¹ Nene napa kwe mwemwe Febe inkhazi yitu, wino amuwomvi wa chiwanza chino chili ku Kentchiliya, ² alyakuti mungamupochelela mwakwe Mfumu. Wombani choo mu miwele yino yinelela awanthu awatele wakwe Leza, swinya mumupe wuliwonsi uwavwilizyo wuno angalonda ukufuma kwe mwemwe, amuno Febe alinji amutuli ku wavule na kwe nenenye. ³ Mulamuke Prisila nu Akwila, awawomvi na nene mwakwe Kristu Yesu, ⁴ wano muno uwumi wane watasayizile uwumi wawo awenecho. nenji nkhusalifya woliwo, asa nene nenga, ukuwa niviwanzanye vonsi ivya Makandi. ⁵ Mulamuke ichiwanza chino chili mu ng'anda yawo. Mumuyanzye Epinetasi umukundwe wane, wino a chikomwa chakutalichila mu Asiya ukuya kwe Kristu. ⁶ Mumulamuke Mariya, wino awomvile ukulusya muno mwemwe. ⁷ Mumulamuke andronikasi nu Juniyasi, awa luko lwane swinya iviwuza vyane mu vingololo. Awamanyikwe ichete sana ku wa positole, swinya walinji mwakwe Kristu lyo nene ntchili. ⁸ Mumuyanzye Ampuliyatasi, umukundwe wane mwakwe Mfumu. ⁹ Mumulamuke Arubanasi, umuwomvi ponga na sweswe mwakwe kristu, nu Stachisi, umukundwe wane. ¹⁰ Mumuyanzye Apelesi, umuzumilizwa mwakwe Kristu. Muwalamuke wawo wano awa mu zyang'anda zya kwe Arisitobalasi. Mumuyanzye Herodiyoni, uwa luko lwane. ¹¹ Muwalamuke wawo awa mu zyang'anda zyakwe Narasisasi wano wali mwakwe Mfumu. ¹² Mumuyanzye Trayifina nu Trayifosa, wano wakawomba ukulusya mwakwe Mfumu. Mumulamuke Perisisi umukundwe, wino wawomba ukulusya mwakwe Mfumu. ¹³ Mumulamuke Rufasi, umusolwa mwakwe Mfumu, nu mama wakwe swinya uwane nanenye. ¹⁴ Mumulamuke Asinkiritasi, Flegoni, Herimesi, Patrobasi, Herimasi, na wanyina wano wali ponga na woliwo. ¹⁵ Mumulamuke Filologasi nu Juliya, Nereyasi ni nkhazi yakwe, nu Olimpasi, na wonsi awanthu wakwe Leza awatele wano wali na woliwo. ¹⁶ Mulamunkhane wonga nu muwuye nu kufyompa ukutele. Aviwanza vyonsi ivyakwe Kristu vikulamuka mwemwe. ¹⁷ Nomba nkhukomelezya mwemwe, wanawitu, ukuti mwelenganie ivya wawo wane wakupanjisya ukwankhana nu kupunula. Wakonjelezya ukuchila ichisambilizyo chino mwemwe musambilizile. Mupiliwuke ukufuma kwe woliwo. ¹⁸ Amuno awanthu wa musango ngati woo wasi tewetela i Mfumu yitu Kristu, kweni munda zyawo awenecho. ukuwomvya imivwanjile yawo iyizima swinya iya wufi ukuwipila imyenzo ya wano awa sita mulandu. ¹⁹ Amuno ichelezyelo cha kutontha kwinu kwivwika kwe aliwensi. Achaleka, nene nkhusechela, pakwe mwemwe, lelo nkhulonda mwemwe muwe mwe wamano pakwe chocho chino achizima, swinya muwe awa sita mulandu pakwe chocho chino achiwipe. ²⁰ E Leza uwa mutende nombanye andi amulyatanjile Satana pansi pa matamba yinu. Uwila wakwe Mfumu yitu Yesu Kristu wuwe na mwemwe. ²¹ Timoti, umuwomvi na nene, akuwalamuka, nu Lusiyasi, Yasoni, nu Sosipata, awa luko lwane. ²² Nene, Teritiyasi, wino nkhuwalika e kalata wee, nkhuwayanzya mwakwe Mfumu. ²³ Gayiyasi, wino akunsunga mu ng'anda yakwe ni chiwanza chonsi, chikuwayanzya. Erasitasi, e kasunga wa chuma mu musumba, akuwayanzya, panga nu Kwatasi umunyina. ²⁴ Uwila wakwe Mfumu Yesu Kristu wuwe namwe. Ameni. ²⁵ Nomba kwe wino angakwanisya ukupanga mwemwe ukuti mwimilile ukuyana na kwi landwe zima nu kulumbilila kwakwe Yesu Kristu, ukuyana nu kuwumbulika kwakwe chitamanyikwa chino chafisilwe pa mphindi iyitali, ²⁶ kweni nomba chawumbulikwa swinya chamanyikwa ukupitila mu mawaliko ya wakasema ukuya ku maluko yonsi, nu kulamulila kwakwe Leza wa muyayaya, ukuti alete ivya kutonthela kwi suwilo. ²⁷ Kwakwe wenganye Leza uwa mano, ukupitila mwakwe Yesu Kristu, kuwe uwuchindame wa muyayaya. Ameni.