Di gag əkwo myim ə nkyag zɨd ni, naŋ nnwan ntəm Kristi dɨ nyyo ntəm uli byo byoŋ cucug nkyaŋ Əgwaza nio ə niad ni. Nini, kyaŋ əkwo ə cad bə nnwan ntəm uli na ni kukwo yed, bâ yed bə ənied kwog cucug byo. Əwod bə nuŋ ə dɨddəy kyaŋ kyo nyî fyyed əlyyad tuza nka, kwo bɨ tu fag əlyyad əniebɨbishyi ə, nwad nuŋ bə əpyo n nfâg əlyyad tuza əpyo n dag. N dyen kə mbyyo əbun bɨ kyaŋ əkwo ə ntətwaŋ n +gəsswoŋ ni dag, bə də kû twarag nyo n saŋ əbun dag. Ətyə Uli ə bə nyin gu ə fag əlyyad tuza nka. Nwad ənnyo, nyi yog nad ŋwwo fag əlyyad tuza kozaŋ nkyaŋ wod jen əji Ətyo Uli ətə mbay ni dag. Ə̀ nə wurug bə nkyaŋ ənio shyyo bə ndyin ni ə̀ bay ndyo kpəkpay bə nkyaŋ ənio ntsswo na fa ni. Kukwo konyan əna nsan dyeb gu ku kwo nyyo bə Əgwaza u ni. Nini +nənyyug mba, ku yed n tɨlɨd kwo nhwi nkyaŋ cucug na gɨŋgɨŋ bəd mbyyaŋ Afolos dənian nyin, dɨgag əkwo nyî ga mmyab bə nzɨd kyaŋ əkwo ə fa bɨ karag ku ni nyo "Yog təkaram kyaŋ əkwo ə lyurug ni dag." Ku di ənnyo kəlag əyin bə nyin əba gwud əguŋ dɨ cad shog sswag əkum ənied ka. Bə ənyan ə cyyaŋ nyo nyi lwwon bə əkum ənied kǎ? Yag ə bəd nyi byyo kwô də nyi san ku səd ni? Bə kə nyi san ku də bɨ tan, yag ə mbyyo nyi ngwud guguŋ tuza kyaŋ əkwo nyi san də bɨ ta uluhyyo? Nyi wa kə nshyyo kwo yag ə nyi cad. Nyi yed ənied shyyo byo! Nyi wa kə ŋwwo nyyo tyog ku, kaŋ bə nzɨd! Bɨ cad nku nyî nyyo tyog ku, zɨ ga nyyo ku tyog ku dunduŋ bə nyin. Nwad, bə dɨdam ngu, Əgwaza u ə cyyo zɨd +əgwag ntəm Kristi kwo twarag zɨd naŋ zɨ ngyed nŋhan ba bə ndaŋ ənied əbyo ə̀ fyyed ba əlyyad əhwu ni. Zɨ bwwag cyyo kyaŋ cyyaŋ bə swanta bə +ətəm ntswa mbyyaŋ əniebɨshyi ba. Zɨ yed +əbwwon byo dənian Kristi, əwod nyi sɨ byyo tsutswad dənian Kristi ka. Zɨ yed bubwod ənied byo, əwod nyin nyi sɨ byyo nced. Ə ŋwwad nyin shi ku əwod zɨd əsɨ jwway zɨd. Sag utswun əkay ni, zwoŋ zə ya zɨd mbyyaŋ tswoŋ nwamshyi, kɨkyág +ətərag byo zɨ hwi, zɨ sswo kətug ntswód, də zɨba byyo usa dag. Zɨ nyyo ntəm na bəd də bɨ tswuŋ, bɨ nyyo na bə mbwag zɨd na. Kə ə shyi zɨd, zɨ nɨ hwwod ba mmyaŋ. Kə ə təgbaŋ zɨd, zɨ nɨ gbaŋ əlyo. Kə ə̀ tyam zɨd, zɨ nɨ ndyyad bə əŋwwad fəg kunag. Zɨ bwwag cyyo, ənnyǒ sag utswun ə nkyag zɨd, naŋ ədwwoŋ ni bə swanta ku. Zɨ byo sɨ nsswag bə di shɨshɨg ku bə nkyaŋ swanta na. Ndyurug nkyaŋ ənay nga ncyyo nyin nsum dag. Də kunuŋ əkyo, ndyurug na nwa n jyi nyin naŋ nnwan n əna ncad bəd ni. Nwad, kwo nyi byyo ənied byoŋ ba ə nad cikwob swag zə bumi Kristi, +əcyo nyin ba a shi dag. Nuŋ ə ngyed əcyo nyin wu bumi Kristi Yesu mbwag usham əlyyad ka. Ikwo mbyyo n nyyo yog nyî hwi tɨtag cyyed mba. Ikwo mbyyo n ntəm bə nyin ŋgwon nka Timoti wo ə yed nsag əlyo ngu bɨ kwog cucug bumi Ətyə Uli ni. Ngwo ənə jyuŋ nyin ndwag nna bumi Kristi, bənaŋ ncyyed ba kozaŋ ulwo bə kwo zaŋ əfam kyo nnwan Əgwaza nshyyo ni. Nini əyyaŋ nyin ə ŋwwo gwwud guguŋ, ə nyyo eye də mmo təmbay bə nyin ni. Əwod nna la byyaŋ dag mbay bə nyin, kə Ətyə Uli a cad ku di ənnyo. Əwod tuza ənied gwwud guguŋ əbay ni, byo əlyyad kəway bumi əŋwaŋ ni, əwod bay nku na cyyo mmo ndi tyog baku. Nwad, tyog Əgwaza ku shyyo bə əlyyad nio kəwəy dag, sə bɨ ced gu ku. Yag ə nyi cad bəd? Mbay bə nyin bə əyəw kyo a, kə mmo bay bə nyin bɨ cad mbyyaŋ tswa ywway əpyo n kwô?