¹ ''Nawanena ivinthunye vyoo ukuti mutakize mupunuzwe. ² Waliwataya kunzi kwa ma sinagogi. Kweni i ola likwiza lino wensi wino akuwakoma aliyelengania ukuti ali pa mulimo wakwe Leza. ³ Walichita ivinthunye vyovyo umulandu watamumanyile e Tata nanthi anene. ⁴ Nawanena ivinthu vyoo ukuti pano i ola lyawo lyafika, muliyizuka kuno nawanenile ivya woliwo. Nthawanenile ivinthu vyoo pakutalichila, umulandu nalinji na mwemwe. ⁵ Kweni nomba nkhuya kwe wino watumile nene, lelo pasi nanthi wumwi uwa mwemwe wino akunkholowozya, ''Wuzye ukuya kwinye?'' ⁶ Kweni umulandu nawanena ivinthu vyoo, amalanda yizula mu myenzo yinu. ⁷ Kweni ichisinkhanye nkhuwanena, chingazipila mwemwe ukuti napita. Amuno ndi nthapisile, e kavwilizya ataliyiza kwe mwemwe, kweni ndi napita, ndimutuma kwe mwemwe. ⁸ Ndi wiza, e kavwilizya alisimichila insi ukuti yitamanyile ivya luwembu, ivya wulungamane, nivya wukupanzya -- ⁹ ivya luwembu, umulandu watasuwizile mwakwe nene; ¹⁰ ivya wulungamane, amuno nkhuya kwe Tata, swinya mutalitela mundole; ¹¹ nu wukapanzya, umulandu nankholelo wansi yoo wapanzwa kali. ¹² Ndi ni vinthu ivivule ivyakuwanena, lelo mutangandi muvivwichisye nomba. ¹³ Kweni pano weliwe, u Muzimu wa Chisinkha, wiza, alawakolelela mu chisinkha chonsi, amuno atalilanda ukufuma mwe weliwe. Kweni alilanda chonsi chino akwivwa, swinya aliwanena ivinthu vyo vikwiza. ¹⁴ Alintchindamika, umulandu alisenda ukufuma mwe vyo avyane nu kuwanena. ¹⁵ Ivinthu vyonsi vino Tata ali navyo avyane. Achaleka, natili u Muzimu alisenda ukufuma ku vyane nu kuwanena. ¹⁶ Pa kamphindi akafupi mutandi mundole, ndi papita akamphindi akafupi kanji mulindola.'' ¹⁷ Ngapano wamwi awasambilizi awavyanzyania, ''Wuzye achani choo chino akuvwanga kwe sweswe, 'Muka mphindi akafupi mutalindola swinya kanji akamphindi akafupi mulindola,' swinya, 'Umulandu nkhuya kwe Tata'?'' ¹⁸ Achaleka awati, ''Achani choo chino akuvwanga, 'Akamphindi akafupi'? Tutamanyile chino akuvwanga,'' ¹⁹ Yesu waweni ukuti wakulonda ukumuwuzichisya, nga ati kwe woliwo, ''Achoo chino mukuwuzichisyania, chino napilulanga pakuti, 'Mu kamphindi akafupi mutalindola, nga swinya mukamphindi akafupi mulindola'? ²⁰ Nakawuzyenye, nkhuwanena, mulilila nu kulosya, kweni insi yiliwa sechela. Muliyizula na malanda, kweni amalandanye yayo yalipiluka ichimwemwe. ²¹ Pano umwanachi akukwata akawa namalanda umulandi i ola lyafika, ala wapapa umwana, ayiwilila uwulumila wonsi umulandu wa chimwemwe chakwe ukuti umunthu wakwatwa munsi. ²² Avino muli namalanda nomba, ukuwa ndiwalola swinya, nu mwenzo wako wuliwa ni chimwemwe, swinya pasi nanthi wumwi wino alikwanisya ukuwapoka ichimwemwenye chocho. ²³ Pawandanye wowo mutalimbuzichisya nanthi chimwi. Nakawuzyenye, nkhuwanena, ndi mwalenga chilichonsi kwe Tata mwi zina lyane, aliwapa. ²⁴ Ukufika paa mutatela mulenge chilichonsi mwi zina lyane. Lengani mwandi mupochelele, ilyakuti ichimwemwe chinu chifiswe.'' ²⁵ Nawanena vyonsinye vyoo mu milumbe, ukuwa i ola likwiza pano nthaliwavwanzya mu milumbe, ukuwa ndiwanena apatiswe ivya Tata. ²⁶ Pawandanye wowo muli lenga mwizina lyane swinya nthakuti kwe mwemwe ndiwapepela kwe Tata, ²⁷ amuno e Tata umwenecho wawakunda umulandu mwankhunda nene nu mulandu musuwizile kuno nafuma kwe Tata. ²⁸ Nafuma kwe Tata, swinya njiza munsi. Kanonzi, nandi insye insi nkhuya kwe Tata. ²⁹ Awasambilizi wkwe watili, ''Lola, nomba ukuvwanga apatiswe swinya utakuwomvya imilumbe. ³⁰ Lelo tumanyile kuno umanyile vyonsi, swinya utakulonda nanthi wumwi akuwuzichisye ama wuzyo. Umulandu wa choo,tukusuwila kuno wafuma kwe Leza.'' ³¹ Yesu awatolelela, ''Mukusuwila nomba?'' ³² Lolani, i ola likwiza, swinya nakawuzyenye lyafika, pano mulisalangana, wensi ku ng'anda yakwe, swinya mulinsya nenga. Ukuwa nsi nenga umulandu e Tata ali nani. ³³ Nanena ivinthunye vyoo kwe mwemwe ilyakuti muwe numutende mwe nene. Munsi muli namayimba, kweni mujimbe, nachimvya insi.''