¹ Apano uwufumu wa mwiyulu wuliwa ngati awamwali ikumi wano wasenzile inyale zyawo awaya nu kusunkhania e siwinga. ² Wasano mwakwe woliwo walinji awatumphe na wasano walinji awachenjele. ³ Amuno pano awamwali awatumphe wasenda inyale zyawo, watasenzile nanthi amafuta yanji. ⁴ Ukuwa awamwali awachenjele awasenda amafuta mumisazi apaliponga ni nyale zyawo. ⁵ Nomba pano e siwinga wachinji akuzimba, awasipula nu kuponechela. ⁶ Ukuwa pakasi pa wusiku kwalinji ukupunda, 'Lolani, e siwinga! Yani kunzi nu kusunkhana nawe.' ⁷ Ngapano wosinye wawo awamwali awakatuka nu kukozya inyale zyawo. ⁸ Awatumphe awati ku wachenjele, 'Tupaniko yamwi amafuta yinu amo inyale zyitu zikuzimichila.'' ⁹ Kweni awachenjele awatolelela nu kuti, 'Amuno patanga pawe ayakukwila sweswe na mwemwe, yanji mumalo mwakwe ku wawo wano wakakazya nu kukala yamwi aya mwewenecho,' ¹⁰ Pano wali munzila ukuya mukukala, e siwinga wiza, nga wawo wano wayisenginie awaya nawe ku chakulya cha winga, ni chisakati achiyalwa. ¹¹ ''Pansizi awamwali wanji nawonye awiza awati, ''Tatakulu, tatakulu, twiyulile.' ¹² ''Ukuwa awatolelela nu kuti, ''Nakawuzyenye nkhuwanena, nenji nthawamanyile.' ¹³ Achaleka lolelanji, amuno mutamanya uwanda nanthi amphindi. ¹⁴ ''Amuno chili ngati pano umunthu ali mupipi ukuya kunsi yinji. Wisile awawomvi wakwe nu kuwapa insawo yakwe. ¹⁵ Kwakwe wenga mwe woliwo apile ama talenti yasano, kwe wunji apile yawili, swinya kwe wunji apile italenti yonga. Wensi apochezile ivya kulingana na maka yakwe, nga alema umusinzo awapita. ¹⁶ Wenga wino wapochezile amatalenti yasano paponye aya mukuwasandulula nu kuzana yanji amatalenti yasano. ¹⁷ Nawenye wenga wino wapochezile ama talenti yawili azanila yanji yawili. ¹⁸ Ukuwa umuwomvi wino wapochezile i talenti lyonga apita aya ayimba ichizinji, nga azichila tatakulu wakwe indalama. ¹⁹ Nomba lyo papita imphindi iyitali e tatakulu wa wawo awawomvi anyoka, nga awazya nawo indalama. ²⁰ Umuwomvi wino apochezile amatalenti yasano wiza nu kuleta yanji amatalenti yasano. Atili, 'Tatakulu, wamphile nene amatalenti yasano. lola, nenji nasandulula ayanji ayasano. ²¹ ''E tatakulu wakwe atili kwe weliwe, 'Wachita ichete, we muwomvi umuzima swinya umusuwilwa! Wawa we musuwilwa pa vinthu ivitichi. Nandi nhuwike we kalola pa vinthu ivivule. Yinjila mu kuzewela kwakwe tatakulu wako.' ²² U muwomvi wino apochezile ama talenti yawili wiza nu kuti, 'Tatakulu, wamphile ama talenti yawili. Lola, nasandululila penepo yanji yawili.' ²³ ''E tatakulu wakwe atili kwe weliwe, 'Wachita ichete, we muwomvi umuzima nu musuwilwa! Wawa we musuwilwa pa vinthu ivitichi. Nandi nkhuwike uwe we kalola pa vinthu ivivule. Yinjila mu kuzewela kwe tatakulu wako.' ²⁴ ''Ngapano umuwomvi wino wapochezile italenti lyonga nga atili, 'Tatakulu, namanya kuno we munthu umutamuye. Ukasinza napano utatanda, swinya ukawunganika napano utasamphania. ²⁵ Nalinji ni nthete, achino nayile nu kufisa