¹ Gwang nǝngɓǝ la ei ɓa ɗuiye: yihai ɓǝ tsăsǝ ɓai fiedjũrǝ ɓai fiehwĩm kabu ɓa le nǝngbaikun djǝng ni hyua iriu na'iu ku. ² U ɗǝ yua nǝngɓǝ dǝu tataa nǝngzhĩ ci yi. ³ Nǝngɓǝ nǝng aka i ɗuiye: A ɓa! Gwang dzau ka ka hyĩ ɓai le iku hwĩ'iu ɓa le nǝngmuaku ni hyua. ⁴ Kahĩng'u gba le djĩng ɗuiye walekǝta hyua. Djǝu ɓǝ dji ci yihaini dǝ tanǝngzhĩ yi nǝ, yang nǝu ci yi ɓǝng kǝri tang yimong ɓǝ. ⁵ U ci yă yiɓui, yivǝ nǝn mua leva hapkam fangwam ɓai kaɓi vau. Ei ɗǝ yi yihai ɓǝ ei takǝ tsǝ Fi ɓai ka kurǝ vau, ⁶ nǝngɓǝ yihai ɓǝ hwii ta ɓǝngvu, bǝnǝ Fi mau la nǝ, yang kǝ djinǝng sǝu bu 1,260. ⁷ Nǝngɓǝ ɓui i ɗuiye. Mikailu ɓa le malaika vau iku djau ɓi, djau ɓǝ ɓale malaika vau iku le. ⁸ Djau ɓa tsa bǝgang nǝn tangkǝ ɓui ɓǝ lau. Ba ka yaung ɗuiye bi vau ɓa le malaika vau. ⁹ Gwang djau ɓǝ, djau a kwi nǝ de ɗu kǝ, yivǝ nǝng aɓai kon Mungkulung nǝ djǝ nwa fangwam kpam nǝ, ei wuo kǝta fangwam ɓa le malaika vau ei wale kǝta hyua. ¹⁰ li wui ɗuiye bai tsa kǝ, "Susue nǝ yuangrǝ Fi, ɓai tsarǝ, ɓai va vǝ Fi ɓi ɓai tsarǝ vǝ Kristi vau wung. Yivǝnǝ dǝ dei le hwĩ ɓi nǝ ei wokǝtang hyua, unǝ dǝu dei le kǝ viha ci Fi ni. ¹¹ Ei taung ɓai hwyĩ vǝ Nǝngɓungam bai bi vai. Le nwa bwa yiɗi hũrǝ le lau. ¹² Ɓa li larǝ ɓa nǝ le ɗuiye ni ɓa le vǝ nǝ ku bǝ bi ni. A ɓa tǝng'yang ɓa levǝ nǝ ku fangwam ni, ɓai nwãm, yivǝ nǝng aɓai wung sǝ ɓa, ɓai ci buarǝ, u ibǝng nyi bu kpaun. ¹³ Djau ɓa ibǝ ei wau kǝta hyua, u nyam cwa yihai nǝ ci ya yiɓui nǝ. ¹⁴ Ei de yihai ɓǝ le nwakangtsãin na'iu nǝun yakǝ ye ɓaman zhĩngzhĩ nǝ, yang kǝu ta bǝ nǝ ei mau la ɓǝngvu ni. Bǝ ɓa nǝngɓǝ eing djining sǝu bǝ bi a vie cuani bai nwõ bǝ ni djau ɓǝ yaun nǝ. ¹⁵ Djau ɓǝ pãm mǝng kǝta nwã ɓaman nwãm yang kǝu ikǝ mǝng gbamrǝ nǝ wun hyia yihai ɓǝ nǝ. ¹⁶ Nǝngɓǝ, hyua yung yihai ɓǝ. Hyua ã nwõ mi nwãm nǝ djau ɓa pãm kǝta nwõ ni. ¹⁷ Nǝngɓǝ djau ɓǝ i ɓai ci ta bǝn taɓui ɓa le yi yihai ɓǝ. Levǝ nǝ mua bi vǝ Fi nǝ ɓa le vǝ de nabi Yeso nǝ. ¹⁸ Nengɓǝ, djau ɓǝ dji ku hyuang'hwyĩ.