¹ ''Amuno u wufumu wa mwiyulu wuli ngati a mweni chalo wino akachelechelo ayilo mu kulonda awawomvi wa mu chalo chakwe cha vikomwa. ² Lyo wivwana na wa womvi ukufola e denari wonga pa wanda, atuma woliwo ukuya ku chalo. ³ Wizile waya swinya mwi ola lya chititatu nu kulola wanji awawomvi wasi nanthi chimwi icha kuwomba pa masyo ya kukazizya. ⁴ Kwe woliwo atili, ''Mwemwe namwenye, yanji ku chalo cha vikomwa, swinya yiliyonsi yino yili chete nandi imbape.' Achaleka wayile pa kuwomba. ⁵ Aya swinya mwi ola lya mutanda nga swinya mwi ola lya mufundikambali (9), nu kuchita wuliwonga. Nga ⁶ swinya mwi ola lyikumi na lyonga iyizile aya nu kuzana wanji watakuomba nanthi chimwi wimilizilevye. Atili kwe woliwo, 'Achani fwandi chino mutakuwomba nanthi chimwi awanda wonsi?' ⁷ Awati kwe weliwe, 'Umulandu pasi nanthi wumwi wino atupile umulimo.' Atili kwe woliwo, 'Namwenye yanji mu chalo cha vikomwa.' ⁸ Pano amanguzi yiza, umweni chalo atili kwe kalola, 'Yita awawomvi nga uwape imphiya zyawo, ukutalichila iwa wumalilo ukuya wano watalilichizile.' ⁹ ''Pano awawomvi wano watalisile intchito pi ola lyi kumi na lyonga, aliwensi apochelele e denari wonga. ¹⁰ Pano awawomvi wakutalichila wiza, welenganianga kuno wandi wapochelele imphiya izivule, ukuwa nawonye wapochezile e denari wonga aliwensi. ¹¹ Pano wapochezile imphiya zyawo, awayilizyania ivya mweni chalo. ¹² Awati, 'Awawomvi wa wumalilo wawomvile i ola lyonga, kweni wawapa imphiya iziyane na sweswe, sweswe swe wano twawombesya mu wanda woo swinya ni chilungula chonsi.' ¹³ ''Ukuwa umweni chalo atolelela nu kuti kwe wonga mwe woliwo, 'Chiuza, nenji nthawomvile nanthi chimwi ichiwipe kwe mwemwe. Wuzye tutivwine ukuti a denari wonga? ¹⁴ Sendani zino azyinu muwapita. Nenji nasola ukuti imphe awawomvi wawumalilo iziyane na mwemwe. ¹⁵ Wuzye nsi na maka ukuti imbombe muno nkhulondela ku vinthu vino avyane? Pamwi muli nuwuzuwa umulandu wa wila wane?' ¹⁶ Achaleka awawumalilo waliwa wakutalichila, swinya awakutalichila waliwa wawumalilo.'' Amuno awavule wakakwitwa, lelo awatichi wakusolwa. ¹⁷ Pano Yesu wachilinji akuya ku Yerusalemu, wizile asenda ikumi na wawili pambali, nga pa nzila atili kwe woliwo, ¹⁸ ''Lolani, tukuya ku Yerusalemu, swinya u Mwana wa Munthu wandi alemekwe ku wa simapepo awakulu na wakawalika. Walipingula ukuti wamukome weliwe ¹⁹ swinya wali mulemeka ku Makandi ukuti wamukwelengule, ukusyempha, swinya ukupamanthila weliwe pa wuchingane. Ukuwa pa wanda wa chititatu alikatuswa.'' ²⁰ Ngapano e nyina wa wana wakwe Zebediya ayiza kwe Yesu na wakwe. Afukamila pa nkholelo yakwe Yesu nga alenga chimwi ukufuma kwe weliwe. ²¹ Yesu atili kwe weliwe, ''Wuzye ukuvwamba chani?'' Atili kwe Yesu, ''Upingule ukuti awana wane awalumendo wangikala, wonga kundilo yako swinya wonga ku kamani kwako, mu wufumu wako.'' ²² Ukuwa Yesu atolelela nu kuti, ''Utamanya chino ukulenga. Wuzye ungakwanisya ukung'wa e komeji wino indi mupipi ukung'wa? Awati kwe weliwe, ''Tungakwanisya.'' ²³ Atili kwe woliwo, ''Amolimonye e komeji wane muling'wa. Lelo ukuti mwikale ku ndilo na ku kamani kwane asa nene wino angawapa, kweni akwa wawo kwe wano kwasenganwa nu Baba wane.'' ²⁴ Pano awa sambilizi wanji ikumi wivwa choo, awafulwa na wanyina waa wawili. ²⁵ Lelo Yesu ayita woliwo ku kwakwe umwenecho nga atili, ''Mwamanya kuno wakatungulula wa Makandi wali na maka pakwe woliwo, swinya awanthu wawo awachindikwe wakawomvya amaka pakwe woliwo. ²⁶ Kweni chitakawe wowonye mwakwe mwemwe. Mu malo mwakwe, wensi wino akulondesya ukuwa amukulu mwakwe mwemwe afwile awe amuwomvi winu, ²⁷ swinya wensi wino akulondesya ukuwa wakutalichila mwakwe mwemwe afwile awe a muwomvi winu, ²⁸ ndivino u Mwana wa Munthu atizile ukutewetelwa, kweni ukuteweta, swinya ukupa uwumi wakwe ngati achilipo cha wavule.'' ²⁹ Lyo wakufuma mu Yeriko, iwumba ikulu alimukonkha weliwe. ³⁰ Kwalinji awanthu wanthonkho wawili wikazile pambali ni nzila. Pano wivwa ukuti Yesu akupita, wizile wapunda, ''Mfumu, Mwana wakwe Davidi, tufwile inkhumbu.'' ³¹ Iwumba aliwakalipila, ukuwanena ukuti wamyalale, ukuwa awapundisya ukulusya ni chongo ichikulu, ''Mfumu, Mwana wakwe Davidi, tufwile inkhumbu.'' ³² Ngapano Yesu ayimilila mya swinya ayita woliwo nga ati, ''Wuzye mukuvwamba nene imbachitile chani mwemwe?'' ³³ Awati kwe weliwe, ''Mfumu, ukuti aminso yitu yiyulwe.'' ³⁴ Ngapano Yesu, akulemwa ni chilanda, apalamansya aminso yawo. Paponapapo wapochezile ukulola kwawo nga wamukonkha weliwe.