1
Nuŋ Bulus, ǝhwo Yesu Kristi, mbyyaŋ nǝnyyug wu Timoti zɨ lyurug a Filimon, kpǝndaŋ ntǝm zɨwu
2
mbyyaŋ Afiya nǝnyyug ǝnab, mbyyaŋ Arkifus kpǝndaŋ ntǝm bǝ nzwaŋ usham ǝlyyad bǝ nnwan Gwaza ǝbyo ǝba ə tuŋ buli a ka ni.
Yog shog bɨ kay nda kwo nyyo bə Əgwaza Əcyo zɨ wu mbyyaŋ Ətyǝ Uli Yesu Kristi i shyyo duŋduŋ bǝ nyin.
4
N gway bə Əgwaza, nti ənyuŋ a ka bɨ nay nku kwo za njen.
5
Ǹ fəg ŋwwag tsswo mbyyaŋ cad Ətyə Uli Yesu a ku mbyyaŋ nnwan Əgwaza na kǝkǝb.
Ǹ nay yog kɨ byyid bǝ ǝyyaŋ zɨ ku bɨ ŋwwag tsswo a ku i bay bɨ lyen ətan kyaŋ bǝ nzid bumi Kristi.
N shyyo bə say ntsswo bɨ fəg nyinyaŋ, nwad cad a ku kwo a byyo tuza nnwan Əgwaza ka ni kwo a cyyo nǝnyyug ba ə fǝg nyinyaŋ ni.
Nwad ənyo, mbyyo gbaŋ əlyo bumi Kristi ncyyo a tɨlɨd a nyyo kyaŋ əkwo ncad ni,
9
Əwod dənian cad, nsɨ di ku myim n kwad á. Nuŋ Bulus huhwob əcyo, ngyed əhwo nini dənian Kristi Yesu.
10
Ǹ kwad a tuza ŋgwon nka Onisimus, wo ngyed əcyo gu u bɨ hwo nyanyaŋ ni.
Gbaŋgbaŋ ǝku byyo kpaŋtin bǝ ŋwan dag, nni, ə byyo kpaŋtɨn bǝ nuŋ mbyyaŋ ŋwan.
Ǹ bwwog bə ngu ntəm dyo bə ŋwan, gu əwo ə yəd tsswo nku ni.
Ndag dag, sə ngwod gu bə nuŋ gwô byyaŋ n ntəm na də kunuŋ a ka bɨ hwo bǝ +nyanyaŋ əkwo n nshyyo dənian Usham Əlyyad ka ni.
Bə ənyo, ncad n nyyo kyaŋ də bɨ shim a dag, yog ətan nyyo a wu ə yog yed tɨlɨd dag, n cad a nyyo ku bɨ shim a.
15
Shim dag ikwo mbyyo ə̀ ya nkhab nyin bə a njen. Â yi ba san gu mbwag nfyyaŋ tɨnad jen saŋ sɨsag.
Ə̀̀ bwo nə yed əhwo dag, ə sswag yed əhwo, ǝ̀ yed nsag əlyo nənyyug ǝ. Nsag əlyo nǝnyyug ǝ bənuŋ mbyyaŋ ŋwan bumi lwam nyyuŋ bǝ Ətyə Uli u.
Kə a kyag n naŋ kpəŋdaŋ ntǝm ni, san gu naŋ anɨ n nsan n ni.
Kə naŋ gwo nyyo a kyaŋ kwo a nhwi gu ta ni, twaŋ ku tuza nka.
19
Nuŋ Bulus, ndyurug a bɨ bwag nku, nnə tan a. Sənaŋ ntag a naŋ n hwi a ta əpyo a dag.
Ncad bǝd nənyyug, nyyo n shog bumi əlyorog Ətyə Uli, â joŋ n shyim tsswo bumi Kristi Ətisan.
21
Ndyǝn a bɨ gbòb ǝpyo dag, ndyurug a ndyo, ndyen anɨ nyyo sswag kyaŋ akwo ndyib a ni.
22
Əmgbom bǝ ǝnyo, jyi n tu kway, mbyyo sag tsswo, nwad nay Əgwaza a ku, ǝ nə bwwog bǝ nuŋ ǝ bay ndyo bǝ ŋwan.
Ifafaras, wo zɨ mun shyyo bɨ hwo dənian Yesu Kristi ku dunduŋ ni, ǝ byad a.
Ənyǒ bwo Markus, Aristarkus, Dimas mbyyaŋ Luka, +kpǝndaŋ ntǝm mba.
Yog shog Ətyə Uli Yesu Kristi i shyyo dunduŋ bɨ tswa a ji. Zǝm.