¹ nǝng mɓa Yinǝngbungam dji ku Tai Zayon. Levǝ la cuahai ɓaiukǝ ni 144, 000, levǝnǝ ei ing vyĩ ing Da vau nwãku le. ² Nli wui ɗuiye dǝ gwa ɓaman wui le mǝng kpala ɓa le wui gamvau. Wui nǝng li nǝ ɓaman yivǝ bga garaya dei bgarǝ. ³ Ei lei ɓim a fu ci kakurǝ ɓai ci le nǝngnǝ hũhũrǝ nang'nya nǝ, ɓa le vangã ni. Yivaka yaun ina ɓim ɓǝ sai levǝnǝ ei lia le tangsǝ fangwam ni. ⁴ Leɓi kǝ levǝnǝ ɓankǝ sǝ le ɓa le hai lau. Ei mua kule sǝ bǝ cue nǝng afam tang fangwam. Leɓi kǝ levǝnǝ muacua Yinǝngbungam bǝ ha dǝu tala nǝ. Leɓi kǝ levǝnǝ ei lia le na'nwaci ɓǝng zaivǝi kpam kǝ Fi la bai Yinǝngbungam. ⁵ Ei ci le ɓai nwã'iu lǝu; nǝng'aɓai vai yaun. ⁶ Mɓa malaika ka dǝ yarǝ ɗuafi, yivenǝ la ɓai bie larǝ nǝ bǝ tǝngrǝu yaun nǝ, u tai nwã kǝ levǝnǝ la ku fangwam ni, leva kuhyua, nwãkava ɓa levǝ. ⁷ U ɗubǝ ɓai wui, "Ɓa ɓiɓi Fi ɓa dǝu ngãrǝ. Finǝ la ung cuekǝ kita vau nǝ wung. Ɓǝ hyĩau, yivǝnǝ ma ɗuiye, fangwam, wãm, ɓa le bǝ ɓurǝ vai mǝng." ⁸ Malaika nǝng na'iu muacua dǝ na a, "Ong, Ong Babilon angã, yivǝnǝ djǝ nwã le kuhyua kpam ei nwã mǝngka mua nyi-nyi aɓai." ⁹ Malaika nǝng nata muacua dǝ na ɓai wui a, "Nǝ yivaka la hyĩau hyĩamɓǝngvu ɓǝ ɓai kwang'u nǝ mua nǝngtamnǝng nwã pwaciu ko kanau, ¹⁰ Ung nwã mǝngka ci vǝ Fing nwã, mǝngka nǝ ei ai tangsǝ yilang'mǝng vǝ Fi. Yivǝnǝ nwã, ung nwã yiɓai tang ɗua ɓai bwaɗu ci Fi ɓa le malaika vo ɓai ci Yinǝngbungam. ¹¹ Hwyĩɗua nǝ dǝ le yiɓai nǝ i ta ɗuiye ka'ing ka'ing. Ei yang'wa ɓai hũrǝ ɗuafi ɓai ingvyĩ, leɓi kǝ levǝ hyĩau hyĩamɓǝngvu ɓai kwang'u. Lebi kǝ levǝne mua nǝngtamnǝng ing'u. ¹² Bǝnǝn dǝ ɗubǝ tsarǝ munya vai vǝ kǝ levǝnǝ dǝ muacua Fi nǝ, levǝnǝ mua bivǝ Fi ɓa levǝnǝ djǝ nyi-nyi sǝ Yeso ni. ¹³ wui ɗuiye na a, "A vyĩ: Levǝ nǝ ɓui tangsǝ Yicueva ni levǝ larǝ." "Ã," KwangFi na, "yang kǝi ci hũrǝ ku nwacum vai, nǝngnǝ cue nǝ, nmuacualen mua." ¹⁴ Mɓa nǝngɓa ci la kavau. Yivǝnǝ ku ku ni ihala ɓai Yi Yivǝ. U la ɓai nǝngbaiku zinariya ku nǝngɓǝu mua hwyãm kanau. ¹⁵ Malaika ka i kom vǝ Fi, u ɗubǝ ɓai wui kǝ yivǝnǝ la ku ku ci ni: "A ɗǝ hwyãm ma anaci ɓǝ kinǝng. Vi bǝ kinǝng wuyang, le nǝng nwãbǝm ɗuang'yang fangwam." ¹⁶ Nǝngɓǝ yivǝnǝ ku le ku ci ni yinasǝ hwyãm vau ku fangwam, nǝngɓǝ ei ki fangwam. ¹⁷ Mɓa malaika la i komfi ɗuiye, u la ɓa hwyãm a lemrǝ. ¹⁸ Malaika ɓa ka i ku bagadi turare, yivǝnǝ dǝ la ɓai tsa ku ɗua ni. U ɗubǝ ɓai wui kǝ yivǝnǝ la ɓai hwyãm a lemrǝ naun ni, "A ɗǝ hwyãm a lemrǝ ma a gam kǝ le mǝngmi ka inabi fangwam, le mǝngmi kaɓǝ ɗuang." ¹⁹ Malaika ɓǝ yi nasǝ hwyãm vau fangwam, nǝngɓǝu ki kǝ le nǝng'nwã kabǝm fangwam. U wa tang fangwam gwang bǝ dei kãm mǝng inabi vǝ cieburǝ vǝ Fi. ²⁰ Ei tam bǝ kãm inabi ɓǝ cua vai, hwyĩ dǝ ɓurǝ bǝ ni dei kãm inabi ɓǝ la nǝ, takǝ vyĩrǝ nǝng nwãɓi ɓua, kem mel 1,600.