¹ Nene, Pauli, nenenye nkhuyilizyania kwe mwemwe, mu kuyichefya nu wunthu wakwe Kristu. Nenji ne mutonthe pano indi pa minso yinu, ukuwa ne wakujimba kwe mwemwe pano indi ukutali. ² Cho nkhuwalenga achoo, pano nene indi namwe, nthalilondeka ukuti imbe wakujimba nu kuyisuwila. Ukuwa ndilondeka ukuti imbe wakujimba pano nkhususya wawo wano wakwelengania ngati tukwikala ukuyana nu muwili. ³ Amuno napano tukupita mu muwili, tusilwa ukuyana nu muwili. ⁴ Amuno ivilwilo tukulwila asa vya ku muwili. Mu malo mwakwe, avya maka ya mwiyulu ya komongolania amawe amazenge. Vikamazya imipanzi yakusovya. ⁵ Tukamongolania swinya chilichonsi ichinthu cha mupela vino vikukatuka ukususya ukumanya kwakwe Leza. Sweswe tukusenda yaliyonsi amelenganio yanyepwe mu kutonthela Kristu. ⁶ Swinya tukuyipekania ukuti tupanike yiliyonsi imilimo iya sita kutonthela, napaponapapo ukutonthela kwinu kwafikapo. ⁷ Lolani pakwe chino chikuloleka ichete pa nkholelo yakwe mwemwe. Ndi wumwi asimichila kuno awa kwakwe Kristu, naswenye swe wakwe. ⁸ Amuno naponye nenji nkhuyitumvya ukuchila ivya nsambu zyitu, zino i Mfumu yapa ukuti sweswe tuwazenge kweni tutakonone mwemwe, nenji nthandi insozwe insoni. ⁹ Nenji nthakulonda indoleke ngati nenji nkhuwatinia na makalata yane. ¹⁰ Amuno awanthu wamwi wakuti, ''Wakalata wakwe awa kusimichizya swinya wamaka, ukuwa kumuwili weni amutonthe. Amazwi yakwe yatakuyana ukuti tungayateyelezya.'' ¹¹ Lekani awanthu ngati waa wamanye kuno chino tuli mu mazwi ya mu wakala witu pano tusikweneko acho tuliwa mu milimo yitu pano tuli koko. ¹² Tutakutwalilila ukuyipawula swenga pamwi ukuyikolania swenga na wawo wano wakuyitumvya wenga. Ukuwa pano wakuyipima awenecho na wenga nu muwuye swinya ukuyikolania awenecho wenga nu muwuye, wata nanthi akuwumbulika. ¹³ Sweswe, ukuwa, tutaliyikuzya ukulusya. Ukuwa tuliwomba wowonye penga pakuyana na chino Leza apile kwe sweswe, ukuyana kuno kukufika ukutali ngati mwemwe. ¹⁴ Amuno tutayonjelezizye swenga pano twawazanile mwemwe. Sweswe twalinji awakutalichila ukufika ukutali ngati mwemwe ni landwe zima lyakwe Kristu. ¹⁵ Tutayikuzizye umwa kulusya ivya milimo ya wanji. Ukuwa, ukuchetekela kwitu akuli kutu isuwilo lyinu litwalilile ukukula, imilimo yitu pakasi pakwe mwemwe yilikula yilusye. ¹⁶ Tukuchetekela pakwe choo, alyakuti tungalumbilila ilandwe zima na muviputulwanye ukutali na mwemwe. Sweswe tutaliyitumvya ivya milimo yikuwombwa mu masyo ya wunji. ¹⁷ ''Ukuwa lekani wenga wino akuyikuzya, ayikuzye mwakwe Mfumu.'' ¹⁸ Amuno asa wenga wino akuyizumilizya wenga wino akuzumilizwa. Ukuwa a wenga wino i Mfumu yikuzumilizya.