¹ Nomba nkhuwizusya, wana witu, ivya ilandwe nawizizye kwe mwemwe, lino mwapochezile swinya pe lino mwimilila, ² swinya pe lino mukupokwa, ndi mwalemesya kwizwi lino nalumbilila kwe mwemwe, suka mwasuwizile pevye. ³ Amuno napa mwemwe ngati achakutalichila ichakulondeka chino naninye napochezile, kuno Kristu wafwile pamulandu wa luwembu lwitu ukulingana na mawaliko, ⁴ kuno wazisilwe, swinya kuno wakatusizwe pa wanda wa chititatu ukulingana na mawaliko. ⁵ Kristu walolesile kwe Kefasi, Ngapano swinya ku wikumi na wawili; ⁶ ngapano walolesile kuwavule ukuchila imyanda yisano awanyina pa mphindi yonga. Awavule mwakwe woliwo wachili wali nu wumi, kweni wamwi walazile. ⁷ Apano walolesile kwe Yacobi, ngapano kuwa positole. ⁸ Pakulechelezya vonsi, walolesile kwe nene, ndivino kwe wano wakwasilwe imphindi yichili. ⁹ Amuno nene ne mupelechezya ku wa positole. Inthayanine ukwitwa ne mu positole umulandu nayimvizye ichiwanza chakwe Leza. ¹⁰ Ukuwa mu wila wakwe Leza nenji ndi vino indi, swinya inkhumbu yakwe mwe nene yitalinji yavye. Mumalo mwakwe, nawomvile namaka ukulusya wonsinye. Lelo nthalinji anene, kweni inkhumbu yakwe Leza yino yili na nene. ¹¹ Akulikuti napano ningawa anene pamwi woliwo, amo tukulumbilila swinya amo mwasuwizile. ¹² Nomba ndi Kristu akuwizwa amukatuke ku wafwe, nga wangalanda wuliwuli wamwi mwakwe mwemwe ukuti kutawa ukuzyulupukwa ku wafwe? ¹³ Kweni ndi kutawa ukuzyulupuka kwa wafwe, akulikuti nu Kristunye atazulupusilwe; ¹⁴ swinya ndi Kristu atazulupusilwe, akulikuti ukulumbilila kwitu akwavye, ni suwilo lyinu nalyonye alyavye. ¹⁵ Ichinji, twazanwa ukuwa wakamboni wawufi kuvya kwe Leza, umulandu twasimichile kuno Leza wakatusizye Kristu ukufuma ku wafwe. Kweni weni atamuzyulupuzile, ndi amolimonye awafwe wasi katuswa. ¹⁶ Amuno ndi awafwe wasi katuswa, ne Kristu nawe atakatuswa; ¹⁷ swinya ndi Kristu atani akatuswe, isuwilo lyinu alyavwe swinya muchili muli mu luwembu lwinu. ¹⁸ Alyakuti wawo wano wafwile mwe Kristu nawonye wasovile watali zyulupuka. ¹⁹ Ndi mu wulanzi woo tukuchetekela mwe Kristu mphela, kuwanthu wonsi aswenga wano wakwivwisya amalanda. ²⁰ Ukuwa nomba Kristu, wino achikomwa chakutalichila ku wawo wano wafwa, wazulupusilwe ukufuma kawafwe. ²¹ Amuno vino imfwa yizizile ukupitila mu munthu, ukupitila mu munthu ukuzyulupuka kuwafwe nakonye kwizizila. ²² Amuno vino mwe Adamu wonsi wakufwa, achilichonganye mwe Kristu wonsi walipwa uwumi. ²³ Kweni wensi mu wutanthiko wakwe: Kristu, wino achikomwa chakutalichila, nga pano wawo wano awakwe Kristu walipwa uwumi pakwiza kwakwe. ²⁴ Ngapano kuliwa insilo, pano alilemeka uwufumu kwe Leza e Tata, pano alimazya konsi wulamulilo, na konsi ukupanzya na maka. ²⁵ Amuno afwile ukulamulila mpaka wawika awalwani wonsi pansi pa matamba yakwe. ²⁶ U mulwani wakupelechela ukuti ayononwe amfwa. ²⁷ Amuno ''weni awisile vyonsi pansi pamtamba yakwe.'' Kweni pano likuti, ''weni awisile vyonsi,'' chikuloleka ichetenye kuno choo chitakusanzya weyo wino awisile vyonsi umwakumwivwila pansi pe weliwe. ²⁸ Pano vyonsi ivinthu vikulamulilwa pansi pe weliwe, ngapano u Mwana umwenecho alilamulilwa pansi pe wenga wino akuwika ivinthu vyonsi mu wulamulilo pansi pe weliwe, ukuti Leza angawa vyonsi mu vyonsi. ²⁹ Pamwi swinya wuzye waliti wuli wawo wano wabatizwa ku wafwe? Ndi awafwe wasi katuswa nadi, ³⁰ wuzye achani lelo tuli umwa kutinia i ola lyonsi? ³¹ Inkhafwa chila wanda! Choo chili achisinkha