¹ Apano Yesu avwanzile ku mawumba na ku wasambilizi wakwe. ² Weni atili, ''Awa kawalika na wa Farisi wikala pa chilimba chakwe Musa. ³ Achaleka chilichonsi chino wapatichizya mwemwe ukuti muwombe, mukuwomba ivinthunye vyovyo nu kuvikonkhelezya. ⁴ Molimo, wakanyepa iviya iving'wame vino avitale ukunyamula, nga pano wakuviwika paviweya vya wanthu. Ukuwa weni awenecho wasisyembusya nanthi alusalala ukuti wavinyamule. ⁵ Wakuwomba imilimo yawo yonsi ukuti walolwe na wanthu. Amuno wakukuzya ivyola vyawo, swinya wakukuzya mumbali mwa vizwalo vyawo. ⁶ Wakunda amasyo ya papela pa masika swinya ivilimba ivya papela mu ma sinagogi, ⁷ ni ndamuchile ya muchinzi pa masyo yakukazizya, swinya ukuti wakwitwa 'Rabi' na wanthu. ⁸ Ukuwa mwemwe mutakwitwa 'Rabi,' amuno muli nu musambilizya wenga, swinya mwensi mwe wanyina. ⁹ Swinya mutakite nanthi wumwi umunthu munsi Tata, amuno muli nu Tata wenganye, swinya ali mwiyulu. ¹⁰ Namwenye mutakitwe 'musambilizya,' amuno muli nu musambilizya wenganye, e Kristu. ¹¹ Ukuwa weni wino amukule pakasi pinu aliwa a muwomvi winu. ¹² Wensi wino akuyikuzya ali alichefya, swinya wensi wino ukuyichefya wenga ali kuzwa. ¹³ Ukuwa akalanda kwe mwemwe, awakawalika na wa Farisi, wakachenjezya! Mukwiyala uwufumu wa mwiyulu ku wanthu. Amuno namwenye mwenga musikwinjila, swinya mutakuzumilizya wawo wano wali mupipi ukwinjila ukuti winjile. ¹⁴ Akalanda kwe mwemwe mwe kawalika na wa Farisi, wakachenjezya! Amuno mukulila wamama awafwilwe mu ng'anda zyawo, swinya muno ukukopechezya mukupepa ipepo ilitali; achaleka mulipochela ukusundwa ukukulu. ¹⁵ Akalanda kwe mwemwe, wakawalika na wa Farisi, wakachenjezya! Amuno mukuya mwe sumbi na mumulundu ukuti mukufunkhule wumwi, nga pano wawa mufunkhule, mukumupanga ukuwa kawili ukuyana nu mwana wi lungu ndi vino mwemwe. ¹⁶ Akalanda kwe mwemwe, mwe nthonkho izya kukolelela, mwe wano mukati, 'Wensi wino akalapila pi tempeli, choo achavye. Ukuwa wensi wino akulipila pe golidi wa mwi tempeli, weni amunyepwe kwi layizyo lyakwe.' ¹⁷ Mwe nthonkho mwe vipuwa! Achani ichikulu, e golidi pamwi i tempeli lino likupanga ukuti e golidi awe amutele? ¹⁸ Swinya, 'Wensi wino akalapila pa ka vuwa, achavye. Kweni wensi wino akalapila pa chawila chino chili penepo, weni amunyepe kwi layano lyakwe.' ¹⁹ Mwe nthonkho zya wanthu! Achani ichikulu ukulusya, icha wila pamwi akavuwa kano kakupanga icha wila chiwe achitele? ²⁰ Achaleka, Weni wino akalapila pa kavuwa akalapila peneponye swinya pe chiliyonsi chino chili penepo. ²¹ Weyo wenga wino akalapila mwi tempile akalapila mwenemonye swinya na pe wenga wino akakwikala mwenemo. ²² Swinya weyo wenga wino akalapila mwiyulu akalapila ku ndulu yakwe Leza sinya pakwe weliwe wino akakwikala penepo. ²³ Akalanda kwe mwemwe, wakawalika na wa Farisi, wakachenjezya! Amuno mukafumya ichikumi pa tumphiya, nutunthwilo nutwa kununtchila, kweni mulesile sita kuwomba ivya masundo ivikulu -- ipanzyo nu wila ni suwilo. Ukuwa vyoo avyo mufwile nge muviwombile nanthi kuleka ivinji nanthi kuwombwa. ²⁴ Mwe nthonkho zya kukolela, mwemwe wano mukufumya inyenye kweni amumilula ingamila! ²⁵ Akalanda kwe mwemwe, wakawalika na wa Farisi, wakachenjezya! Amuno mukaswefya kunzi ku lupindi ni mbale, kweni mukasi mwizula nu wulamba ni chilumba. ²⁶ Mwe nthonkho zya wa Farisi! Swefyani tasi mukasi mu lupindi na mu mbale, alyakuti ivya kunzi navyonye viswepe. ²⁷ Akalanda kwe mwemwe, wakawalika swinya awa Farisi, wakachenjezya! Amuno muli ngati a nkhungwe yino yipasilwe iviswepu kunzi, zino kunzi zikaloleka inzima, kweni mukasi zyizula amafupa ya wanthu awafwe na vyonsi ivinyale. ²⁸ Avino chili na mwemwenye, namwenye kunzi mukuloleka mwe walungamane ku wanthu, ukuwa mukasi mwizula nu wukachenjezya nu wu suita amasundo. ²⁹ Akalanda kwe mwemwe, wakawalika na wa Farisi, wakachenjezya! Amuno mukuzenga inkhungwe zya watumwa nu kuyemvya inkhungwe izya walungamane. ³⁰ Mukuti, ''Ndi twikalanga mu manda aya wa tata witu, nge tutalinji nawo ponga pakwisa uwazi wa watumwa. ³¹ Achaleka mukusimichizya ukususya mwenga kuno mwe nkhwatwa ya wawo wano wakomile awatumwa. ³² Namwenye mukufisya chino wa tata winu wachisile. ³³ Mwe nzoka, mwe nkhwatwa za mphili, mulisamala wuluwuli ipanzyo lyilungu? ³⁴ Achaleka, lolani, nenji nkhutumila mwemwe awatumwa na wamano, na wakawalika. Wamwi mwe woliwo mulikoma nu kuwapamanthila, swinya wamwi muli wavwapula mu ma sinagogi yinu nu kuwasamazya ukufuma mu musumba ukuya ku musumba. ³⁵ Ichakukonkha achakuti pakwe mwemwe paliyiza uwazi wa wonsi awalungamane wuno mwisile pansi, ukufuma ke wazi wa mulungamane Abelo, ukufika ku wazi wakwe Zakariya umwana kwe Barachiya, wino mwakomile pakasi pa masyo amimichile na kavuwa. ³⁶ Nakawuzyenye nkuti kwe mwemwe, vyonsi ivinthu vyoo viliyiza pa nkhwatwa yoo. ³⁷ Yerusalemu, Yerusalemu, mwemwe wano mukukoma awatumwa nu kuponkhola wawo wano watumwa kwe mwemwe! akanga kano nalondanga ukuti mbunganike awana winu apaliponga, ndivino inkhoko yikuwunganika utwana twakwe muvyapa, ukuwa mutalondanga! ³⁸ Lolani, ing'anda yinu yasyala yenga. ³⁹ Amuno nenji nkhuwanena, mutalindola nene ukufuma nomba ukufika pano muliti, 'Amulotwe weni wino akwiza mwi zina lya Mfumu.'''