nbtt-oks_jud_text

Epan 1

¹ Ijudu, Ijesu oòkotoro akà Ijemisi oòda, na abẹ nẹnẹ bi ye na, uniniro Òsibina Ẹ́dẹda, nẹnẹ biye su ni Ijesu Ikristi na. ² Eyi ȯsọsọn akà iwọbẹbẹrẹ akà unini a yere bile amo nẹ nọ. ³ Uniniro, ogbọna nẹnẹ me e gbe akanyan ka ẹ wọrẹ file nẹ nọ yẹrẹ tọ obile bi oònafan ẹpan, i su ka ẹ wora file nẹnọ ka i gbe nu uloko nọ ọnawọ nẹnẹ biya dọn Osibina eèro onwonwon abẹ uùba isi ọọrẹ nọ ọgba fẹnyan. ⁴ Ubaka ero ẹbẹn wamọ nẹnẹ bẹ bẹbẹ woli fọn ne etin. Enane wa oro abẹ nẹnẹ bẹ ṣẹrẹ wuje ne ebe ọṣẹn nẹ. Abẹ a wa ero ọnemesiyakosibina na nẹnẹ bila to Osibina eèse wo osiyegbọgba, abẹ nẹnẹ diye yuru tọ ọga ọọrẹ ọgbọgbọ akà Idu, Ijesu Ikiristi. ⁵ Akana mè e ni ka ẹ nyẹn nọ-kakọ nẹ ni siye tayi din ya na-ka Idu fan ero ẹbẹn fura igibiti ije, àmá ì yu urunba e fu abẹ nẹnẹ a à ma nawọ na. ⁶ Kegan, angeli abẹ nẹnẹ è é me je gbeli bi iburu ọọ̀pan na, àmá nẹnẹ tebi bẹ ẹfa ọmẹma ẹbẹba wujena- Osibina fọ ba su ke wo ẹwẹrẹgẹ otutunmotutun ẹka, ésiri kpikpikpi nẹ ẹkarẹ ọṣẹnṣẹn isubu ọkẹka. ⁷ Akọ ki Isodomu akà Igomora akà iken abẹ nẹnẹ kọwẹ ba na fọ bi iwu bẹ ela wuje nọ amabuwe nẹnẹ a à ma bọ na akà amabuwe gbọgbagbọgba. Bi jọmọ ako ẹfonyẹn ne ero abẹ nẹnẹ je ẹra otutun oòya na. ⁸ Kegan ọ̀rẹ ọrọọrẹ, ọmuwero ẹnanẹ de siye be bi iwu abẹ fuwa nẹ Bi yuru iburu wuje bi diya à á ga elabo nẹ ugbugbodiro abẹ ⁹ Àmá kẹ Ẹmayikẹli angẹli eèpan, ọgbọna nẹnẹ a ma eṣu à á nyanowo akà nẹnẹ a ma ẹ à á fọwẹ yẹrẹ Imosisi iìwu ẹpan na, e me gbadọ fọ ẹlabọ ẹẹ̀karọṣẹsẹn ṣuwa ẹ. Akọnẹbẹ a ga ka, "Idu a ma ọ ga." ¹⁰ Àmá ero ẹnanẹ da ga ẹlabo ki be ekena nẹnẹ e è me ye ba na; ẹkẹna bi din kaba ijije na, akọ ẹnẹ nẹnẹ e è diye roro na, ẹkẹna ẹnanẹ ebẹba e kpoto à á nwan ba nẹ ¹¹ Fẹlẹ ba! Ubaka bè e jejen Ikeyini oòrikpokpo bi fu wo Ikora iìmanẹkọn. ¹² Ẹro enanẹ a ma fọ ẹpan ọkọkọ wamọ bà a ma nọ ki je ejemẹ na-ọṣẹlududo abẹ nẹnẹ è é fiye abẹn na. Idudurudu nẹnẹ e è me su osi na nẹnẹ ekperi abẹ abẹ fọ è é ne na; ayẹ bẹ wa ọnogba iìri, nẹnẹ e è me munilukotu na nẹnẹ fọbisi ẹbọrẹ kẹ na, nẹnẹ bẹ bọrọ na. ¹³ Bẹ wa ọpọpọra gbọdọgbọdọ òkun nẹnẹ à á ṣa bu usi afọfȯ na, une eèṣẹkpẹnẹ bi guru esiri kpikpikpi iìbusu nọ na wa otutunmo tutun. ¹⁴ Enoki, oro ufọnbọrẹ Ádamu uùrun, ga ẹsẹ yẹrẹ bẹ ẹpan, a ga ẹ ka, "Ungbeli! Idu à á ṣa àka ye ero onwonwon abẹ nẹnẹ wa aṣẹn anẹ akà aṣẹn abẹ na. ¹⁵ À á ṣa ọb ṣẹn emesuyakosibina abẹ na ebe nu utun idudu fẹnyan nẹnẹ bẹ fọ emeduyakosibina abẹ ga ṣuwa ẹ̀ ke na. ¹⁶ Ẹnanẹ wa ihuhunuro, ọgbagaro abẹ, nẹnẹ dakẹ yẹrẹ bọ opin iìnini abẹ na. Abẹ a wa ọkpanmowo rọnmowo abẹ nẹnẹ da kpẹrẹ bi iwu ekẹkẹrẹ ojije, da kaminẹsẹ ero ẹbẹn na. ¹⁷ Àmá anọ, uniniro, nẹ nyẹn ẹga abẹ nẹnẹ ti Idu Ijesu Ikristi a àpostoli ga wo urun ṣa na. ¹⁸ Bẹ ga nẹ nọ ka, "Ọ̀gba omunurun osiro abẹ èke wamọ nẹnẹ bà àka yẹrẹ abẹ ẹbẹba emesiyakosibina iìnini abẹ na." ¹⁹ Abẹ ẹnanẹ e de ṣoma oruruwa abẹ nẹ; eroro bẹ wa bi me diye su Efunwẹnfunwẹn Onwọnwọn. ²⁰ Ama anọ, uniniro, nẹ kẹ mẹ ni iwu kẹ kpọ ì nọ ọnawọ nẹnẹ nwọn fọrẹ na, ni ki siye adura Ẹ̀funwẹnfunwẹn Ọnwọnwọn. ²¹ Nẹ fọ ni iwu bẹbẹ wo Osibina uùnini, ni diye jọmọ kẹ karẹ ti Idu Ijesu Ikristi eèse nẹnẹ àka fọ ẹrọ otutunmotutun nẹ nọ na. ²² Sọn abẹ nẹnẹ su ibebọrẹ na eèyi. ²³ Nẹ fọ ewunafura uuna ero ẹbẹn fora era ibẹ. Nẹ ẹbẹn nẹ ṣoneyi àka ọrọrẹ. Ni goli kẹ ẹsa nẹnẹ iwukpe sin na. ²⁴ Akana nẹ ẹfẹna nẹnẹ diya fọ nọ bẹbẹ fora ọtọṣẹn nẹnẹ diye fọ nọ jọmọ ì yu ugbugbodi forẹ na eèrẹn nẹnẹ è é me su ebefuwa na akà ẹbẹbẹn ọkẹka, ²⁵ no Osibina oọrẹ ọgbọgbọ tọ Onaafanro Ijesu Ikristi ti Idu uùba ọrẹ, a wa ugbugbodi, igirima, afọrẹ, akà iwogbigben, ye ẹrẹn fọra ọgba fengan, akana aka otutunmotutun. Aamin.