¹ Nenji nkhupa isundo lyoo paminso pakwe Leza nu Kristu Yesu, wino alipingula awumi na wafwe, swinya umulandu wa kuloleka kwakwe nu wufumu wakwe: ² Ulumbilile izwi; uyisenganie pano vili chete na pano visi chete. Ukalipe, ususye, ukomelezye, na konsi ukutonthela swinya ukusambilizya. ³ Amuno imphindi yili yiza pano awanthu watalijimba ni chisambilizyo ichiizima. Mu malo mwakwe, waliyiwunganikila awasambilizya awenecho ukuyana ni vya kukumbwa vyawo, wano wakuvyanga chino amakutwi yawo yakulonda ukwivwa. ⁴ Awalitontholola ukwivwa kwawo ukufuma ku chisinkha, swinya walitontholekela ku mivwango yavye. ⁵ Ukuwa wewe, uwe minso mu vinthu vyonsi. Uyimbe ni nthazi; uwombe umulimo wa muvangeli; ukwanisye umulimo wako. ⁶ Amuno nenji njipekinie ukuti imbe ne nzuwi. Imphindi ya wulendo wane yafika. ⁷ Nenji nalwa mu kuchimvya ukuzima; nafika pawumalilo; nenji nsunjizile isuwilo. ⁸ Imphumphu yane ya wulungamane yiwisilwe pambali muno nene, yino Imfumu, e kapingula umulungamane, alipa kwe nene pa wanda wulyanye, swinya asa kwe nene nenga, kweni swinya kwe wonsi wawo wano watemwizwe ukwiza kwakwe. ⁹ Womba muno ungawombela ukuti wize kwene wangu. ¹⁰ Amuno Demasi ansyile. Akukunda insi ya pansi iya nomba swinya ayile ku Tesalonika. Kireseni ayile ku Galatiya, nu Tito ayile ku Dalamatiya. ¹¹ Wenganye Luka awina ali na nene. Usenda Mariko nga uyize nawe umulandu awa kulondeka kwe nene mu mulimo. ¹² Tichikasi nenji namutumile ku Efeso. ¹³ Ichizwalo chino nachisyile pa Trowasi nu Kapasi, uyize nacho pano ukwiza, swinya ama kalata sanasana ivya kuwalikila penepo. ¹⁴ Alekizanda e kasyana alolesizye imilimo iyiwipe ukususya nene. Imfumu yilimulipa ukuyana ni milimo yakwe. ¹⁵ Wewe nawenye ufwile uchenjele na weliwe, umulandu wasusizye sana amazwi yitu. ¹⁶ Pakuyilondolola nenga ukwa kutalichila, nanthi wumwi alinji imbali yane. Mu malo mwakwe, aliwensi ansyile nene. Patakawe nanthi a mulandu pakwe woliwo. ¹⁷ Ukuwa Imfumu yimilizile pa mbali yane swinya yamphile amaka alyakuti, ukupitila mwe nene, ilandwe linga wizwa lyonsi, swinya ukuti a Makandi yonsi yivwe lyenelo. Swinya napususizwe ukufuma mumulomo wa nsama. ¹⁸ Imfumu yilipususya nene ukufuma ku milimo iyiwipe yonsi swinya yilitula nene muno uwufumu wakwe uwa mwiyulu. Kwe weliwe kuwe uwuchindame pe na pe. Ameni. ¹⁹ Ulamuke Prisila, Akwila,na wa mung'anda ya Onesiforasi. ²⁰ Erasitasi achili ali mu Kolinthi, kweni Trofimasi namusyile amulwale ku Miletasi. ²¹ Uyelezye ukuti wize pano kuchili ukutalala. Yubulasi akukulamuka, swinya ne Pudeni, Linasi, Kulodiya, na wonsi awanyina. ²² Imfumu yiwe nu mupasi wako. Uwila wuwe na wewe.