¹ Pano i Sabata lyasila, Mariya Magadaleni, ne Mariya e mama wakwe Yakobi, ne Salome walesile amafuta manuntchileayakuti wamupake Yesu. ² Umutondotondo uwanda wakutalika mwesa sabata awaya kumanda pano ilanzi lyafuma. ³ Wawuzyananga umuwuye ku muwuye wakuti, ''ngeweni wo afumizye iliwe pa mulyango wa manda?'' ⁴ Awalolechesya, awalola ilewe lifumilepo mo lyalinji alikulu. ⁵ Awinjila mu manda awalola umulumendo azwite umwinjila uwutiswe, ayisile kwi kasa lye ndilo, awachiluchila. ⁶ Ati kwawoliwo, '' Mutachuluchila. Mukuvwamba Yesu, uwa ku Nazareti wo wasayisilwe. Azyulupusile! asimoo. Lolani pano wamulambalisile. ⁷ Kweni pitani, kawuzyani awasambilili ne Petulo, '' Wandi akolele pankholelo kwe mwemwe ukuya ku Galileya. Ako mwandi mukamulole, mo wawawuzizizye.''' ⁸ Awafuma munkhungwe wakusamala; walinji nintete nukuzakaza. Watalanzile nathi chimwi kumunthu amuno watinanga. ⁹ Umutondotondo pa sabata po wazyulupuka, aloleka kwe Mariya Magadaleni, wino wamufumizizye imizimu miwipe munenulambali (7). ¹⁰ Aya wanene wanji wano walinji nawe, awatalika ukulosya nululila. ¹¹ Awivwa ukuti wazyulupusile swinya wamuweni, kweni watazumilizyanga. ¹² Pansizi pe vyoo alolechela mumwata unji ku wanthu wawili po wakupita mukaya kanji. ¹³ Awapita awawuzya awasambilili wanji, kweni watawasuwizile. ¹⁴ Pakulelechezya Yesu aloleka ku wayi ikumi na wonga pano walyanga ichakulya pi beche, awakalipila amuno watasuwizile wano wamuweni po wazyulupusile ku wufwe. ¹⁵ Awanena ati, '' Pitani munsi yonsi mukawizye ilandwe zima ku weleulwa wonsi. ¹⁶ Wano wasuwila nukubatizwa walipusukwa, wano wakana ukusuwila walisuswa. ¹⁷ Ivimanyisyo vyoo viliya kwe wano wasuwila; Mwizina lyane walifumya imizimu miwipe. Walivwanga na ndimi mphya. ¹⁸ Walinyamula inzoka mumakasa yawo, ndiwiza wamwa chimwi ichakuwakoma, chitaliwachisa. Waliwika amakasa pawalwale, walipola.'' ¹⁹ Pano Imfumu walanda kwe woliwo, asendwa ukuya mwiyulu swinya ayikala kwi kasa lye ndilo ilya kwe Leza. ²⁰ Awasambilili wakatusile mukuwizya apali ponsi, pano Imfumu yawombanga nawoliwo nukusimichizya ivimanyilo vino vyalinji nawoliwo.