ngati akuyitumvya kwane makwe mwemwe, kuno ndi nako mwakwe Kristu Yesu Imfumu yitu. ³² Wuzye nkhuzana chani , ukufuma kukalolechele ka wanthu, ndi nalwile ni vinyamana ku Efeso, ndi awafwe wasi katuswa? '''Tuyani tulye nu kung'wa, amuno mutondo tukufwa.'' ³³ Mutakatumphikwe: ''Ukuyisanzya na wawipe kukanyongania imiwele mizima.'' ³⁴ Nyokelani ku melenganie amazima! Yikalani muwulungamane! Mutakapitilizye ukuwembuka. Amuno mwewanji musinukumanya kwakwe Leza. Nkhulanda choo ku nsoni zyinu. ³⁵ Kweni wumwi aliti, ''Wuzye awafwe wakakatuswa wuli, swinya waliza na muwilichi?'' ³⁶ Mwe vipuwa nkhaninkhaninye! Chino mwakomela chitalimela suka chifwe. ³⁷ Chino mukakomela asa muwili wuno chiliwa, kweni ambeyu nthupu. Chingawa angano pamwi chimwi ichinji. ³⁸ Ukuwa Leza alichipa umuwili wuno weni wasola, swinya kumbeyu iyili yonsi umuwili wakwe wenga. ³⁹ Asa muwili wonsi awuli wonga. Mumalomwakwe, kuli umuwili wonga uwa wanthu, nu muwili wunji uwa vinyamana, nu muwili wunji uwa vinyunyi, nu wunji uwa nswi. ⁴⁰ Pali yinji imiwili yamwiyulu swinya miwili ya yamunsi. Ukuwa uwuchindame wa miwili ya mwiyulu yili nu musango wonga swinya uwuchindame muwili wa munsi awunji. ⁴¹ Kuli uwuchindame wonga uwilanzi, nu wuchindame wunji uwa mwezi, swinya uwuchindame wunji uwa uwanthanda. Amuno ulutanda longa lukapusana nu lunji ulutanda muwuchindame. ⁴² Avyo chawa mu kuzyulupuka kuwafwe. Chino chakomwa chikawola, swinya chino katuka chitanga chiwole. ⁴³ Chikukomwa mu musamu; chikukatuswa mu wuchindame. Chikukomwa mu wutonthe; chikukatuswa mu maka. ⁴⁴ Chikukomwa mu muwili uwa nyama; chikukatuswa mu muwili wa muzimu. Ndi kuli umuwili uwa nyama, kuli swinya umuwili uwa mu muzimu. ⁴⁵ alyakuti swinya kwawalikwa, ''Umunthu wakutalika Adamu wizile wawa awumi wawulanzi.'' Adamu wakupelechezya awa muzimu wakupa uwumi. ⁴⁶ Ukuwa icha muzimu chitizile pakutalichila kweni icha muwili nga pano icha muzimu. ⁴⁷ U munthu wakutalichila awa wa munsi, walewuzile ni tukumbu. U munthu wachiwili wafuma mwiyulu. ⁴⁸ Ngati vino wenga wafuma ku tukumbu ali, avyo chili na wawo wano awa kwi tukumbu, swinya ndivino u munthu wa mwiyulu ali, ndi muno swinya wali wawo wano awa mwiyulu. ⁴⁹ Ndivino sweswe tuli ni milolechele ya munthu wa kwi tukumbu, tuliwa ni milolechele iya munthu wa mwiyulu. ⁵⁰ Nomba choo nkhuti, wanawitu, kuno umuwili nu wazi vitanga vipyane uwufumu wakwe Leza. Chino chikuwola chitanga chipyane chino chisiwola. ⁵¹ Lola! Inkhuwanena inkhama yachisinkha: Tutalifwa swensi, kweni swensinye tulipilulwa. ⁵² Tulipililwa mu kamphindi, pakakapizyo ki linso, pinkhakang'ombe yakupelelechezya. Amuno inkhakang'ombe yililila, nga awafwe walikatuswa sita kuwola, swinya tulipilulwa. ⁵³ Amuno umuwili woo wuno wukuwola wufwile wuzwale chino chisiwola, nu muwili woo uwakufwa wuzwale wuno wutanga wufwe. ⁵⁴ Kweni pano umuwili wakuwola woo wazwala uwu sita kuwola, nga umuwili uwakufwa woo wazwala wuno wutanga wufwe, apano kuliyiza ukuvwanga kuno kwawalikwa, ''Imfwa yamilulwa mu kuchimvya.'' ⁵⁵ ''Wemfwa, kuli kwinya ukuchimvya kwako. Wemfwa, uluwolelwa lwako luli kwinje? ⁵⁶ Uluwolelwa lwa mfwa aluwembu, na maka ya luwembu alisundo. ⁵⁷ Ukuwa ukusalifya kuye kwe Leza, wino watupa ukuchimvya ukupitila mwe Mfumu yitu Yesu Kristu! ⁵⁸ Akulikuti, wanawitu wakundwe, simphisyani nanthi kusyembuka. Imphindi zyonsi mulandatile mu milimo yakwe Mfumu, umulandu mumanyile kuno imilimo yinu mwakwe Mfumu asa yavye.