¹ Ala Yesu avwanga ivinthu vyoo, apunamila aminso mwiyulu nu kuti, ''Tata, imphindi yafichila chindamika u Mwana alyakuti u Mwana alikuchindamika -- ² Ndivino wamupa amaka pa wanthu wonsi alyakuti ape uwumi wa muyayaya wonsi wano wamupa. ³ Woo awuli wumi wamuyayaya: Kuno wakumanye, wenganya Leza wachisinkha, na wino wamutuma, Yesu Kristu. ⁴ Nkhukuchindamika munsi ya pansi. Nene namala umulimo wuno wamphile ukuti mbombe. ⁵ Nomba, Tata, ntchindamika apaliponga nawewenye nu wuchindame wuno nalinji nawo na wewe pano insi yachili ukwelewulwa. ⁶ Nawumbula izina lyako ku wanthu wano wamphile ukufuma munsi. Walinji awako, uwampha, swinya awatonthela izwi lyako. ⁷ Nomba wamanya kuno ivinthu vyonsi vino wampha vikufuma kwe wewe, ⁸ amuno mbapile amazwi yonsi yano wampha. Awayapochela nu kumanya achisinkha kuno nafuma kwe wewe, nga wasuwila kuno wewe wanthuma. ⁹ Nkhuwapepela. Nthakupepela insi kweni wawo wano wampha, amuno awako. ¹⁰ Vyonsi vino indinavyo avyako na vyonsi vino ulinavyo avyane swinya nkhuchindamila mwenemo. ¹¹ Nene nthali munsi, kweni waa awanthu wali munsi, nga nene inkhwiza kwe wewe. Tata Mutele, wasunge mwi zina lyako lino wampha ilyakuti wawe awaliwonga, ndivino sweswe swe waliwonga. ¹² Pano nalinji nawo, nawasunganga mwi zina lyako, lino wampha. Nawachinjililanga swinya pasi nanthi wenga mwakwe woliwo wononesile, suka u mwana wa chononeko, alyakuti amawaliko yafiswe. ¹³ Nomba inkhwiza kwe wewe, kweni nkhuvwanga ivinthu vyoo munsi alyakuti waliwa ni chimwemwe chane ichikwanile mwe woliwo. ¹⁴ Nawapa izwi lyako, nga insi yawapata umulandu wai awa munsi, nivino naninye insi ne wa munsi. ¹⁵ Nthakulenga kuno wewe uwafumye munsi, kweni ukuti wewe uwawachinjilila kumuwipe. ¹⁶ Wasi awamunsi ndivino naninye asa wa munsi. ¹⁷ Wawike pambali ni chisinkha chako. izwi lyako achisinkha. ¹⁸ Ndivino wanthuma munsi, avyo nawatuma munsi. ¹⁹ Pa mulandu wakwe woliwo, nayiwika pambali, alyakuti nawonye wangawikwa pambali mu chisinkha. ²⁰ Nthakupepela woliwo wonga, kweni swinya naku wawo wano walisuwila mwakwe ukupitila mwizwi lyawo ²¹ alyakuti wonsinye wawe wonga, ndivino wewe, Tata, uli mwakwe nene, swinya nene mwakwe wewe. Lekani nawonye wawe mwakwe sweswe alyakuti insi yilisuwila kuno wanthuma. ²² Ukuchindama kuno wamphile, nawapa, alyakuti waliwa wongo, ndivino sweswe swe wonga: ²³ Nene mwakwe woliwo, swinya wewe mwakwe nene -- ukuti wanga letwa ku wuponga, alyakuti insi yilimanya kuno wanthuma, swinya kuno wawakunda ndivino wankhunda. ²⁴ Tata, nkhulonda wawo umphile wawe nani kuno indi, nu kolola ukuchindama kwane, uwuchindame wampha umulandu wankhunda kunsizi ya kulewulwa kwansi. ²⁵ Tata Mulungamane, insi yitakumanya, kweni nkhumanyile; swinya waa wamanya kuno wanthuma. ²⁶ Naleka izina lyako limanyikwe kwe woliwo, swinya ndileka limanyikwe alyakuti ulukundo luno wankhunzile nalo nene luwe mwakwe woliwo, nga nani ndiwa mwakwe woliwo.''