¹ Nomba akachelochelo pa wanda wakutalika uwa sabata, pano kwachilinji imfizi, Mariya Magadaleni wiza ku nkhungwe nu kulola iliwe lifumizwe ku nkhungwe. ² Achaleka weni asamala nu kwiza kwe Simoni Peturo na kumusambilizi wunji wino Yesu akunda, nga atili kwe woliwo, ''Wayifumizye i Mfumu ukufuma mu nkhungwe lelo tutamanyile akwinye kuno wamusunzile weliwe.'' ³ Apano Peturo nu musambilizi wunji waya kunzi, nga awaya ku nkhungwe. ⁴ Wonsi wawili awasamala ponga, nga umusambilizi wunji asamala wangu ukukolela Peturo nu kufika pankhungwe umwakutalichila. ⁵ Apano akufukamila pansi, weni alola imyenda yili palyanye, kweni atinjizile mukasi. ⁶ Ngapano Simoni Peturo wafika pansizi pakwe weliwe nu kuya mukasi mu nkhungwe. Weni aweni imyenda yili palyanye ⁷ swinya umwenda wuno walinji ku mutwe wakwe. Wutalinji ponga nimyenda yinji kweni yalinji ayipeteke pa yenga. ⁸ Ngapano umusambilizi wunji, wenga wino atalichizile ukufika pa nkhungwe, nawenye aya mukasi, nga aweni nu kusuwila. ⁹ Amuno ukufichila pa mphindinye yoyo wachilinji ukumanya amawaliko yano yatinji weni alikatuswa ku wafwe. ¹⁰ Achaleka awasambilizi awanyochela swinya kukaya. ¹¹ Ukuwa Mariya wimilile kunzi kwa nkhungwe akulosya. Lyo akulosya, weni afukama pansi mu munkhungwe. ¹² Mariya aweni awangelo wawili mu vizwalo iviswepu wikazile, wenga ku mutwe, swinya wenga ku matamba kuno umuwili wakwe Yesu walambalisilwe. ¹³ Awati kwe weliwe, ''Mwanachi, ngafwandi ukulosezya chani?'' Weni ati kwe woliwo, ''Umulandu wasenda i Mfumu yane, nga nthamanyile kuno wayiwisile.'' ¹⁴ Pano Mariya alanda choo, apiliwuka umwakuliwilila nga alola Yesu ayimilizile palyanye, ukuwa atamanyile kuno alinji we Yesu. ¹⁵ Yesu atili kwe weliwe, ''Mwanachi, achani fwandi chino ukulosya? Weweni wino ukumulonda? Mariya ayelenginie kuno weni alinji a mulimi, achaleka atili kwe weliwe, ''Mukwayi, ndi mumufumizye, unene kuno mumuwisile, nga nandi imusende.'' ¹⁶ Yesu atili kwe weliwe, ''Mariya.'' Weni apiliwuka, nukuti kwe Yesu mu mvwango ya chi Aramayiki, ''Raboni'' (akuli kuti ''Musambilizya''). ¹⁷ Yesu atili kwe weliwe, ''Utakamphalamansye nene, amuno ntchili ukuya kwe Tata, ukuwa yanga ku wanyina wane nu kuti kwe woliwo kuno nenji ndiya kwe Tata wane nu Tata wako, swinya e Leza wane nu Leza wako.'' ¹⁸ Mariya Magadaleni ayiza nu kuwanena awasambilizya, ''Nenji njiweni i Mfumu,'' nukuti Yesu avwanzile ivinthunye vyoo kwe weliwe. ¹⁹ Pa manguzi ya wandanye wowo, uwanda wakutalichila mwe sabata, imilyango iyiyale kuno awasambilizi walinji pa kutina awa Yuda, Yesu ayiza nu kwimilila pakasi pakwe woliwo nu kuti kwe woliwo, ''Umutende kwe mwemwe.'' ²⁰ Pansizi yakuvwanga choo, weni alanjizya woliwo amakasa yakwe swinya ni mbali yakwe. Awasambilizi awawa ni chimwemwe pano waweni i Mfumu. ²¹ Yesu ati swinya kwe woliwo, ''Umutende kwe mwemwe, Ndivino e Tata watuma nene, naninye nkhutuma mwemwe.'' ²² Pano Yesu avwanzile choo, weni aputa pakwe woliwo nu kuti kwe woliwo, ''Pochelelani u Muzimu Mutele. ²³ Wensiwino amawembu yakwe mwatetela, yalitetelwa; wensiwino amawembu yakwe mwasunga, yaliwa amasunge.'' ²⁴ Tomasi, wenga uwa ikumi na wawili, uwakwitwa Didimasi, atalinji ponga na woliwo pano Yesu wiza. ²⁵ Awasambilizi wanji pansizi watili kwe weliwe, ''Tuyiweni i Mfumu.'' Weni atili kwe woliwo, ''Suka indole amakasa yakwe na mawamba ya misomali, swinya imbike inyowe zyane mumawamba ya misomali, swinya ukuwika ikasa lyane mu mbali yakwe, nenji nthalisuwila.'' ²⁶ Pansizi ya manda kananimonsi awasambilizi awawa swinya mukasi, ne Tomasi alinji nawo. Yesu wiza pano ivisakati vyalinji aviyale, nukwimilila pakasi pakwe woliwo, nga atili, ''Umutende kwe mwemwe.'' ²⁷ Ngapano atili kwe Tomasi, ''Fika paa nu lusalala nga ulole amakasa yane. Fika paa nikasa lyako nu kuliwika mu mbali yane. Utakawe we nthasuwila, kweni usuwile.'' ²⁸ Tomasi atolelela nu kuti kwe weliwe, ''Imfumu yane swinya e Leza wane.'' ²⁹ Yesu atili kwe weliwe, ''Umulandu wandola nene, wasuwila. Awalotwe a wawo wano wataweni, kweni wasuwizile. ³⁰ Lelo Yesu wawomvile ivilolwa ivivule pamonso ya wasambilizi wakwe, ivilolwa vino vitawalisilwe mwe kalata wee, ³¹ ukuwa vyoo viwalisilwe alyakuti mungasuwila kuno Yesu awili we Kristu, u Mwana wakwe Leza, swinya alyakuti pakusuwila, mungize muwe nu wumi mwi zina lyakwe.