¹ Pamphindinye yoyo, Herodi e kalola wivwile ivya Yesu. ² Weni watili ku wawomvi wakwe, ''Wee a Yohani kabatizya; weni akatusile ku wafwe. Achaleka amaka yaa yakuwomba mwakwe weliwe.'' ³ Amuno Herodi walemile Yohani, anyepa weliwe, nu kumuwika mu vingololo umulandu e Herodiyasi, umuka Filipi umunyina wakwe. ⁴ Amuno Yohani atili kwe weliwe, '''Asa lisundo ukuti wewe umutwale.'' ⁵ Herodi nge wamukomile, ukuwa watinanga awanthu, umulandu wamulolanga weliwe ngati amutumwa. ⁶ Ukuwa pano uwanda wakukwatwa uwa kwe Herodi wafisile, umwana umwanachi wakwe Herodiyasi awachina mu luwungo nu kumusechelezya Herodi. ⁷ Achaleka, weni walayizizye ni chilapo ukuti alipa weliwe chilichonsi angalonda. ⁸ Lyo wasambilizwa nu nyina, weni atili, ''Mpani paa, pa mbale, umutwe wakwe Yohani e Kabatizya.'' ⁹ Imfumu yafulizwe nkhaninye nu kulenga kwakwe, kweni umulandu wi layizyo lyakwe swinya umulandu wakwe wonsi wano walinji pa chakulya na weliwe, weni walamula ukuti chichitwe. ¹⁰ Weni watumile nu kuputula umutwe wakwe Yohani mu vingololo. ¹¹ Ngapano umutwe wakwe walesilwe mu mbale nu kupwa kwe mukazyana nga weni awusendela kwe nyina. ¹² Apano awasambilizi wakwe awiza, awasenda ichala, nu kuchizika. Ala choo chapita, awaya nu kumunena Yesu. ¹³ Nomba pano Yesu wivwile choo, weni afunthusile ukufuma kulyanye mwi wato ukuya masyo yano yalinji ukutali na wanthu. Pano amawumba yivwa choo, ayamukonkha ulwa pansi ukufuma mu misumba. ¹⁴ Apano Yesu wizile paminso yawo nu kulola iwumba ikulu. Weni walinji nu luse pakwe woliwo nga wapozizye awalwale wawo. ¹⁵ Pano amanguzi yafisile, awasambilizi wakwe awiza kwe weliwe nu kuti, ''Paa amasyo yano yali ukutali nu twaya, swinya uwanda wasila kali. Yanene amawumba yapite, alyakuti wangaya mutwaya nu kuyikalila ichakulya.'' ¹⁶ Ukuwa Yesu atili kwe woliwo, ''Watakulondeka ukuti wapite. ¹⁷ Mwemwe mupe woliwo chimwi ukuti walye.'' Awati kwe weliwe, ''Sweswe paa tuli mikate yisano ninswi ziwili.'' ¹⁸ Yesu atili, ''Viletani kwe nene.'' ¹⁹ Apano Yesu alamula iwumba ukuti lyikale pansi pisote. Weni asenda imikate yisano ni nswi ziwili. Apunamila mwiyulu, weni avipepa nu kumonthola imikate nu kupa awasambilizi, nga awasambilizi awapa kwi wumba. ²⁰ Awalya wonsinye swinya awikuta. Ngapano awasenda vino vyasazyile ivongonyo ya vyakulya -- ivise ikumi na viwili ukwizula. ²¹ Wawo wano walile walinji papipi ni myanda ikumi na yisano awonsi, nanthi kusanzya awanachi na wana. ²² Paponapapo aleka awasambilizi winjile mu wato nu kuya ukukolelela weliwe ku mbali yinji, pano weni atumanga iwumba ukuti liwele. ²³ Ala awezya amawumba, weni wayile wenganye pa mwamba mukupepa. Ngapano amanguzi yafika, weni walinji kulyanye wenga. ²⁴ Ukuwa iwato nomba lyalinji ukutali nu mulundu, amuno lyatela lyafunthuka na minzi, amuno umuza waputanga woliwo. ²⁵ Pi ola lya chini uwusiku Yesu apalamila kwe woliwo, akupita paminzi. ²⁶ Pano awasambilizi waweni weliwe akupita pa minzi, awayilizyania nga awati, ''Choo achiwa.'' nga awapunda muno nthete. ²⁷ Ukuwa Yesu avwanga kwe woliwo palyanye nu kuti, ''Muwajimba anene! Mutakati mwatina.'' ²⁸ Peturo atolelela kwe weliwe nu kuti, ''Mfumu, ndi awewe, mphatichizya ukuti nize kwe wewe pa minzi.'' ²⁹ Yesu atili, '''zanga.'' Achaleka Peturo wafumile mu wato nu kupita pa minzi ukuya kwe Yesu. ³⁰ Ukuwa pano Peturo waweni umuza, weni wizile watina. Nga weni watalisile kusiwila, weni wapundile nu kuti, ''Mfumu, nthula!'' ³¹ Yesu paponapapo ayololosya ikasa lyakwe, alema Peturo, nga atili kwe weliwe, ''We wisuwilo itichi, achani chino ukuvwilika?'' ³² Ngapano Yesu nu Peturo waya winjila mu wato, umuza wizile waleka ukuputa. ³³ Apano awasambilizi mu wato awamutumphula Yesu nu kuti, ''Nakawuzyenye wewe we Mwana wakwe Leza.'' ³⁴ Pano wizile walamba, awiza kunsi ya Genisareti. ³⁵ Pano awonsi wa masyo yalyanye wamumanya Yesu, awatuma inthumi kulikonsi ukuliwilila amasyo yalyanye, swinya awaleta kwe weliwe aliwensi wino walinji amulwale. ³⁶ Awalenga weliwe kuno wangalemavye mu mbali ya vizwalo vyakwe, nga wonsi wano walemile chenecho awapola.