Zɨ san ətyo əwo də ŋwwag cucug gu ku byyo ced ni dag. Nyî yog twoy dɨdam gu wu dag. Əyyan ənied ə byyo nwwag tsswo tuza ya kozaŋ kyaŋ ya ni, əyyaŋ ənied əwo byyo ŋyay ni, bə huhywo byo gwo ya. Yog ətyi ya kozaŋ kyaŋ ə yog jwway ətyo əwo ŋway ya ni dag. Yog ətyo əwo ŋway ya kozaŋ təŋkəy kyaŋ ni, ə yog fag əkum əka ə ya kwoyag ə ni əlyyad dag, shim dag Əgwaza ə san gu. Ŋwan ə nyan, ŋwan ə wo cyyaŋ shwod kwa əhwo əyin? Shwod gu ku bɨ yoŋ gu ku i shyyo tuza ətyo uli gu əkyo, ə wod Əgwaza byo tyog ə tyad gu. Nwad Əgwaza ənə cyyo gwo ə yoŋ. Əyyan ənied əni kyag nwam yyan i sswag əkum ka. Əyyan əbwo ə kyag na cəcərag. Yog konyan ə swan bɨ gag əkwo gwo nkyag dɨdam gu ni. Gu ətyo əwo cog nwam ku ni ə cog ku nwad Əgwaza, bə ətyo əwo ə sɨ ya ni, ə ya ku nwad Əgwaza, gwo nɨ ngway bə Əgwaza u. Gu ətyo əwo də əya ni dag, ə lag ya ku nwad Əgwaza kwo, gu mgbom sə gwo ə gway bə Əgwaza u. Bumi zɨ ka ə mbyyo ətyo əwo nyyo kyaŋ na bə əpyo guni dag. Də ba mbyyo ətyo əwo kwî bə əpyo gu ni dag. Nwad, kə zɨ shyyo əced, zɨ shyyo əced nwad Əgwaza, bə kə zɨ ma nkwi sə zɨ kwi dənian Əgwaza. Bə kə ənnyo kə zɨ shyyo ə ced ə kwo zɨ kwi, zɨ yed əshin Əgwaza byyo. I kwo mbyyo Kristi ə nhwu əsɨ bwo dərəg. Nwad, ngwo ə yed ətyo uli ənied kukwi bə ənied sɨced. Ŋwan, yag ə mbyyo a nfag əlyyad tuza nənyyug awû? Ŋwan bwo, yag ə mbyyo a njwway nənyyug awû? Səlləy zɨd zɨ ni yoŋ bə ncug fag əlyyad Əgwaza ji. Nwad, ə lyurug nyo, Ətyo Uli ə shyi nyo, kozaŋ əhwud kyo, kana təgbog ndyo, kozaŋ əlyem əna dyeb Əgwaza u bəd. Konyan bumi zɨ ka əna lyyad kəkəb nkyaŋ ənio gwo dam bɨ nyyo ni bunuŋ guka duyi Əgwaza. Nwad ənnyo, nyi yog fag əlyyad tuza əyyan dag. Də kunuŋ əkyo, nyi kyag ku bə ntsswo, ku yog yed kyaŋ tug tag bɨ shwod kwa nənyyug a dag. Ndyen nsɨ nwwag cucug, nuŋ bə Ətyə Uli Yesu ə mbyyo kyaŋ əkwo ŋway di zɨzərag ni dag, nyyo naŋ ə ntsa ə nyyo ku ni. Sə ətyə əwo kyag ku, nyo də ku di zɨzərag ni dag, i kwo ku na ŋway dɨ zɨzərag ku. Kə kyaŋ ya əku na cyyo nənyyug a wu ə fəg əlyo ya a coŋ bumi cad dag, yog byyaŋ ətyo əwo Yesu əhwu dənian gu ka bɨ kyaŋ əkwo a ya ni dag. Nwad ənnyo, yog kyan əkwo əka nkyag nyo ku yed ətan ni, kû yog yed kyaŋ lyyad kətug əlyyad bə əyyan ni dag. Tyog Əgwaza ku yed əlyyad ya bɨ sswo dag, ku yed nkyaŋ nyyo saŋ əbun, kay nda, jijyad əlyo bumi Zɨzərag Ntswa. Əwod ətyo əwo nyyo Kristi hwo ku bə ndwag ə kwi ni, Əgwaza ə na san gu. Ənied ba əsɨ bwo shim gu. Nwad ənnyo, yog zɨ cad nkyaŋ ə na ni jən zɨd kay nda, bə nsɨna zɨ na nnog əyyaŋ ni. Nyi yog byyaŋ ntəm Əgwaza na dənian kyaŋ ya dag. Kozaŋ nkyaŋ kwo yed zɨzərag. Ku swan a, ŋwan ətyə əwo ya kyaŋ əkwo ni cyyo əyin ə shwod ni. Inɨ yed dag ə ya nam bɨ sswo əkan, kwo kyaŋ əkwo nɨ bay bɨ shwod kwa nənyyug a ku ni. Ŋwwag tsswo nyin əkwo nyi shyyo ndyo ni, nyi sag ku bumi nyika bə Əgwaza. Ətyə lɨbərka əwo tsswo gu ku byo əbun tuza kyaŋ əka dɨdam gu wu di cəcərag ni. Sɨm bə ətyo əwo kwag əban əsɨ ya ni, əlyen naŋ gwo shwod əkwa ngayen, ŋwwag tsswo ku shyyo bumi gu ka dag. Kwo yag ə də ku yed shin ŋwwag tsswo ni dag, ku yed əbun ə.