¹ Cwa le nǝngni mɓa, nǝngɓǝng ɓa ɗuiye ɓai. Wui nǝn li na'nwaci nǝ dǝ nabi ɓaim kǝ ɓaman cwumbwua, a, "A wusǝm bǝni yang kǝng tanasǝ le nǝng nǝ djwau wurǝ nǝ." ² Mi tangsǝ Kwang Fi, nǝngɓǝng ɓa bǝ kura ei djǝ ɗuiye, yivaka la ku ku. ³ Yivǝnǝ ku ku ni u ihala ɓa jaspa ɓai karneli. Nyam la bǝ kuri ɓi. Nyam ɓǝ ɓaman emera. ⁴ Bapi bǝ kurǝ ɓi le nǝngkurǝ la hyua iriu nanya, ɓa le vanga la hyua iriu nanya ku ku, ai ya le nǝng'yanǝng a vǝu, ɓa lei nǝng'baiku a hyumrǝ vai yiva. ⁵ Ku nǝngkurǝ ɓi, le hyimrǝ ɗua i bǝbi, ɓai le bwabǝ, ɓai gamvau dǝ gbamrǝ. Le ɗua la hyĩiu dǝ ngarǝ ci bǝkurǝ ɓi, le ɗua bǝng le kwang vǝ Fi hyĩiu. ⁶ Ci bǝ kurǝ ɓi, gǝlass la hyumla ɓaman kristal. Bapi ɓai tangsǝ bǝ kurǝ ɓi, le nǝng aka la hurǝ lei la, nǝng lei dǝ ɓabǝ ci ɓai cwa. ⁷ Tangsǝ le nǝng ni, a na'nwaci sǝu ɓamang hywia, nǝng na'iu sǝu ɓaman hĩau, nǝng nata sǝu, pwaciu ihala ɓai yivǝ, a nǝng nan'nya sǝu ihala ɓai zhĩnzhĩ nǝ dǝ yaye ni. ⁸ Le nǝngnǝ hũhũrǝ kule nan'nya nǝ, kon aka cing ha tangsǝ le la ɓai kantsæ kǝ hyicwung, nǝng yisǝ le hyua ɓai ye kǝ. Ingvyĩ ɓai ɗuafi ei kǝi lǝu de na a, "Garangrang, garangrang, garangrang kǝ Fi ang'nga nǝ la vǝɓi nǝ ́ɓai susue nǝ, yivǝnǝ la ɓai yivǝnǝn wurǝ nǝ. ⁹ Nǝ le nǝng nǝ hũhũrǝ nǝ dǝ ngarǝ, ei kă, ei nga kǝ yivǝnǝku kukai ni, yivǝnǝ ku ka'ing bǝ tǝngrǝu yaun, ¹⁰ yang le vang'nga ɓǝ fa bai hyua ci yivǝni ku ku kai ɓini. Ei bai hyua ci yivǝni hũhũrǝ ku ka'ing bǝ tǝngrǝ vau yaun nǝ, e ai le nǝngbǝiku yiva kule ci bǝ kuri ɓi a, ¹¹ "A kem yang bǝ mua ngarǝ ɓai kărǝ ɓai tsarǝ Yicueva ɓi ɓai Fi ɓi. Ma mă le nǝng kpam, yua ma dǝ, nǝng ɓǝi fuu nǝng ɓai mă le.