¹ Apano Yesu watalisile ukuwasambilizya mu vyili. Awanena ati, '' Amunthu walimile ichalo, aliwilizya mumbali, azimba ichizinji chakufinila ivikomwa. Azenga uwulunza apano azumilizyania nawanji ukuti wikale muchalo wawalya ivya mwenemo, wamulipa, weni alema umusinza apita. ² Pamphindi ya vikomwa, atuma umuzya wakwe ku wanthunye wawo ukuti wakamupe ivisezwa vimwi. ³ Wakalima wawo awalema umuzya, awamuma, nukumunyosya nanthi kumupa vikomwa vimwi. ⁴ Atuma swinya umuzya winji, nukumuchisa mumutwe nukumusonzi nsoni. ⁵ Atumanye swinya winji, awamukoma. Awachita wowonye kuwonsinye, ukuma wamwi nukukoma wamwi. ⁶ Watumile swinya umunthu winji, umwana umukundikwe wakwe. Walinji awakumalizya ukumutuma kweweliwo. Ati, ' wandiwa wakamuchindike umwana wane.' ⁷ '' Kweni wakalima awalandizyania wati we awamphyani wakwe. Zanji, tumukome nga twizen tupyane sweswe.'' ⁸ Wamulemile awamukoma, awamusumba, ukumufumya muchalo. ⁹ Ngalelo, umweni chalo aliti chani? Aliyiza ayonone wakalima wavikomwa nukuwapa awanji. ¹⁰ Wuzye mutawazya amawaliko? ' Iwe lino wakazenga walikanile ilino lyizile lyawa aliwe ilyenecho. ¹¹ Choo achakufuma ku mfumu e Leza, swinya achakunzungusya mu minso yitu.' ¹² Wanankholelo wawa Yuda walonda ukulema e Yesu amuno wamanyile ukuti wawumilanga weliwo umulumbe. Kweni wasayanga iwumba. Apano wamusyile awapita. ¹³ Apano awafalisi wamwi nawanthu wakwe Herodi watumile wamwi ukuti wamuteye namazwi. ¹⁴ Watili wiza awati kweweliwe, ''musambilizya tumanyile kuno musipechela amelezyanio ya wanthu, usitina umunthu ndi amwatachi, ukuwa ukasambilizya awanthu ukulonda kwe Leza mukusimichila. Ale tunene, wuzye chawipa mwisundo ukusonkha umusonkho kwe Kasale? Wuzye tuwasonkha pamwi pole? ¹⁵ ''Kweni e Yesu wamanyile umuchenjelo wawo awanena ati, ngachani chino mukunjelezya? letani ulundalama ndulole.'' ¹⁶ Awatwala ulundalama longa kwe Yesu. Awanena ati, ''imphumi ayakwaweni ni zina alya kwewenu? Awatolelela wati, ''e Kesali.'' ¹⁷ Yesu ati, ''Panji e Kesale vino avye Kesali, nivya Leza panji e Leza.'' Awanthu awamuzunguka nkhaninye. ¹⁸ Apano awa Saduki, wano watinji kusu kuzyulupuka, awaya kwe Yesu. Awamuwuzichisya, awati, ¹⁹ ''Musambilizya Musa watuwalichizile, kuno ndi umunthu wafwa nukusya umuchi, nanthi kukwata, umunyina atwale umuchi, nukukwatila wino wafwa ikwata.'' ²⁰ Kwalinji awa pawunyina munenulambali; uwakutalika watwala, afwa nanthi kusya ikwata. ²¹ Nga uwachitiwili atwala umuchi, afwa nanthi kusya ikwata, nuwachititatu wowonye. ²² Wonsinye wanenulambali wafwa nanthi kusya ikwata. Pakupolelechezya numwanachinya afwa. ²³ Mukuzyulupukwa pano wazyulupukwa swinya, nga umwanachi aliwa umu ka weni? vino wonsinye munenulambali awaliwonga wamutwazile ukuwa umuchi.'' ²⁴ Yesu avwanzile ati, '' wuzye asachino mukasowa, kumulandu mutamanyile amawaliko nanthi kumanya amaka