¹ U nale la a, ''Bi-agang dǝmin naɓala, leivaka tangsaɓai eiba eibǝn ɓuau ha dokǝ ei ɓa VahvǝFih wu ɓai samɓai.'' ² Chuabou hyuĩ'chung, Yeso ɗǝ Bitru, ɓai Yakubu, ɓai Yahona, cuahei ɓaukǝ ei chuatei. Nǝngɓǝ u pyamsǝu chile. ³ Nǝngyasǝvou memkavou, vou'la, vouha yiivǝ nǝnglonǝng yaung an lonǝngvou manǝngɓǝ. ⁴ Nǝng lei Iliya ɓai Musa i'fũchile, nǝng dǝ nabi ɓai Yeso. ⁵ Bitru gwawua nǝng na Yeso a, ''Rabbi, hyi'ing ɓila ɓǝni, ɓinma kum nina'taa, atsing amaa, atsing a Musa, atsing a Iliya.'' ⁶ (Don u bǝnǝngnǝ un narǝnǝlau, don siɓi mualen.) ⁷ Le'n chĩ, wulamkule, nǝngɓǝ wĩ dǝ nabi tangsa chĩɓi a, ''Yiivǝnǝ kǝ Yiimnǝ dǝmin yiɗi, ɓa liu. ⁸ Dangla, eimem eiɓa ɓǝ, eiɓa Yiivakalou, ɓuasǝun Yeso. ⁹ Nda dai chũrǝ ku teiɓi, nǝngɓǝ u nale a bi'ai nakǝ yiivakalanka nǝngnǝ ai ɓanǝ, sainǝ Yii Yiivǝ i'ɓua ɗǝikǝni. ¹⁰ Ai ɗjaɓiɓa ɓuale, langǝ dei nakǝhala a ''nɓakǝ bǝ'iɓuaninǝ'' dǝnufii? ¹¹ Ei-ɓiubi a, ''Nɓakǝ lei-viinǝng na'a Iliya nwu nawachi?'' ¹² U nale a, ''manǝngɓǝ Iliya wungnachi, wu fakǝ nǝngkpam. Nɓakǝ ei vii' a Yii Yiivǝ ncueyiɓai nǝngkpalau, ein ɗǝu ɓaman nǝng-afam? ¹³ Dimin naɓala, Iliya riga wung, nǝng ei cuenǝngnǝha hualei dǝ yiɗi ɓaukǝn, kǝwua yanda kwangɗju na bivounǝ. ¹⁴ Nda u fauta sǝlei muangɓuivou, ei ɓa zaivǝ kpala kwaile dǝ tsawua ɓalekǝ. ¹⁵ Nda ei ɓa Yeso, zaivǝ kpam siɓi muale nǝng ei hwijum ei-wusǝu waijzamu. ¹⁶ U ɓile muangɓuivou, ''Nɓa dǝ ɓatsawua kuu?'' ¹⁷ Yiivaka tangsa zaivǝɓi ɓiu a, ''Rabbi, nwukǝ yiim kǝsǝma. U'la ɓaihuakǝ nǝ ubaunabiunǝ. ¹⁸ Nǝ vǝuyang lang, ɗǝu kpahya fufuk dǝ'i'wu, dǝu tang-iusǝhai yang sǝutsala. Nnalei muangɓuima nakǝ ai iu'kǝ nǝng ai bau.'' ¹⁹ U nale la a, ''Levǝ fangwam nǝ gwabiunǝ, ha nɗǝu min ku ɓaiɓakǝ?, ha ɗǝu min ɗǝmunya ɓaiɓa? Ɓawukǝ sǝm.'' ²⁰ Ai wukǝ yiimuangɓǝ kǝsǝu. Nda hyuaɓǝ ɓa Yeso, nǝng waukǝta dǝ vǝurǝ. Yiimuangɓǝ ohyua fufuk dǝ i'wua. ²¹ Yeso ɓi dahvǝ yiimuangɓǝ, ''ndau fuɗiu-la?,'' dahvǝ yiimuangɓǝ na Yeso a, ''tun'ukǝ yimuahang. ²² Dǝ leula ɗua ɓai mǝng yang