Nuŋ Bulus əwo Kristi ə khay ngyed əgwag ntəm guwu dənian Əgwaza ni mbyyaŋ Sastanisu nenyyug zɨd wu. N dyurug kwa mbwag əkwi ni nyyed dyo bə nnwan Əgwaza ənio Korinti ni, bə ənied əbyo ə khab əsag bumi Yesu Kristi, byo ə yoroŋ bâ yed zɨzarag ənied ni. Zɨ bu lyurug nyyed dyo bə ənied əbyo ə̀ yyi əlyurog Ətyo Uli zɨka Yesu Kristi kwo əji, Ətyo Uli bawu bə əshin zɨd wu ni. Yog shog mbyyaŋ kay nda byo nyyo bə Əgwaza bə Əcyo zɨwu mbyyaŋ Ətyə Uli zɨwu Yesu Kristi, iyed shin nyin. Kwo zaŋ njen, ngway bə Əgwaza ngu dənian nyika tuza shog. Shog Əgwaza əzə Kristi Yesu ə ŋwwag nyin ni. Ə̀kə̀ njen nyin zwa bə kwo zaŋ ndwag bumi lyen mbyyaŋ əlyyad. Nyin əpyo nyin nyi byo twarag naŋ swaŋ əlyyad əji tuza Kristi n gyed cucug. Ikwo mbyyo nyi mbyyo kwo zaŋ zənaŋ zə nyyo bə Zɨzərag Ntswa Əgwaza u ntswoŋ nwam əkwo Əgwaza u əba ntwarag Ətyo Uli Yesu Kristi, konyan ə lyen guni. Əgwaza u ənə jen nyin ced, nyî nnyyo gu ntəm na tɨnad nŋan u, nyi ba yed ənied saŋ əbun utug əkyo Ətyə Uli Yesu Kristi əba mbwwog əbay ni. Əgwaza u ə byoŋ kyaŋ əkwo gwo karag ni, ənə nyyo ku. Əgwaza əwo ə yoroŋ nyin ni, nwad ənnyo, sə nyî mwwun əpyo bə ŋgwon guka Yesu Kristi, wo ə yed Ətyə Uli zɨdwu ni. +Nənyyug mba +əsam bə +ənab, nnay bumi əlyorog Ətyə Uli zɨdwu Yesu Kristi, unuŋ nyin ka u yed unyyuŋ. Əwod nyî yog kənan u, nyî yog kəw əpyo nyin bə +əkpa dag. Nyi kwan unuŋ nyika u nyyed dunduŋ, nyî swan bɨ tsswo nyyuŋ tɨnad nŋan wu, Ənied uli kulowi ba əbay bə nuŋ əlyyad, nyo kənan ə shyyo bumi nyika əwo cyyo nyi sɨ ŋwwo kəw əyyaŋ nyin bə əkpa. Kyaŋ əkwo mbyyo ni ikwo yed ənî. Konyan ə byyo ətyə əwo gwo dyeb ni zan. Ətyə əwǐ ə nyo "nshyyo bə Bulus. Əyyaŋ əsɨ nyo, "n shyyo bə Afolos." Əyyaŋ bwo əsɨ nyo, "n shyyo bə Kefas." Əwod nŋan u ə nyo "nshyyo bə Kristi." Nwad Kristi ə kəw əpyo gu â? Bulus ə əku kpaŋ ənian nyika ǎ? Ətyo əwo ku nyyo nyin botisma jini, əku nyyo bə́ əyorog Bulus ǎ? Ngway bə Əgwaza u, nnyyo əyin botisman bumi nyika dag, sə bə Kirisfus mbyyaŋ Gayus. N nyyo ənyo, kəlag əyin əba nyo ə nyyo gu ndyo bə əyorog n kyo. Mmo nyyo əyin botisma dag sə Sitifanus mbyyaŋ kyaŋ mbwag guku. Kaŋ bə ənyo, mmo nnyyo əyin botisma Korinti dag. Gbədərag ntəm əwo Kristi ə təm m mmo nyyo ni, ngwo yed n twarag konyan Usham