¹ Pansizi pa vinthunye vyoo Yesu wayilolesizye swinya kuwa sambilizi pa sumbi wa Tiberiyasi. Vyoo avino wayilolesizye: ² Simoni Peturo walinji ponga ne Tomasi wino witwanga Didimu, Nataniyele uwa ku Kana mu Galileya, awana wakwe Zebediya, swinya wawili awanji awasambilizi wakwe Yesu. ³ Simoni Peturo atili kwe woliwo, ''Naya pakuvwima inswi.'' Awati kwe weliwe, Naswenye, twandi tukukonkhe.'' Awapita nu kyinjila mu wato, kweni watalemile nanthi yimwi uwusiku wonsi. ⁴ Nomba, pano kwachinji akatondotondo, Yesu wimilile mumbali mwe sumbi, ukuwa awasambilizi watamanyile ukuti we Yesu. ⁵ Achaleka Yesu atili kwe woliwo, ''Walumendo, wuzye muli nachimwi ichakulya?'' Awatolelela kwe weliwe, ''Awe.'' ⁶ Weni ati kwe woliwo, ''Sumbilani amakonde yinu ku ndilo iya wato, apo mwandi muzane zimwi.'' Apo wasumbila amakonde yawo nga wapotwa nukunyunthila mwenemo umulandu mphendwa iyikulu ya nswi. ⁷ Apano umusambilizi wino Yesu wakunzile ati kwe Peturo, ''Amfumu." Ngapano Simoni Peturo wivwa kuno yalinji a Mfumu, wizile wanyepa ichizwalo chakwe icha kunzi (amuno walinji ichitali), nga ayisumbila mwe sumbi. ⁸ Wanji awasambilizi awiza mu wato (amuno watalinji ukutali ninsi, kupipi inthampulo imyandi yiwili), swinya wanyunthanga ikonde lino lizwile ninsi. ⁹ Ngapano wafika pamulundu, awalola umulilo wa malasha ninswi zili penepo, ni nsima. ¹⁰ Yesu atili kwe woliwo, ''Letani zimwi inswi zino mwalema nomba. ¹¹ Ngapano Simoni Peturo aya swinya akwema uwukonde ukwiza pamulundu, uwizule ninswi nkhulu, zyalinji 153, chingatenga zyalinji amvule, uwukonde nanthi kulepuka. ¹² Yesu atili kwe woliwo, ''Zanji mulye ichakulya cha mutondotondo.'' Patalinji nanthi wumwi umusambilizi wino welezizye ukukolowozya weliwe, ''Wuzye we weni?'' Wamanyilenye kuno a Mfumu. ¹³ Yesu wiza, wasenda insima nu kuwapa, swinya ninswi nayonye. ¹⁴ Yoo yalinji a mphindi ya chitatu ukuti Yesu ayilanjizye kuwa sambilizi wake ukufuma pano wazyulupusile ku wafwe. ¹⁵ Awala walya ichakulya cha mutondotondo, Yesu atili kwe Simoni Peturo, '' Simoni mwana kwe Yohani, wuzye wankhunda ukulusya waa?'' Peturo atili kwe weliwe, ''Eta Mfumu, umanyile kuno nakukunda.'' Yesu ati kwe weliwe, ''Zuwila ing'onzi zyane.'' ¹⁶ Weni watili kwe weliwe swinya aka chitiwili, ''Simoni mwana kwe Yohani, wuzye wankhunda?'' Peturo atili kwe weliwe, ''Eta Mfumu, umanyile kuno nakukunda.'' Yesu atili kwe weliwe, ''Sunjilila ing'onzi zyane.'' ¹⁷ Weni watili kwe weliwe imphindi yachitatu, ''Simoni mwana kwe Yohani, wuzye wankhunda?'' Peturo awa na malanda umulandu Yesu watili kwe weliwe imphindi yachitatu, ''Wuzye wankhunda nene?'' Weni atili kwe weliwe, ''Mfumu, Umanyile vyonsi ivinthu, umanyile kuno nakunda wewe.'' Yesu atili kwe weliwe, ''Zuwila in'gonzi zyane. ¹⁸ Awenche, awenche, nkhuwanena, pno walinji we mutichi, wayizwikanga wenga nu kupita konsi kuno ukulonda, ala pano wakota, uliwayololosya amakasa yako, swinya wunji aliwakuzwika nu kukutwala kuno wewe utakulonda ukuya.'' ¹⁹ Nomba Yesu wavwanzile choo ukuti alanjizye umusango wamfwa Peturo alichindamichila Leza. Pano walanzile choo, weni atili kwe Peturo, ''Konkha nene.'' ²⁰ Peturo apetuka kunsizi nu kulola umusambilizi wino Yesu wakunzile akukonkha woliwo, wulyanye wino weyamizile Yesu pachakulya swinya wino watili, ''Mfumu, wuzye wewenu wino alikukazya?'' ²¹ Peturo wamuweni nga pano atili kwe Yesu, ''Mfumu, wandi achite chani umunthu wee?'' ²² Yesu atili kwe weliwe, ''Ndi nkhulonda awepo nukufika pano ndinyoka, chingati wuli kwe wewe? Konkha nene.'' ²³ Achaleka amazwinye yaa yasata pakasi pa wanyina, kuno umusambilizinye weyo atalifwa. Ukuwa Yesu atatili kwe Peturo kuno wunji umusambilizi atalifwa, kweni, ''Ndi nkhulonda wenji awepo nsuke nyoke, chingati wuli kwe wewe?'' ²⁴ Wee amusambilizi wino akusimichila ivya vinthunye vyoo swinya awino wawalisile ivinthunye vyoo, swinya tumanyile kuno ukusimichila kwakwe achisinkha. ²⁵ Kuli ivinthu vinji ivivule vino Yesu wawomvile. Ndi chili chonsi chawalisilwe chonga chonga, nkhwelengania ukuti ninsi iyenecho yitangandi yisunge awa kalata wano wangawalikwa.