yakwe Leza? ²⁵ Amuno pano awafwe wazyulupuka, kutaliwa ukutwala nanthi kutwlwa, kweni muliwa ngati awangeli mwiyulu. ²⁶ Kweni ukuwa ivyakuzyulupulwa kwa wafwe, wuzye mutawazya amazwi mwe kalata uwa kwe Musa, ivya chimpunza chemulilo, muno e Leza walandizile kwe weliwe ati, '' ne Leza wakwe Aburaham swinya e Leza wakwe Ayizeki swinya e Leza wakwe Jekapu? ²⁷ Asa we Leza uwawafwe, kweni we Leza uwawawumi. Mwe waluvya nkhani nkhaninye.'' ²⁸ Wenga wumwi uwa Wakawalika wizile nu kwivwa ukupanzania kwawo; waweni kuno e Yesu wawatolelela ichete. Awuzichizya Yesu ati, '' nga alisundochi lyino lyakula ukulusya amasunda yonsi? ²⁹ Yesu atolelela, '''isundo ikulu alyoo 'yivwa Izilayeli, imfumu e Leza witu, wili mfumu wenganye nsu. ³⁰ Uwakunda imfumu e Leza nu mwenzo wako wonsi, nu muzimu wako wonsi, namano yako yonsi, namaka yako yonsi.' ³¹ Insundo lyachitiwili alyoo, ' Uwakunda umuwuyo ndi vyo wayikunda. Pasi insundo ikulu ukulusya kwe yaa.'' ³² Ekawalika avwanga kuno, '' Chazipa, Musambilizya wavwanga ichisinkha kuno Leza ali wenga nsu, nukuwa kuno kusi winji peweliwe. ³³ Ukumukunda nu mwenzo wonsi nu kwivwichisya konsi na maka yonsi, nukukunda umuwuyo nge vyo wayikunda kwalusya ukufima inzuwi zya nyama nukochela Leza inzuwi pileza. ³⁴ Pano Yesu watili walola kuno watolelela ichete, amunena ati, ''' usikutali nuwufumu wakwe Leza.'' Pansizi pakwe chocho, nanthi wumwi wimo wakolowozizye e Yesu amawuzyo yanji. ³⁵ Pano Yesu wasambilizyanga mung'anda ya kwe Leza, ati, '' ngachani chino wakawalika wamasundo wakuti e kiristu amwana wakwe Davide? ³⁶ A Davide nye mu Muzimu Umwimichile, ati, ' Imfumu e Leza wanenile imfumu yana ati, ''yikala kwikasa lyane ilye ndilo nkhandi nsuke mbike awalwani wako wawe pansi pamatamba yako.'' ³⁷ Davide nye wamwitanga 'Imfumu,' nga nomba Kiristu angitwa wuli mwana kwe Davide?'' Iwumba kulu aliteyelezya kweweliwe ni chimwemwe. ³⁸ Muchisambilizyo chakwe Yesu ati, ''Muwachenjela nawakawalika wamasundo wano wakalonda ukupita mu myinjililo mitali ukuti walamukwa mumasyo ayaku kazizya. ³⁹ Swinya wali ni vilimba ivya papela muma Sinagogi na masyo yakuchindikikwa pa vya kulya. ⁴⁰ Wakakonona swinya ing'anda zya wanachi awafwilwe, wakapepa amapepo ayatali ukuti waloleke ku wanthu. Wawanthu ukusundwa kwawo kuliwa ukukulu. ⁴¹ Pano Yesu wayile wikala mupipi nichisengulilo icha mung'anda yakwe Leza; walolanga pano wakuponzia indalama zyawo muchisengulilo. Wachinondo awavule waponzianga indalama imvule. ⁴² Apano umwanachi umufwilwe umusaluke wizile sumbila, utu ndalama tuwili. ⁴³ Ayita awasambilili wakwe ati, kweweliwo, ''Nakawuzyenye nkhuwanena, wee umwanachi umufwilwe wasumbila ukulusya wonsi wano wasumbila muchisengulilo. ⁴⁴ Amuno wonsi wasumbizile mwenemo kukutavuzya kwawo. Ukuwa weni kukusowelwa kwakwe, wasumbila mwenemo vyonsi vino walinji navyo.