Əlyyad. Əku təm n shəy Usham Əlyyad ka bə tsutswad ətyibɨshyi dag, kəlag ətyyem əhwu Kristi u ənə byyo kpaŋtɨn dag. Ənied əbyo ə kyag lwag əhwu ni, Usham Əlyyad ətyyem ka u yed bwwon kwo bə mba. Əwod ənied əbyo say Əgwaza ku shyyo tuza ba ni, iyed tyog Əgwaza kwo tuza ba. Nwad ə lyurug nyo "Nna byyan tsutswad ənied ku, mmo gba fɨg bɨ lyen baku." Tsutswad ənied ku shyyo əji ə̌? Ənied əbyo ə cɨn nyo ba lyen ni ba shyyo əjǐ? Tɨntən ənied ya kənan swanta əbay ə shyyo əji ə̌? Əgwaza u əkə ntwarag naŋ kwo yag ə ba ngyi tsutswad, ku bwwag cyyo ba bwwon ko dâ? Də naŋ tsutswad ənied swanta əbay ə ndyen Əgwaza u ni dag, Əgwaza u əbɨ cad bâ lyen gu mbwag bwwon shyey Usham Əlyyad ka bâ ga nshyyo san bɨ ŋwwag cucug ku. Yahudawa ba əbɨ cad sənaŋ ba di kyaŋ tɨtyog Əgwaza ku, Helinawa bwo əsɨ cad tsutwad kwo. Əwod zɨd zɨ shey tə̀m Kristi zə, wo əbɨ kpaŋ bə ətyyem əhwu ni, ətyyem əwi əyed əfaŋ ngəw kyo bə Yahudawa ba, bwwon kwo bə Helinawa ba. Əwod bə ənied əbyo Əgwaza u ə yoroŋ ni, Yahudawa bə Helinawa. Zɨ shey Usham Əlyyad Kristi bə tsutswad bumi ced Əgwaza ku. Əwod bwwon Əgwaza ku sswag tsutswad əkwo əniebɨshyi ba əbyo ni. Əwod nkyaŋ Əgwaza nio ə cyyaŋ bəbwod ni sswag ced ətyə nced əwo mbyyo bə swanta kuni. Nənyyug +əsam bə +ənab, cyyaŋ nyi di kyaŋ əkwo nyì ku ndî də njen əzə Əgwaza u əku ngyoroŋ nyin ni. Cyyaŋ nyi di gag əkwo nyi ku mbyyo kpəŋtɨn dag. Səllay nyin bə ənied swanta ba ku byyo tsutswad dag. Əyyaŋ nyin əbi byyo tyog dag. Əyyaŋ əsɨ nyyo bu usa tyog dag. Də kunuŋ əkyo, Əgwaza u əsɨ khay nkyaŋ ənio ənied swanta ba əkyag byyo kpaŋtɨn ni, ə̀ ncyyo tsutswad ənied ku nswum. Əgwaza u əsɨ khay nkyaŋ saŋ ced na bə swanta ku ə̀ ncyyǒ ənied nced ba nswum. Əgwaza u ə khay nkyaŋ ənio ənied ba cyyaŋ əsɨ kyag kyaŋ ni dag, gwo ntwarag ba naŋ nkyaŋ ənio ba kyag əkpəd yed kyaŋ ni, yed kyaŋ dag. Əgwaza u ə nyyo ənî dənian əka, əyin ə yog gud əguŋ dag, də kunuŋ əkyo, bâ dyeb Əgwaza u bə nyin gu. Nwad, kyaŋ əkwo Əgwaza u ə nyyo nyyo əkwi ni, ə mwun nyin bə Kristi Yesu wo ə twarag nyin gag əkwo Əgwaza u ə mbbyo tsutswad kuni. Gwô əyed zɨd saŋ əbun bɨ yed zɨzarag ənied bə ətyi san zɨd wu. Naŋ əlyyad Əgwaza na ə nkarag ni, "Yog ətyo əwo ə gwwud əguŋ kani, sə gwo gwwud ka bumi Yesu Ətyo Uli".