+Nǝnyyug mba, nkyag bǝ ntsswo nku bəd ndyib Əgwaza u tuza ba bâ ga shyyo san baku. Kukwo n nkub ba uma naŋ ba nkwan bəd nɨ bə nkyaŋ Əgwaza na. Əwod, də bɨ lyen. Kukwo mbyyo ba ba ncyi lyen təŋkay saŋ ǝbun Əgwaza ku, ba kwan bǎ twərag saŋ əbun ku. I sɨ kɨyed bǎ ŋwwag əpyo ba bə saŋ əbun Əgwaza ku bə ənyin ku. Nwad Kristi ə twərag yed doka saŋ əbun bə konyan ə ŋwwag cucug. Kukwo Musa ə lyurug tuza saŋ əbun əkwo nyyo bə doka ji ni, nyo, " Ətyə əwo nyyo nkyaŋ saŋ əbun tuza doka ji ni, ənâ swan swad təŋkəy saŋ əbun əkwǐ ni." Əwod saŋ əbun ǝkwo nyyo bɨ ŋwwag tsswo ni nyo, "Yog lyyad bumi ntsswo aka, ənyan ə na ŋhag ə nad bumi tuza gwô cyyog bə Kristi əbay dyo əbyin?" Bu yog nyo, 'ənyan ə na cwwog ə nad utag əbyin ka?'" (nwad, gwô bay bə Kristi bə swanta ku nyyo bə ənied kukwi ba). Əwod yag ə naŋ ku hyyo? Əlyyad na ə shyyo kpənkpyen bə ŋwan, bumi unuŋ aka mbyyaŋ bumi ntsswo aka." Əlyyad ənio yed ŋwwag tsswo əkwo zɨ shey ni. Bə kə bu unuŋ akyo naŋ a ntwərag nyo Yesu ə yed Ətyə Uli, asɨ ŋwwag cucug bə ntsswo aku nyo Əgwaza u ə dərəg gu bə ənied kukwi ba, a na shyyo san ku. Naŋ bumi ntsswo kyo əyin əni ŋwwag cucug dɨ shyyo saŋ abun ku, bumi unuŋ əkyo bwo ənû ənɨ ntwərag shim ku dɨ shyyo san ku. Əlyyad Əgwaza na ə nyo, "konyan ǝ sâ ŋwwag cucug də ngu, i nɨ cyyo gu ənə sswo nsum dag." Kukwo mbyyo naŋ ə mbyyo ghay tuza Bayahudi mbyyaŋ ǝkag ənied dag. Ə ghay dag. Ətyǝ Uli ǝ yed Ətyə Uli ənyyuŋ kǝkǝb, gu bǝ ǝpyo gu ǝ yed zwa zə bǝ konyan wo yoroŋ gu ni. Konyan ǝ sǎ yoroŋ ǝlyorog Ətyǝ Uli ka, ǝna shyyo san ku. Ba na nyo ni bâ ŋyoroŋ gu wo naŋ ba nŋwwag cucug ni dag? Ba na nyo ni bə̂ nŋwwag cucug bǝ ngu wo ba kǝ nfǝg ni dag? Ni ǝ bəd ba na nfǝg, bǝ kǝ ǝ shyyo ǝtɨ shey usham Əlyyad ka dag? Ni ǝ bǝd ba na nshey usham əlyyad ka, bǝ sə naŋ ǝ tǝm ba dâ? Naŋ ǝ ndyurug ni, "Zan tǝŋkəy shisham zo nâ shyyo bǝ tɨtag ǝnied ǝba ə shey usham ǝlyyad ətan nkyaŋ əkay!" Əwod kəkəb ba byo əku tswoŋ usham əlyyad ka dag. Naŋ Ishaya ǝ nhyyo ni, "Ətyo Uli, ənyan ǝ ŋwwag cucug bu təm zɨd ji?" Kukwo ŋwwag tsswo ku nɨ nyyo bɨ tswoŋ əlyyad kwo, tswoŋ ku bwo sɨ ma nyyo bə əlyyad Kristi nio. Əwod nuŋ nnyo, "Ba ntswoŋ dâ?" Mud, ku di ənnyo bəd. "Ŋwuŋwwad ba ku kə nkay bumi dunio ka kəkəb, əlyyad ba na sɨ ma nad bə nŋhan swanta wu." Zan bə ənyyo, nnyo, "Isirela ba əku lyen dâ?" Musa əku tsa ə hyyǒ, "N nə cyyo nyin nyî fəg cway bɨ yed +nəndwan tuza kyaŋ əkwo yed shin əkag ənied ni dag. Kyaŋ əkwo nfa əji ni kukwo yed, əkag ənied də ba fɨg ni dag, ba byo naŋ i na nnyyo ntəm bə mba nga nshyyo təkyəm ntsswo nyi nà." Əwod Ishaya bɨ gbaŋ əlyo əsɨ nyo, "Di ənied əba ku cad n ni dag, ba byo əwa shyyo n. N twərag əpyo n bə ənied əba də ə ku cad n ni." Əwod tuza Isirela ka əsɨ nyo, "N nyyeb bwag nku tuza ənied lag tswoŋ bəd, dənian ba yed ənied əbyo byyo gbəb əpyo ni."