¹ Swinya nene, wanawitu, nthanga mvwange kwe mwemwe ngati a kuwanthu awa wuzimu, ukuwa mu malo mwakwe ngati a kuwanthu wano wali kumuwili, ngati a ku twana ututichi mwakwe Kristu. ² Nene nawalyesizye umukaka, asa chakulya ichiwome, amuno mutayisengania ukuti mungalya chenecho; swinya na nombanye muchili ukuyisengania. ³ Amuno muchili muli ku muwili. Amuno kuno uwuzuwa ni mphokoto zikuzanwa pakasi pinu, wuzye mutakwikala ukuyana nu muwili, swinya mutakupita ukuyana ni chipimo cha wanthu? ⁴ Amuno pano wonga akuti, ''Nene nkhukonkha Pauli,'' swinya wunji akuti, ''Nene nkhukonkha Apolosi.'' mutawa mwe wanthu awavenye? ⁵ Wuzye Apolosi weweni fwandi? Wuzye Pauli weweni fwandi? Awawomvi mwakwe wano mwemwe mwasuwizile, kwakwe aliwensi wino Leza apile umilimo. ⁶ Nenji nakomela nga Apolosi ayitila aminzi, kweni Leza apile ukukula. ⁷ Achaleka nomba, asa weyo wino akakomela pamwi weyo wino akakwitilila akalondeka. ukuwa a Leza wino akupa ukukula. ⁸ Lelo weyo wino akukomela na weyo wino akwitilila a wonga, swinya wensi alipochelela amalipilo yakwe umwenecho ukuyana nu mulimo wakwe. ⁹ Amuno swe wawomvi apaliponga nu Leza. Mwemwe mwe chalo chakwe Leza, ichizengwa chakwe Leza. ¹⁰ Ukuyana nu wila wakwe Leza wuno wapilwe kwe nene ngati ne kazenga umumanyile, nene natalisile ulufula nga wunji azenga papela pakwe. Lelo lekani umunthu wensi achenjele muno akuzenga penepo. ¹¹ Amuno pasi nanthi wumwi wino angazenga ulufula lunji ukulusya luno lwazengwa kali, awili, Yesu Kristu. ¹² Nomba ndi wumwi akuzenga pa lufula nu golide, siliva, amawe ya ayazima, pa miti, pi sote pamwi pa mulemvwe, ¹³ umulimo wakwe wuliwumbilikwa, amuno uwuswepe wa musanya wuliwumbula vyenevyo. Amuno viliwumbukwa mu mulilo. U mulilo wuliyezya uwuwome wa chilichonsi chino aliwensi achiomvile. ¹⁴ Ndi umulimo wa wumwi wasimpha, alipochelela icha wila; ¹⁵ ukuwa ndi umulimo wa wumwi wapya, atalipindula, kweni umwenecho alitulwa, ndivino asamala ukufuma mu mulilo. ¹⁶ Wuzye mutamanya ukuti mwe tempeli yakwe Leza swinya ukuti umupasi wakwe Leza wuli mwakwe mwemwe? ¹⁷ Ndi wumwi akonona i tempeli lyakwe Leza, Leza aliyonona u munthunye weyo. Amuno i tempeli lyakwe Leza alitele, swinya namwenye acho mwawa. ¹⁸ Mutakaleke nanthi wonga ayiwipile. Ndi wumwi mwakwe mwemwe akwelengania ukuti ali na mano mu nkhulo yoo, lekani awe achipuwa alyakuti angize awe wa mano. ¹⁹ Amuno chawalikwa, ''Leza akalema awa mano mu wuchenjele wawo.'' ²⁰ Nga swinya, ''Imfumu yamanya kuno imelenganizwe ya wa mano a yavye.'' ²¹ Pa chifukwa choo, mutakaleke nanthi wonga uyitumvye mu wanthu. Vyonsi ivinthu a vyinu, ²² anagwa we Pauli, pamwi Apolosi, pamwi Kefasi, pamwi insi ya pansi, pamwi uwulanzi, pamwi imfwa, pamwi ivinthu vya nomba, pamwi ivinthu vyo vikwiza. Vyonsi ivinthu avyinu, ²³ na mwemwe mwe wakwe Kristu, nu Kristu a wakwe Leza.