¹ Tsǝng tangsǝ le malaika hwĩ'iu nǝ mua le basain hwĩ'iu nǝ wu nam bi, "A wu min taa nasǝ kitani ei cue kǝ gwang yihai gbaka ni ku kule mǝng ni. ² Le yiva fangwam cueyua ɓaiu kǝ. Mim cueyua vauɓǝ nǝngɓǝ hyia levǝnǝ ku fangwani." ³ Nǝngɓǝ malaika ɓǝ ɗǝm tangsǝ KwangFi takǝ ɓǝngvu, nǝngɓǝng ɓa yihai la ku ku hyĩamɓǝngvu ɓǝ la kahyĩe le ing a ɓai le hi sǝu. Hyĩamɓǝngvu ɓǝ iku ku ni hwĩ'iu. ⁴ Yihai ɓa yanǝng sǝ baman ɗuo ɓǝi ka kahyĩe. U ya nǝng zinariya, le tai hyirǝ, ɓa le tai vau. U mua yilang nwămǝng zinariya naun yila ɓa le nǝng-aɓai ɓa le ɓiyǝu cueyua vau. ⁵ Nwãku ei vyĩ ing akala bǝ ibǝrǝ zhĩ'ing: "Babilon angã, yicirǝ vai cueyua ɓa le nǝng ɓieu nǝ fangwam ni." ⁶ Mɓa yihai ɓǝ nwă hwyĩ vai nǝ levǝ nǝ dǝ muacua Fi nǝ ɓa levǝnǝ ɓui bi Yeso nǝ. Mɓau nǝngɓǝ tsǝɓi muam. ⁷ Malaika ɓǝ nambi, "Ɓa cue kǝ tsǝɓi mua? Min n ɓuanyi yihai ɓǝ la ɓai hyĩamɓǝngvu nǝ ɗǝurǝ nǝ, hyĩamɓǝngvu nǝ ku hyĩ'iu, iku hyua nǝ. ⁸ Hyĩaɓǝngvu nǝ a ɓa nǝ viɓi u la, susuenǝ u yaun, u bapi bǝ irǝng tang ɓua ni bǝ tǝngrǝu yang nǝ. Yang unta bǝ nǝuniu levǝ nǝ ku fangwam ei vyĩ ing le lǝu tangsǝ Kwangdzua Hũrǝ ni kǝi bakǝ ɓuanyi fangwam nǝ, tsǝɓin mualeng mua nǝ ne ɓai hyĩaɓǝngvu nǝ la vǝɓi, susue nǝu yaun bapi bǝ irǝ nǝ sai sǝɓi muale. ⁹ Anǝ dǝ ɓabǝ nyi-nyi yiurǝ. Le ku hwĩ'iu ɓǝ le ɓi kǝ le gum hwĩ'iu nǝ yihai ɓǝ ku ku ni. ¹⁰ Lekǝ le yiva hwĩ'iu. yiva nahwĩ, yivǝ tsǝng la ɓai yivaka tsǝng wulau lada, nǝ wung un dzi cwuni bwasǝu. ¹¹ Hyĩamungvu nǝ la vǝɓi, u yaung susuenǝ, u ɓu kǝ yiva a nǝng hwĩ'iu, ung tang bǝ ɓuirǝ vǝunta ¹² Le iku hyua na ɓanǝ le ɓi kǝ yiva hyua nǝ mua hyuaa na lau, tang awa tsǝng ei mua tsǝrǝn mua a ei memkǝ le yiva cwahai bai hyĩamɓǝngvu ɓǝ. ¹³ Ɓai nyi-nyi tsǝng le kpam ei dǝ ngãrǝ ɓai tsarǝ vai kǝ hyĩamɓungvu ɓǝ. ¹⁴ Eing taɓuii ɓai Yinǝngbungam ɓǝ, Un tangleng tang ɓai ɓui ɓǝkǝ, nǝngnǝ cue Ung Yicueva vai yicueva, Yiva vai yiva. Cwahai ɓaiu leva ɓǝgang nǝ u ɗubǝ nǝ ɓa levǝnǝu u ci le nǝ. ¹⁵ Malaika ɓǝ na a "Mǝngnǝ ɓa lyihai ku ku ni nǝngɓǝ kǝ levǝ, le djung, le hyua, le nwa. ¹⁶ Le iku hyua na ɓa nǝ, lei ɓai hyĩamɓǝngvu ɓǝ ei la yihai ɓǝ. Eing deiung dei, ei yanǝng ɓwua'nyĩm. Eing tang hyĩam sǝu, eing tsuam mu ɓai ɗua kǝ. ¹⁷ Fi djǝ nyi-nyi le ei cue nǝngnǝ yua ngwala nǝ, ei gwala ei dǝ tsarǝ vai kǝ hyĩamɓǝngvu ɓǝ muale na sai bivǝ Fi yila ɗakǝni. ¹⁸ Yihaina ɓa nǝ uɓu kǝ vangã nǝ mua le yiva fangwam na ni.