¹ Ivya wupe ya muzimu, wanawitu, nenji nthakulonda mwemwe mutakamanye. ² Mwenji mwamanya kuno pano mwalinji mwe wakunzi, mwasovizwe ku makolania yano yatavwanganga, mu nzila zilizyonsi mwatunguluzizwe na woliwo. ³ Achaleka nenji nkhulonda mwemwe mumanye kuno pasi nanthi wenga wino ukupitila mu muzimu wakwe Leza angati, '''Yesu amutipwe'' Nanthi wenga angati, ''Yesu a Mfumu,'' kano ukupitila mu Muzimu Mutele. ⁴ Nomba kuli ivyawupe ivipusane, kweni u Umuzimu wuliwonga. ⁵ Kuli uwutumwi uwupusane, kweni i Mfumu yiliyonga; ⁶ swinya kuli imisango ya milimo iyipusane, kweni we Leza aliwenga wino akuwomba vyonsi mu yonsi. ⁷ Nomba kwe aliwensi kwapwa imilolechele ya kunzi iyakwe Muzimu ukuti wonsi wapindule. ⁸ Amuno kwe wenga kupilwe nu Muzimu izwi lya mano, na kwe wunji izwi lya kumanyisisya nu Muzimu wuliwonga. ⁹ Kwe wunji Kupilwe isuwilo nu Muzimu wuliwonga, na kwe wunji ivyawupe vya kupozya nu Muzimu wonga. ¹⁰ Kwe wunji kupilwe imilimo ya maka, na kwe wunji uwuneneli. Kwe wunji kupilwe amaka ya kupusania imizimu, kwe wunji indimi zya misango yakulekana, nga kwe wunji ukilulile ka ndimi. ¹¹ Vyonsinye vyoo a milimo ya wenga swinya aliwonga u Muzimu, ukupa ivyawupe kwe aliwensi pa wenga, ndimuno weni akusola. ¹² Amuno ndivino umuwili wuli wonga swinya wuli ni vizawalo ivivule nga ivizawalo vyonsi vya muwili wuliwonga, avyo chili nu Kristu. ¹³ Amuno nu Muzimu wonga swensinye twabatizwa mu muwili wonga, wangawa awa Yuda pamwi awa Griki, wangawa awanyepwe pamwi awasapulwe, nga wonsinye wapangwa ukung'wa u Muzimu wonga. ¹⁴ Amuno umuwili asa chizawalo chonga, kweni ivivule. ¹⁵ Ndi itamba likuti, ''Pakuti asa ne likasa, nenji asa ne chiputulwa cha muwili,'' asa chiputulwa chino chitakulondeka mu muwili. ¹⁶ Swinya ndi ikutwi likuti, ''Umulandu nenji asa ne linso, asa ne chiputulwa cha muwili. asa chiutulwa chino chitakulondeka. ¹⁷ Ndi umuwili wonsinye walinji alinso, chingawa pinye ichakupanjisya ukuti wivwe? Ndi umuwili wansinye walinji a likutwi, chingawa pinye ichakupanjisya ukununsya? ¹⁸ Ukuwa Leza wawatika ichiputulwa chilichonsi cha muwili ndi muno wavilondelanga. ¹⁹ Ndi vyalinji avizowalo vilivyonga vyonsinye, akwinye kuno nge umuwili walinji? ²⁰ Achaleka nomba a vizawalo ivivule kweni umuwili wonga. ²¹ Ilinso litangati kwi kasa, ''Nenji nthali nanti chimwi ichakulondela wewe.'' Nu mutwenye wutanga wuti ku matamba, ²² ''Nenji nthali nanthi chimwi ichakulondela wewe.'' Ukuwa ivizowalo vya muwili vino vikuloleka ukuwa avitonthe avyakulondeka, ²³ swinya iviputulwa vya muwili vino tukwelengania asa vya kuchindikwa, tukuvipa umuchinzi, swinya ni vizawalo vyitu vino tusilolesya vili nu muchinzi ukulusya. ²⁴ Nomba ivizawalo vyitu vino tukalolesya visilondeka ukuti tuvipe umuchinzi, amuno vili nawo kali umuchinzi. Kweni Leza alimbinkhinie vyonsi ivizawalo apaliponga, swinya apa umuchinzi uwukulu ku vyovyo vino vitalinji nawo. ²⁵ Weni wawomvile choo ukuti kutakawe ukupawunkhana mu muwili, kweni ukuti avyawi visunjililane chonga ni chiwuye mu lukundo longa. ²⁶ Achaleka pano Chonga chatamika, vyonsi ivyawi vikutamika ponga; pamwi pano ichawi chonga chachindikwa, vyonsi ivyawi vikuwa no chimwemwe ponga. ²⁷ Nomba mwemwe mwe muwili wakwe Kristu ni vyawi pavyeka. ²⁸ Nga Leza asola mu chiwanza ukutalichila awa positole, chitiwili awatumwa, chititatu awasambilizya, apano wawo wano wakuwomba imilimo ya maka, ngapano ichawupe chakupozya, wawo wano wakupa ukwavwilizya, wawo wano wakuwomba ivipanzo, na wawo wano wali ni ndimi zya luko nu luko. ²⁹ Wuzye wonsinye awa positole? Wuzye wonsinye awatumwa? Wuzye wonsinye awa sambilizya? Wuzye wonsinye wakuwomba imilimo ya maka? ³⁰ Wuzye wonsinye wali ni vyawupe vya kupozya? Wuzye wonsinye wakuvwanga ni ndimi? Wuzye wonsinye wakakwilula indimi? ³¹ Nu mwenzo wonsi muvwambe ivyawupe ivikulu. Ukuwa nenji ndisonthela mwemwe inzila inzima nkhaninye ukulusya.