Bǝ ǝnyo, nkwad nyin +nǝnyyug, bumi fəg kunag Əgwaza KU, nyî ŋwwag ndwam nyi na naŋ sswan fɨ zənaŋ zɨzarag, kwo yed kyaŋ san bǝ Əgwaza ni. Kukwo yed ǝtan ntǝm nyi wu. Nyi yog di naŋ swanta ku ni dag. Əwod nyî shyyo shay dǝ ndwag shay dɨdam nyin wu. Nyî nyyo ǝnnyo nyî ga shyyo kyaŋ ǝkwo yed ǝtan ni, kwo ǝnǝ san ni, kwo nad cəcərag bɨ kyaŋ ǝkwo Əgwaza u cad ni. Nwad, nnyo dənian nshog ǝzə ǝ joŋ nni. Nyo konyan ǝwo shyyo bumi nyika ni bǎ yog dam bǝ ǝpyo ba ǝ sswag gag ǝkwo myim ba ndam ni dag. Zan bǝ ǝnnyo, sǝ ba dam bǝ ndwag tsutswad, bǝnaŋ Əgwaza u ka nŋwwag konyan cucug ŋwwag tsswo ni. Naŋ zɨ mbyyo nkab bǝ dɨdɨd bumi lwam nyyuŋ ni, ǝwod sǝlləy nkab ənio nyyo təŋkəy tǝm nyyuŋ dag. Ənnyo ku ndi bǝ nzɨd naŋ zɨ nshi bǝ dɨdɨd bumi lwam Kristi ni, kǝkǝb zɨd zɨ yed nkab ǝyyaŋ nio. Zɨ byyo zənaŋ ntsswo dɨdɨd byo ǝ joŋ zɨd zan zan ni bumi nshog. Kǝ zǝnaŋ ǝyin yed shin lyyad ǝŋwwad Əgwaza zə yog gwo ǝ nyyo ku bǝd bumi nwwag tsswo gu ka. Kǝ zǝnaŋ ǝyin yed shin ntǝm, yog gwo nyyo ntǝm guna shensham. Ənnyǒ kə ǝyin ǝbyyo zǝnaŋ cyyed, yog gwo ǝ cyyed. Kə zənaŋ ǝyin yed shin ti gbugbag kwo, yog gwô ǝ ti gbugbag ku. Kǝ zǝnaŋ ǝyin yed shin ŋwwad, yog gwo nyyo ku bǝ səd bɨ tsswo nyyuŋ. Kǝ zǝnaŋ ǝyin yed shin ǝtyi kwog uswon ə, yog gwo nyyo ku shensham. Kǝ zǝnaŋ ǝyin yed shim fǝg kunag kwo, yog gwo nyyo ku tsswo nyyuŋ. Yog cad ku i yog yed shin əbaŋ ǝbyin kwo dag. Tyoŋ kyaŋ ǝkwo yed kǝtug ni. Â nyyo sɨkwo yed tan ni. Tuza cad +nǝnyyug bwo, nyi cad naŋ ku mmyim ni. Tuza ŋwwad shi, nyi nyyo ǝyyaŋ dyo shensham. Tuza ti gɨgɨrɨg kwo, yog hwu lwam dag. Tuza ntswa ji, nyi nyyo gɨgɨrɨg. Tuza Ətyə Uli bwo, nyyo gu ntǝm shensham. Tuza sag tsswo, nyyo ku bə əsay əlyo. Tuza zwod, ya uswon bɨ nay uza ku. Tuza nay Əcyo ka, nyi ngya uswon dɨ nyyo ku. Nyi yed ǝnied byyaŋ nnwan Əgwaza na bumi saŋ nkyaŋ ba ka, nyî yed ǝnied ǝbǝ say əniocen bu usa nyin na ni. Cyyo nǝndwan ǝba lɨbǝrka, Nyî yog shyi ǝyin dag. Byyo ə say tsswo bǝ ǝnied ǝbyo ntsswo ba na say ni, twi duŋduŋ bǝ ǝnied ǝbyo ə twi ni. Yog dɨdam nyin wu ǝyed kyaŋ nyyuŋ. Nyi yog wod dɨdam nyi wu ǝyed ǝshin ǝŋwaŋ dag. Nyi nyyo kpǝndǝŋ bǝ kunag na. Yog ǝyin bǝ nyin ǝ yog dam nyo ǝ sswag kwo nyan bǝ tsutswad ku dag. Nyi yog tan əyin kətug bə kətug dag. Nyi nyyo ǝtan nkyyaŋ duyi konyan. Kə cad ku yed shyyo, nyî swan swad kay nda dunduŋ bǝ konyan. +Nǝnyyug, nyi yog tan kətug bǝ kətug dag. Nyî yog Əgwaza u ndyo, ngwo na tan nyi ndyo. Naŋ ǝkə ndyurug ni "Tan ta kətug ku yed shin nkwo, konyan ǝnǝ shyyo ǝkpa gu, Ətyo Uli ǝ hyyo ǝnnyo." Əwod kǝ nǝndwan ǝwu ǝ tswoŋ zwoŋ, naŋ gu kyaŋ ya. Kǝ əma ntswoŋ nwamshyi kwo, naŋ gu sǝhwod. Kǝ nyi nyyo ǝnnyo, nyi nɨ kwərəg cɨncan ndoŋ tuza kǝkǝb +nǝndwan nyi ba." Nyi yog wod kətug i sswo ced nyin dag. Dǝ kunuŋ ǝkyo nyi sswo ced ku, bɨ nyyo ǝtan nkyaŋ.