¹ Pamwi mwemwe mutamanyile, wanawitu (amuno nenji nkhuvwanga ku wanthu wano wamanya ivyi sundo), kuno isundo likatungulula umunthu mu mphindi yonsi yino ali nuwumi? ² Amuno umwanachi umutwalwe akunyepwa ni sundo ku mulume pano achilinji ali nu wumi, ukuwa ndi umulume wafwa, umwanachi akusapulwa ukufuma kwi sundo lyi twalwa. ³ Achaleka nomba, pano umulume achilinji amumi, ndi akwikala nu wunji umonsi, aliyitwa amuzelewuke. Kweni ndi umulume wafwa, a musapuke kwi sundo, achaleka asa muzelewuke ndi akwikala nu monsi wunji. ⁴ Achaleka, wanawitu, namwenye mwe wafwe kwi sundo ukupitila mu muwili wakwe Kristu. Chiliwonye ukuti mwemwe mulemenkhane kwe wunji, akulikuti, kwe weliwe wino wakatusizwe ukufuma ku wafwe, alyakuti tungakoma ichikomwa kwe Leza. ⁵ Amuno pano twalinji mu muwili, ivikumbuchilwa vya luwembu, ivikatuswe ni sundo, vyalinji pa mulimo mu mbali zya muwili witu ukukoma ivikomwa vya mfwa. ⁶ Ukuwa nomba tusapulizilwe ukufuma kwi sundo. Sweswe tufwile kwe chocho chino chatunyefile. Choo chili wonye ukuti tungatewetela mu wupya wa Muzimu, swinya asa mu wukale wa mawaliko. ⁷ Achani chino tulilanda nomba? Wuzye isundo ilyenecho aluwembu? Chitize chitele chiwe. Chingatenga, nenji nge nthatela imanye uluwembu, ndi chitalinji ukupitila mwi sundo. Amuno nene nge nthamanyile ukukumbwa suka isundo lyatili, ''Wewe ufwile utakakumbwe.'' ⁸ Ukuwa uluwembu lwasenda ulongo ukupitila mwisundo nga alileta ukukumbwa kulikonsi mwakwe nene. Amuno kusita isundo, uluwembu alufwe. ⁹ Pa mphindi yimwi nalinji ne mumi sita isundo, kweni pano ipatichizyo alyiza, uluwembu aluzana uwumi, nga nenji nafwile. ¹⁰ Ipatichizyo lino lyalinji nu kuleta uwumi alipiluka ukuwa amfwa kwe nene. ¹¹ Amuno uluwembu lwasenda ulongo ukupitila mwi patichizyo nga alikopeka nene. Ukupitila mwi patichizyo lyankhomile. ¹² Achaleka isundo alitele, ni patichizyo alitele, lilungamane swinya alizipe. ¹³ Nga wuzye chino achizima achiwa amfwa kwe nene? Chitakatele chiwe. Kweni uluwembu, ukuti luloleke ukuwa luwembu, lwaleta imfwa mwakwe nene ukupitila mu chino chalinji achizima, swinya ukupitila mwi patichizyo uluwembu lungize luwe luwembuke ukulusya. ¹⁴ Amuno twamanya kuno isundo achawuzimu, kweni nene ne waku muwili. Nenji nakazwa pansi pa wuzya ku luwembu. ¹⁵ Amuno chino nkhuwomba, nenji nthakuchivwichisya ichete. Amuno chino nkhulonda ukuwomba, nenji nthakuwomba, swinya chino nachipata, nenji nkhuwomba. ¹⁶ Kweni ndi nkhuwomba chino nenji nthakulonda, nkhuzumilizania ni sundo kuno isundo alizima. ¹⁷ Ukuwa nomba asa nenenye wino akuchiwomba, ukuwa uluwembu luno lukakwikala mwe nene. ¹⁸ Amuno imanyile ukuti mwe nene, muno amu muwili wane, mutakwikala ichinthu ichizima. Amuno ukukumbwa kwa vizima kuli na nene, kweni nthanga intchiwombe. ¹⁹ Amuno ichizima chino nenji nkhulonda, nthakuchiwomba, ukuwa ichiwipe chino nenje nthakuchilonda, chochonye nkhuchiwomba. ²⁰ Nomba ndi nenji nkhuwomba chino nthakuchilonda ukuchiwomba, ngapano asanenenye wino nkhuchita, ukuwa kweni uluwembu luno lwikala mwe nene. ²¹ Achaleka, nkhuzana isundo lyoo: Pano nkhulonda ukuwomba chino achizima, uwuwipe wulipenepo na nene. ²² Amuno nenji indi nichimwemwe mwi sundo lyakwe Leza nu munthu wa mukasi. ²³ Kweni nkhulola isundo lyakupusana mu mbali zya muwili wane. Likulwa ukususania ni sundo ilipya mu melenganio yane. Likunsenda ne munyepwe ni sundo lya luwembu luno luli mu mbali zya muwili wane. ²⁴ Nenji ne munthu wamalanda! Wuzye weweni alimphususya nene ku muwili wamfwa? ²⁵ Ukuwa ukusalifya kuwe kwe Leza ukupitila mwe Yesu Kristu i Mfumu yitu! Achaleka nomba, nene nemwenecho nkhutewetela isundo lyakwe Leza na melenganio yane. Ukuwa, nu muwili nkhutewetela isundo lya luwembu.