamoja na vile vitabu hasa vile vya ngozi. ¹⁴ Iskanda, mfua chuma alinitendea maovu mengi. Bwana atamlipa kulingana na matendo yake. ¹⁵ Nawe pia jihadhari naye, kwani aliyapinga sana maneno yetu. ¹⁶ Katika utetezi wangu wa kwanza, hakuna mtu yeyote aliyesimama pamoja nami, badala yake, kila mmoja aliniacha. Mungu asiwahesabie hatia. ¹⁷ Lakini Bwana alisimama pamoja nami, akanitia nguvu ili kwamba kupitia kwangu, neno linenwe kwa ukamilifu na mataifa wapate kusikia. Niliokolewa katika kinywa cha Simba. ¹⁸ Bwana ataniepusha na matendo yote maovu na kuniokoa kwa ajili ya ufalme wake wa mbinguni. Utukufu uwe kwake milele na milele. Amina. ¹⁹ Msalimie Priska na Akila na nyumba ya Onesiforo. ²⁰ Erasto alibaki huko Korintho, lakini Trifimo nilimuacha Mileto akiwa mgonjwa. ²¹ Fanya hima uje kabla ya kipindi cha baridi. Eubulo anakusalimu, pia Pude, Lino, Claudia na ndugu wote. ²² Mungu awe pamoja na roho yako. Neema iwe pamoja nawe.