italenti lyako pansi mu musili. Lola, ulinacho paa chino achako.' ²⁶ ''Ukuwa e tatakulu wakwe atolelela nu kuti kwe weliwe, 'We muwomvi umuwipe nu mukata, wamanya kuno nkhasinza pano nthatanda swinya nkhawunganika pano nthasamphania. ²⁷ Achaleka wewe nge wapile imphiya zyane ku wakasunga, nga pakwiza kwane nenji nge mphochezile ukunyosya izyane ni zinji izya papela. ²⁸ Achaleka mupoke i talenti ukufuma kwe weliwe nu kupa lyenelyo ku muwomvi wino ali na matalenti ikumi. ²⁹ Amuno kwe wensi wino alinavyo, alipwa ivya konjelezya -- ni vivule nkhaninye. Ukuwa ukufuma kwe winsi wino asi nanthi chimwi, na chino alinacho chilipokwa. ³⁰ Sumbani umuwomvi uwavye mu mfizi ya kunzi, kuno kuliwa ukulila nu kulumania amino.' ³¹ ''Pano u Mwana wa Munthu akwiza muwuchindame wakwe na wangelo wonsi na weliwe, apano aliyikala pa ndulu yakwe iya wuchindame. ³² Paminso yakwe paliwunganikwa amaluko yonsi, swinya alilesania awanthu wenga ku muwuye, ndivino umuchemi akalesania ing'onzi ukufuma ku mbuzi. ³³ Aliwika ing'onzi mwi kasa lyakwe ilya ndilo, kweni imbuzi kwe kamani. ³⁴ Ngapano Imfumu yilivwanga kwe wawo kwi kasa lyakwe ilya ndilo, 'Zanji, mwe wano mwalotwa nu Tata wane, mupyane uwufumu wasenganizizwa mwemwe ukufuma kulwalo lwa nsi. ³⁵ Amuno nalinji ni nzala nga mwamphile ichakulya; nalinji nu lusala nga mwamphile achakung'wa; nalinji ne mweni nga mwamphochezile; ³⁶ nalinji chinthakwa nga mwanzwisile imyenda; nalinji ne mulwale nga mwansunjilila; nalinji mu ng'anda ya vingololo nga mwiza mwansyungula.' ³⁷ ''Ngapano awalungamane wali tolelela nu kuvwanga, 'Mfumu, wuzye a mphindichi twakuweni uli ninzala nga twalyesya wewe? Pamwi uli nu lusala nga atukupa ichakung'a? ³⁸ Wuzye amphindichi twakuweni we mweni nga atukupochelela? Pamwi chinthakwa nga atukuzwika imyenda? ³⁹ Wuzye amphindichi twakuweni we mulwale pamwi mu ng'anda ya vingololo nga atukusyungula?' ⁴⁰ ''Ngapano Imfumu yili tolelela nu kuvwanga kwe weliwe, 'Nakawuzyenye nkhuti kwe mwemwe, chino mwachitizile wenga mwakwe watichi wakwe waa awanyina wane, mwachitizile chenecho kwe nene.' ⁴¹ Ngapano aliti kwe wawo kwi kasa lyakwe ilya kamani, 'Fumani kwe nene, mwe watipwe, muye mu mulilo wamuyayaya wuno wasenganizwa e satana na wangelo wakwe, ⁴² umuno nalinji ni nzala kweni mutamphile ichakulya; nalinji nu lusala, kweni mutamphile ichakung'wa; ⁴³ nalinji ne mweni, kweni mutamphochezile; chinthakwa, kweni mutanzwisile imyenda; ne mulwale swinya indi mu ng'anda ya vingololo, kweni nanthi kunsunjilila.' ⁴⁴ ''Ngapano nawonye awatolelela nu kuti, Mfumu, amphindichi twakuweni ni nzala, pamwi nu lusala, pamwi we mweni, pamwi we chinthakwa, pamwi we mulwale, pamwi mu ng'anda ya vingololo, nga tutapyunjilizile wewe?' ⁴⁵ Ngapano alitolelela woliwo nu kuti, 'Nakawuzyenye nkhuwanena, chino mutachitizile wenga mu watichi waa, mutachitizile kwe nene.' ⁴⁶ Waa waliya mukusundwa kwa muyayaya, ukuwa awalungamane ku wumi wamuyayaya.''