¹ Tumanyile kuno ndi ichakwikalamo icha munsi moo chino tukwikalamo chamongolwa, tuli ni ng'anda ukufuma kakwe Leza. Ang'anda yino yitazengwa namakasa ya munthu, kweni ing'anda yamuyayaya, mwiyulu. ² Amuno mumusakasa woo tukulweta, tukwiluchila ukuti tuzwikwe ni ng'anda yitu ya mwiyulu. ³ Tukwiluchila choo umulandu pakuchizwala choo tutalizanwa chinthakwa. ⁴ Amuno nakawuzyenye pano tuchili tuli mu musakasa woo, tukulweta, po tung'wamizilwe. Tutakulonda ukuti tuwe awazulwe. Mumalo mwakwe, tukulonda tuwe awazyike, alyakuti chino chikafwa chimilulwe nu wumi. ⁵ Weyo wenga wino watusenginie ku chinthunye choo we Leza, wino watupile u Muzimu ngati achikole chakwe chino chandi chize. ⁶ Akulikuti muwe wakuyiwomya mumwenzo penye. Mumanye kuno pano tuchili tuli pa kaya mu muwili, tuli apatali nu Leza. ⁷ Amuno tukapita mwi suwilo asa mwa milolechele. ⁸ Akulikuti tuli nu kuyiwomya mu myenzo. Chingawa ichete tuwe ukutali nu muwili kweni tuwe pakaya ni Mfumu. ⁹ Achaleka tukuchipanga chiwe chakukwanisya chitu, ndi tungawa pa kaya pamwi ukutali, ukusechelesya weliwe. ¹⁰ Amuno swensi tufwile tuloleche paminso ya chilimba cha kupanzya ichakwe Kristu, alyakuti aliwensi anga pochelela chino icha kuyana ku vinthu vyo wawombanga mu muwili, ndi ku vizima pamwi iviwipe. ¹¹ Akulikuti, ukumaya u kutina kwakwe Mfumu, tukukopelezya awanthu. Vino tuli tukuloleka ichete sana nu Leza, swinya nkhuchetekela kuno chili chetenye mu nthwitwi zinu. ¹² Tutakwelezya ukuwakopa swinya ukuti mutulole ngati swe wachisinkha. Kweni, tukuwapa ichakuti muyitumve amuno sweswe, alyakuti mwemwe mungawa nu wasuko ilya wawo wano wakuyitumvya ni milolechele kweni asa chino chili mu mwenzo. ¹³ Amuno ndi twafuma mu melenganio yitu, amulandu wakwe Leza; swinya ndi twafuma mu melenganio ayazima, amulandu wakwe mwemwe. ¹⁴ Amuno ulukundo lwakwe Kristu kukutupatichizya, umulandu tuli ni chisinkha pe choo: Kuno umunthu wenga wafwila wonsi, swinya kuno akulikuti wonsi wafwile. ¹⁵ Weni wafwizile wonsi, alyakuti wawo wano wali nu wumi watakatele wawe nu wumi pakwe woliwo wonga ukuwa kwakwe weliwe wino pa mulandu wawo wafwile swinya wazyulupuzilwe. ¹⁶ Pa mulundo woo, ukufuma nomba ukuya ku kunkholelo tusipanzya umunthu ukuyana ni milolele ya wanthu, napaponye twamulolanga Kristu mu nzila yoo. Kweni nomba tutakupanzya aliwensi mu nzila yoo swinya. ¹⁷ Akulikuti ndi wumwi ali mwe Kristu, weni achilewulwa chipya. Ivinthu ivya kali vyapita. loloni, viza vyawa vipya. ¹⁸ Vyonsi ivinthu vyoo vikufuma kwe Leza. Weni watunyosyezya sweswe kwe weliwe wenga ukupitila mwakwe Kristu wino watupile umulimo wakonyosezya. ¹⁹ Achakuti, mwakwe Kristu Leza akunyosezya insi kwe weliwe, nanthi kuwazya ukuchilania ukususya woliwo. Weni akutulemeka sweswe ilandwe lya kunyosezya. ²⁰ Achino twasontha ngati swe wimilizi wakwe Kristu, ngati vino Leza walambilizyanga ukupitila mwakwe sweswe. Tukulambilizya na mwemwe, pa mulandu wakwe Kristu: "Munyosezwe kwakwe Leza!'' ²¹ Wapezile Kristu ukuwa a nzuwi ya luwembu lwitu. Weni a wenga wino atatela awembuke. Wawomvile choo alyakuti tungize tuwe uwulungamane wakwe Leza mwakwe weliwe.