¹ Pano wafisile mu Yerusalem. wali papipi nukufika ku Betifage ne Betania pa mwamba we Olivi, e Yesu watumile wawili awasambilizi ² na awanena ati, '' Pitani mukaya akapalamane na koo. Ndimwinjilavyeny mulizana umwana we ndokwe wino watani wakwelepo. Musapule muyilete kwe nene. ³ Ndi wumwi angati kwe mwemwe, ' Ngachani chino mukuchita wowonye? Mumunene ukuti, '' Imfumu yikuyilonda swinya wandi wanyosye kwe mwemwe.''' ⁴ Wapisile wazanile wanyefile umwana wa ndokwe pamusolo papipi na pa mulyango munzila, awasapula. ⁵ Awanthu wamwi wimilile awanena ati, '' Ngachani cho mukuwombela wowonye, mukusapula umwana wa ndokwe?'' ⁶ Awauzya mo Yesu wawauzizye, apo awaleka awasapula. ⁷ Awafika nawe umwana wa ndokwe kwe Yesu awawika ivyakuzwala vyawo pe ndokwe, apo ayikala penepo. ⁸ Awanthu awavule wenzile ivyakuzwala vyawo munzila, wamwi wanzile amafwa yo watemanga mumphanga. ⁹ Wo wakolezile nawo nawo wakonsile pansizi wapundanga wakuti, '' Hosana! Umupepwe wo akakwizila mwi zina lyalyamfumu Leza. ¹⁰ Umupepwe wino akalwizila muwufumu we tata Davidi! Hosana Mwiyulu!'' ¹¹ Yesu ayinjila mu Yerusalem ayinjila mung'anda yakwe Leza atalangania alola ivinthu vyonsi. Ukuwa muno kwatezile kwila, afuma aya ku Betaniya na wasambilizi ikumi nawawili. ¹² Awacha pano wafuma ku Betaniya, inzala ayiwaluma. ¹³ Ala alola apatali alola umukunyu uli namafwa, apita mukolola ndi angazana amakuyu mwenemo, apano nga qwapalamila wazana amafwa matupu, amuno yitalinji amphindi ya makuyu. ¹⁴ Alanda kumukunyu ati, '' nanthi wumwi wo alilya amakuyu ukufuma kwe wewe swinya.'' Awasambilizi wakwe awivwa. ¹⁵ Powafika mu Yerusalemu, winjila mu ng'anda yakwe Leza ayinjila atalika ukuwinga wonsi wano wakalanga nu kukazya mung'anda yakwe Leza awatalika ukupenula ama beche yano awanthu wano wakaunkhanianga indalama swinya wapenulyania ivilimba vya wano wakazyanga inkhunda. ¹⁶ Walesya wonsi ukusenda chimwi ukufumya mung'anda yakwe Leza ichakuti wangakazya. ¹⁷ Ngapano asmbilizya awanthu ati, ' Chitawalikwa ukuti, ing'anda yane yiliwakwitwa ing'anda yo imyiko yonsinye yiliwapepa mwenemo?' Kweni mwawika ing'anda yawa yavipondo.'' ¹⁸ Wasimapepo wakulu nawakawalika wa masundo awivwa vyo walandanga, awavwamba inzila iyakuti wamukomele. Watinanga amuno waweni iwumba lyonsi lyazungukanga nimisambilizizye yakwe. ¹⁹ Pano kwila, awafuma mukaya. ²⁰ Pano wachilingania umutondo, awalola umukuyu wukazile ukufuma kupela mpaka kumisisi. ²¹ Petelo ayizuka ati, '' Musambilizi, lola! Umukuyu wo watifile ukazile.'' ²² Yesu awatolelela ati, '' Muwe nisuwilo mwe Leza.'' ²³ Nakawuzyenye nkhuwawuzya ukuti ndi wumwi angati kumwamba, 'swembuka kayisumbile mwe sumbi,' ndi asakuvwilika mumwenzo wakwe chowavwanga chingachitwa, avyo Leza aliwomba. ²⁴ Achino nkhuwanena ukuti: Chonsinye chino mukupepa nukulenga, suwilani ukuti mwapochelela, chiliwa achinu. ²⁵ Ndi mwimilila amupepa, mufwile ukutetela wano muli nawo numulandu, ukuti a Tata winu wino ali mwiyulu awatetele imilandu yinu. ²⁶ Ngamutakutetela wanji, namwenye e Tata winu wino ali mwiyulu ataliwatetela ukuwifya kwinu.'' ²⁷ Awanyochela swinya mu Yerusalemu. Pano Yesu akupitapita mung'anda mu ng'anda yakwe Leza, wasimapepo nawa sikawalika masundo, na wasongo wasongo awaya kwe weliwe. ²⁸ Awamuwuzya awati, '' Ngaamakachi wano ukupanjila ivinthunye vyoo? Swinya wewenu wowakupa amaka yakuvichitila?'' ²⁹ Yesu awatolelela ati, ''Nandi mabkolowozye iwuzyo lyonga. Mbuzyani nandi imbanene amaka yano nkhawombela. ³⁰ Uwubatizyo wakwe Yohani, wafumile kwiyulu pamwi ku wanthu? Njasukani.'' ³¹ Awatalika ukulandandana nukupanzania awiti, '' Ndi twati 'yafumile kwiyulu' wand atunene ukuti ngachani chino mutamusuwizile?' ³² Swinya ngatwati, 'yafumizile kuwanthu,' ....'' watinanga awanthu umulandu wakuti wasuwazile ukuti Yohani walinji amutamwa. ³³ Achaleka watolelela Yesu ati, '' Tutamanyile.'' Nawe Yesu ati, ''nanthi anenenye nthandi mbanene amaka yano nkhuchitila ivinthunye vyoo.''