Yog kozan sswan ji hwi ntyog ǝna shi ni, ǝbyyo tyog yyaŋ dag sǝ sɨ kwo nyyo bǝ Əgwaza wu ni. Ntyog əna nshyyi ni nyyo bǝ Əgwaza, gwo ŋwwag na. Nwad ǝnnyo ni, sǝlləy ǝtyə ǝwo əna nyyo gyǝgyag bɨ tyog ni, ǝ nyyo gyǝgyag bə doka Əgwaza ji. Kənaŋ nyi sɨ nyyo gyəgyag bɨ tyog ku, ǝ́ nǝ fyyed ǝlyyad byyo ǝbun tuza nyi ka. Ənied tyog ǝ yed ǝnied ǝkpəd tuza ǝtan ntəm dag. Əwod tuza kətug nyyo nio, nyi cad nyi yed ǝnied ŋway tswoŋ uwun ǝnio tyog â? Sə nyî nyyo ətan nyyo nyi nɨ shyyo shim guku. Dǝnian ǝyed ǝtyo ntəm Əgwaza bɨ tan. Kə a nyyo kətug, sə a fəg uwun, nwad ǝ byoŋ tswad ji bǝ ǝnnyo dag. Ə yed ǝtyə ntəm Əgwaza, wo ǝ nǝ tan kozaŋ kətug ǝyin bumi ndyen gu ka ni. Dənian əkyo, ku yed tɨlɨd kwo nyî hwi kwo dǝ ku yed dənian ndyen guka dag, yog ku iyed dǝnian dɨdam ntsswo nyin əwo. Nwad ǝnnyo nyi ntǝraŋ kurum ǝbyin ku, nyi lyen naŋ ǝnied tyog ba ǝyed ǝnied ntəm Əgwaza, byo ə nyyo təm kozaŋ jen ni. Nyi tan konyan kyaŋ ǝkwo yed shin konyan ni, kurum ǝbyin bǝ ətyo ǝbyin, tan tá bǝ ǝtyo ǝwo a bwwo tá məngu ni, fəg uwun bǝ ǝtyo ǝwo ə may a fəg uwun guni; ŋwwag shi bǝ tyo ǝwo ə may ǝ joŋ gu shi ni. Nyi yog wod ǝ hwi nyin tá dag, sǝ nyî cad bǝ ǝyyaŋ. Ətyo ǝwo cad +nǝnyyug gu ni, ətyo ǝwo ǝ̀ hwi doka ji. Doka ǝzə ji: "Yog nyyo shɨshɨg mbyyaŋ ǝtyog kwo ǝbyyug ǝyin dag, yog hyad ǝyin dag, yog nyyin kyaŋ ǝyin dag, yog di kyaŋ ǝyin ǝ nfǝg ǝlyo ya dag, bǝ kə doka jyaŋ nshyyo, ǝ ́tuŋ ji ǝsɨ mɨb bǝ nswaŋ ǝlyyad ǝji ni: "Cad nənyyug a wu bənaŋ a ncad apyo a ni." Cad ku ni shwwog nǝnyyug dag, cad ku kukwo nyim doka ji sǝllǝy. Nwad ǝnnyo nyi lyen jen ji, naŋ ji wa kǝn nyyo zǝ nyi nǝ nshyyib mə nda na ni, dənian ǝkyo san zɨ ku mbay kṕəḱpǝg sswag gag ǝkwo zɨ ntsa ŋwwag cucug wu ni. Utug ka usɨ hwwad, utswon ka usɨ bwad dǝdəy utyyag. Nyi bay zɨ kpǝrəg nkyaŋ ndyin na sag dǝ ǝfam, ǝwod zɨ kub nshin say na. Nyi bay zɨ coŋ cyyed ǝkwo myim ni, naŋ cyyed tǝnwam ni. Zɨ yog coŋ tay dag, kwo nyyo soŋ ya bɨ sswo bɨ hyoŋ əkan dag; zɨ yog nyyo shɨshɨg nyo bǝ ǝyyaŋ dag, kwo fəg dɨdaŋ shɨshɨg nyyo dag bɨ nyyo jjyo dag, kwo nyyo nəndwan bə nkyaŋ ǝyyaŋ dag. Sǝlləy, nyi kub Ətyo Uli Yesu Kristi bə ntsswo, nyî yog wod cad lwam ku swan bǝ nyin dag.