Kə ǝyin bə nyin ǝbyyo ǝlyyad bǝ ǝyin bumi nyi ka, Î nkwa gwo kyag na ǝnad dyo bɨ tu fag ǝlyyad duyi ǝtyo fag ǝlyyad əwo dǝ ǝyed ǝshin Əgwaza ni dag, dǝ kunuŋ nnwan Əgwaza ka? Nyi lyen naŋ nnwan Əgwaza nio u ba fag ǝlyyad na tuza ǝnied swanta ba dâ? Ba kǝ nyi byo ba fàg ǝlyyad na tuza ǝnied swanta ba, yag ǝ nɨ lwoŋ nyin jyi a cwwaŋ əlyyad ǝnio u dwwod bumi nyi ka nî? Nyi lyen naŋ zɨ byo tɨba fǝg ǝlyyad na tuza +ətǝm ntswa Əgwaza ba dâ? Mmǝntug fag ǝlyyad tuza nkyaŋ ǝnio byyan zɨd swad ku bǝ swanta ǝkwi ni â? Kǝ nyi fag ǝlyyad tuza nkyaŋ ǝnio tsswud nyin swad ku utswun bǝ utswon ni, yag ə mbyyo nyi nkwag ǝyyaŋ coŋ dyo mbwag ǝnied ǝbyo dǝ ba yed nnwan Əgwaza ni bâ jyi nyin swad ku? Ndyyad sɨkwɨ nɨ ŋyî ga fəg nsum. Ə̀ mbyyo əyin bǝ nyin wo byyo tsutwad ǝkwo may nfag ǝlyyad tuza sam ǝyyaŋ bumi +nǝnyyug ka ni dâ? Naŋ n ndi ni, ǝyin bǝ nyin bə nnwan Əgwaza na ǝ kwag ǝyyaŋ nyin ǝ nad ndyo bu tu fag ǝlyyad ǝnied ǝkag ǝbyo dǝ ba yed nnwan Əgwaza ni dag. Naŋ nyi ngwod dɨdɨd sam ǝyyaŋ sɨ nŋwwo bumi nyi ka ni, ku twarag lad nyi ku. Yag ǝ mbyyo nyi nɨ ŋway sswo zwod ti ǝbun kú? Yag ǝ mbyyo nyi nɨ ndag shim ǝ nshyyog nyin kú? Nyi bwuŋ naŋ nyi kǝ mbwwo ǝyyaŋ ǝbun, nyi sɨ shyyog ǝyyaŋ â? Əwod +nǝyyug nyin byo ba yed. Nyi lyen naŋ ǝnied bwoy ǝbun ba ǝba ŋway shyyo gado tyog Uli Əgwaza ku dâ? Nyi yog ŋwwag cucug bɨ kɨ bwoy ǝlyem dag, əkwa shɨshɨg kɨ nyyo, ǝnied hwi +agwaza dunio na, byo yed +uləm ni, shɨshɨg ǝkwa ǝtyog əmyyan bǝ ǝtyog. +Ətaŋ ba, ǝguŋ ufa ba, ǝnied +shitóŋ ǝkan ba, tyam ǝyyaŋ, shwwo ǝnied, tǝŋkay ǝnied ǝnay ni ǝna shyyo gado bɨ tyog Əgwaza ku dag. Ənnyǒ ǝyyaŋ nyin ku ndi, ǝwod Əgwaza u ǝsɨ kwi nyin ǝwod, ǝ́sɨ khab nyin ǝsag, ǝsɨ jyyug nyin ǝ bwwog ǝbay ndyo bǝ ngu bumi ǝyorog Yesu Kristi dunduŋ bɨ tswa Əgwaza ji. Ngyed bǝ sǝd ə bǝ kozaŋ nkyaŋ, ǝwod bǝ kozan nkyaŋ kwo nâ nog n dag. Ngyed bǝ sǝd ə dɨ nyyo kozaŋ nkyaŋ, ǝwod nnǝ gwod kyaŋ ku nyyo tyog tuza n dag. "Kyaŋ ya ku yed shin ufa kwo, ǝwod ufa ka sɨ yed ushin kyaŋya kyo." Əwod Əgwaza u bá wyyǝm ba. Ndwam zɨ na yed shin shɨshɨg kɨnyyo dag. Dǝ kunuŋ ǝkyo, ndwam zɨ na yed nshin Ətyə Uli nio, Əgwaza ə ǝna ŋwwag zɨd nkyaŋ lwam na. Əgwaza u ǝku ndǝrog bə Yesu Kristi bǝ ǝhwu ka ni, ǝnnyǒ bwo gwo na ndǝrag bə nzɨd bumi tyog gu ka. Nyi lyen naŋ ndwam nyi na ngyed nkab lwam Yesu Kristi nio dâ? Zɨ na nyyo ni nkyaŋ nkab Yesu na nâ mwun bɨ kham â? Tyid, kuna di ənnyo dag! Kǝ dǝ nyi lyen nyo ǝtyə ǝwo mwun bu kham ni, ba byɨrɨg ǝcyo lwam nyyuŋ dâ? Bǝ naŋ ǝlyyad Əgwaza na n hyyo tuza nyaraŋ ka ni, "bá ǝfyyaŋ, ǝna yed lwam nyyuŋ." Nwad, ətyə ǝwo mwun əpyo gu bǝ Ətyə Uli ni, ǝ̀ cyyo tswa jyyuŋ zǒ bǝ ngu. Nyi tyoŋ əkwa shɨshɨg kɨ nyyo wu! "Kozaŋ kǝtug nnyyo ǝ ǝnǔ ǝ nyyo, ǝ ŋwwo bɨ lwam ku dag." Əwod ǝtyə shɨshɨg kɨ nyyo wu, ǝ byyaŋ lwam gu ǝkwo. Kǝ́ dǝ nyi lyen nyo ndwam nyi na uyed ulwo nswad Zɨzǝrag Ntswa ə, wo swan bumi nyi ka ni, wo nyi shyyo mbwag Əgwaza ni a? Nyi lyen dǝnaŋ nyi byo mbyyo ǝpyo nyin dâ? Əbɨ san nyin bɨ zaŋ shi. Nwad ǝnnyo, nyi ŋwwag Əgwaza u shi bɨ ndwam nyi na.