¹ Mu nzila yoo, mwemwe wano mwe wanachi muwatonthela awalume winu. Muchite choo napano awonsi wamwi wasitonthela kwi zwi, wangiza kumbali yinu nanthi alizwi, ukupitila mu myikalile ya wachi. ² Amuno waliwa ukuti waweni imyikalile yinu ya chisinkha nu muchinzi. ³ Choo mutakaleke chichitike ni vya kuzifya ivya kunzi ngati imuluchile ya nywele, ivyakuyizifya ivya golidi, pamwi nivizwalo ivizima. ⁴ Mu malo mwakwe, muleke chichitike nu munthu wa mukasi uwa mu mwenzo, mu wuzima wakuyisya swinya umupasi uwumyalale, wuno awuzima pa minso yakwe Leza. ⁵ Amuno choo achino awanachi awatete awa kali wano wachetekelanga mwakwe Leza wazwalilanga, pa kutonthela ku walume wawo. ⁶ Mu nzila yonyeyoo Sara atonthelanga Abrahamu nga amwita weliwe imfumu yakwe. Nomba mwemwe mwe wana wakwe Sara ndi mukuwomba chino achizima swinya ndi mutali ni nthete ni nthazi. ⁷ Mu nzila yiliyonga, mwemwe mwe walume muwayikala na wachi winu ukuyana naku kwivwisya, ngati a chiya ichipepuke ichifoke, umwanachi. Mwemwe mupe woliwo umuchinzi nga mwe mpyani ponga mu wila wa wulanzi. Muwombe choo alyakuti ama pepo yinu yatize yachinjilizwe. ⁸ Pa wumalilo, mwensi mwemwe, muwe nu mwenzo wonga, awa nkhumbu, awa lukundo ngati mwe wanyina, myenzo iyitonthe, swinya awa kuyisya. ⁹ Mutakanyosye ichiwipe ku chiwipe pamwi inthusi ku nthusi. Umwakulesania, mutwalilile ukulota, umulandu muno choo mwemwe mwisilwe, ukuti mungapyana ichilotwa. ¹⁰ ''Wonga wino akulonda ukuti akunde uwulanzi swinya ukulola amanda ayazima alesye ululimi lwakwe ku viwipe ni milomo yakwe ku kuvwanga uwufi. ¹¹ Muleke weliwe anyoke ukufuma ku vino aviwipe nga awombe vino avizima. Muleke weliwe avwambe umutende swinya awukonkhelezye. ¹² Aminso ya Mfumu yakulola awa lungamane, swinya amakutwi yakwe yakwivwa ivya kulenga vyawo. Kweni paminso pakwe Mfumu pakususya wawo wano wakuwomba iviwipe.'' ¹³ Wuzye weweni wino alichisa wewe ndi ukulondesya ukuwomba vino a vizima? ¹⁴ Lelo ndi ukuyimba umulandu wa wulungamane, wewe we mulotwa. Utakatine chino wakutina. Utakati uyimbe. ¹⁵ Mu malo mwakwe, muwike pambali Yesu Kristu mu myenzo yinu ngati amutele. Musenganie penye ukupindula aliwensi wino akuwuzya ivya ichetekelo lino muli nalyo. Muwombe choo nu wumyalale nu muchinzi. ¹⁶ Muwe na melenganizye iyizima alyakuti awanthu wano wakutuka uwulanzi winu uwuzima mwakwe Kristu wangawa ni nsoni umulandu wakuvyanga ukususya mwemwe ngati mwalinji mwe wawomba iviwipe. ¹⁷ Achizima, ndi Leza akulonda, ukuti muchule muno ukuwomba ivizima ukulusya muno ukuwomba iviwipe. ¹⁸ Kristu nawenye ayimvile muno amawembuko. Weyo wino a mulungamane ayimvile muno sweswe, wano twalinji swe wanthalungamana, alyakuti alete sweswe kwe Leza. Yesu wamukomile mu muwili, kweni ayiza awikwa mulanzi nu Mupasi. ¹⁹ Nu Mupasi, Yesu ayile nu kulumbilila ku mipasi wano nomba wali muvingololo. ²⁰ Walinji nanthi kutonthela pano ukutechelela kwakwe Leza kwalindililanga mu manda yakwe Nowa, mu manda ya kuzenga ingalawa, nga Leza apusuzile awanthu awatichivye--imyoyo kananimonsi(8)--ukuwomvya aminzi. ²¹ Choo achilolesyo cha kubatizya kuno kukupususya mwemwe nomba--asa kusamvya uwunyale ukufuma ku muwili, kweni ngati a lyasuko lya melenganizye ayazima kwe Leza--ukupitila ku kuzyulupukwa kwa Yesu Kristu. ²² Kristu ali kwi kasa lya ndilo ilya kwe Leza. Aya mwiyulu. Awangelo, awansambu, na wamaka wafwile watonthele kwe weliwe.