¹ Ngapano Yesu akololelwa nu Muzimu ukuya mu lupalang'ang'a ukwelezwa nu satana. ² Ala pano wasolezizye amanda amakumi yani umusanya swinya amakumi yani uwusiku, weni izile awa ni nzala. ³ E kelezya ayiza nu kuti kwe weliwe, ''Ndi we Mwana wakwe Leza, layila amawe yaa ukuti yawe a mukate.'' ⁴ Ukuwa Yesu atolelela nu kuti kwe weliwe, ''Lyawalikwa, 'Umunthu ataliwa nu wumi pa mukate wutupu, kweni ni lililyonsi lino likufuma mu mulomo wakwe Leza.'''' ⁵ Ngapano e kelezya amutwala mu musumba uwutele nga amuwika pansongo ya ng'anda iya tempeli, ⁶ nga atili kwe weliwe, ''Ndi we Mwana wakwe Leza, yiponie pansi, amuno lyawalikwa, ''Weni ali layila wawngelo wakwe ukuti wakusungilile,' swinya, 'Walikwankha mupela mu makasa yawo, alyakuti utakize wume itamba lyako ku liwe.'''' ⁷ Yesu atili kwe weliwe, ''Swinya lyawalikwa, 'Utati uwakwelezya Imfumu e Leza wako.'''' ⁸ Swinya e kelezya amusendela papela pa mwamba uwutali nu kumulanjizya amawufumu yonsi iya munsi ponga nu wuchindame wawo. ⁹ Weni atili kwe weliwe, ''Vyonsi ivinthunye vyoo ndipa wewe, ndi ungawa pansi nu kufukamila nene.'' ¹⁰ Ngapano Yesu atili kwe weliwe, ''Choka fuma paa, Satana! Amuno lyawalikwa, 'Ulifukamila i Mfumu e Leza wako, swinya uli tewetela weliwe wenganya.'''' ¹¹ Apano e kelezya wamulesile nga lolani, awangelo wizile nu ku tewetela weliwe. ¹² Nomba pano Yesu wivwa kuno Yohani walemwa, weni wafuma ukuya mu Galileya. ¹³ Weni wasyile Nazareti nu kuya swinya ukwikala mu Kapenamu, wino ali mumbali ya sumbi waku Galileya munsi ya Zubuluni nu Nafutali. ¹⁴ Choo chachisilwe ukuti chifiswe chino chavwangwa nu Yesaya u mutumwa, ¹⁵ ''Insi ya Zebuluni ninsi ya Nafutali, wulunga nu sumbi, ukuchila e Yorodani, Galileya wa Makandi! ¹⁶ Awanthu wano wisile mu mfizi awalola uwu tiswe, swinya wawo wano wisile mu chiputulwa na munzundila yamfwa, pakwe woliwo uwutiswe wakatuka.'' ¹⁷ Ukufuma mu mphindi Yesu atalisile ukulumbilila nu kuti, ''Tontholokwani, amuno uwufumu wa mwiyulu wiza mupipi.'' ¹⁸ Ala pano wapitanga mumbali ya sumbi waku Galileya, weni waweni awanyina wawili, Simoni wino akakwitwa Peturo, nu Andreya umunyina wakwe, wakusumbila ikonde mwa sumbi, amuno walinji awalondo wanswi. ¹⁹ Yesu atili kwe woliwo, ''Zanji, mukonkhe nene, nga nenji ndipanga mwemwe awalondo wa wanthu.'' ²⁰ Paponapapo awasya amakonde nu kukonkha weliwe. ²¹ Ala pano Yesu wapitanga ukufuma kulyanye weni aweni wawili wanji awanyina, Yakobi umwana wakwe Zebediya, nu Yohani umunyina wakwe. Walinji mu wato nu Zebediya ne yisi wasumanga amakonde yawo. Awita, ²² nga paponapapo wasya uwato nu yisi nga wakonkha weliwe. ²³ Yesu apitananga mu Galileya wensi, ukusambilizya mu ma sinagogi yawo, akulumbilila ilandwe zima lya wufumu, swinya ukupozya indwala zya misango yonsi na matenda pakasi pa wanthu. ²⁴ Ilandwe ilya vwakwe Yesu lyayile konsi ku Siriya, swinya awanthu awaleta wonsi kwe weliwe wawo wano walinji awalwale ni ndwala izilekane na mawulume, wawo awalemwe na ma dimoni, swinya awa tuzilisi ni chinthendya. Yesu awapozya. ²⁵ Amawumba amakulu yamukonkhanga ukufuma ku Galileya, mu Dekapolisi, Yerusalemu, na Yudeya, swinya ukufuma ukuchila e Yorodani.