lang dǝ yiɗi bǝ hyaurǝ. Nǝ nǝngla mamba mancuecuen, aɓa yiɓaiɓi, a yungɓi.'' ²³ Yeso nau a,'''In nǝ mambǝbǝng'? Nǝnghakpam ncuesǝncue, sǝyiivǝnǝ jza-niniulang.'' ²⁴ Tanghuaɓi dahvǝ yiimuangɓǝ kitaahyua tsala na'a, ''Nbaning, a yung bǝ banimnǝ yaungnǝ. ²⁵ Yeso ɓa zaivǝ kpala dǝwurǝ ɓai djum, u nyariku hyuaɓaiɓi una a, ''a i'sǝ yiimuangni bi a sake bǝ wusǝunka.'' ²⁶ U tataa ɓai wei, nǝngɓǝ u gayiimuangɓǝ tsala nǝng u'i. Yiimuang lue ɓama ɓuɓui, ha zaivǝ dǝ ɓana ''u ɓuɓui,'' ²⁷ Yeso muanau jzarǝbou, nǝng yiimuangɓǝ i jirǝbou. ²⁸ Yeso i'ta tangvah, lei muangɓuivou wu ɓiu tantã, ''Nɓakǝ ɓiba ɓi i'kǝ hyuanǝlau?'' ²⁹ Yeso nale a, ''Nǝng anǝ ba iu' sai bǝi aduwa.'' ³⁰ Ai pai bibi ei-muaka hua Galili. u yiɗi yiivǝka ibǝ bǝnǝ u lanǝlau, ³¹ don du ninasǝnǝng kǝlei muangɓuivou. U nale a,''En dǝ Yii Yiivǝn dǝ nale zaivǝ, nǝng en hyaun-hya. nei hyauyang bounataa, un i'i. '' ³² Ei-ibǝ biinǝ unanǝlau, langfǝ dei ɓiɓi bǝ ɓiurǝ. ³³ Nǝng ei wu Kafarnahum. Nda u ta-tangvah u ɓile a, ''nɓa dǝɓa nakǝ hala nǝngã?'' ³⁴ Nǝngɓǝ ei-kǝi. Don dei tsahawua nǝngã ku nwa kǝ yiivangã. ³⁵ Nǝngɓǝ u kuhua, u ɗuboulei hua-irǝu'na'iu ɓǝ cuahei u nale a, ''Yiivǝnǝ dǝ yiɗi bǝ jichiyang, un fa'un taacuakpam, un memkǝ muangsem veikpam. ³⁶ Nǝngɓǝ u dǝyiimuang kahang ujza ɓǝle. u ɗǝu kutsǝu nǝng u na a, ³⁷ ''Yiivǝnǝ mua yiimuangnǝ bi ing yang, u mom yang, u mom ɓuasǝulau, ɓai Yiivǝnǝ cuaminǝ langɓǝ.'' ³⁸ Yohana nau a, ''Rabbi ɓi ɓa yiivaka dǝ i'kǝ hyua ɓai ingmakǝ nǝng ɓi nyamu, bi u yaung ɓangɓi.'' ³⁹ Yeso nalei a, ''Biɓa nyamun ka, yiivǝ yaung ncuenǝng manǝngni ɓai ing ha wun na nǝng-aɓai kum. ⁴⁰ Yiivǝnǝha laɓilou, un aɓi. ⁴¹ Yiivǝnǝha dǝɓa mǝng-awuarǝ tangsa yilang bivǝ Kristi, kǝgang dǝmin naɓala, un chi ladavounchi. ⁴² Yiivǝnǝha cue tsing tangsa lei-muangni gwabimnǝ ou, painǝngla ei-tsa teinamnǝng dju, ei wau mǝng wuam. ⁴³ Nǝ kanama dǝ cue dǝma cuenǝng-aɓain, a cummu awakǝta. Painǝngla a taa vahvǝFih ɓai natsing, nda mantaa ɗuanǝ ba muiunǝ ɓai na-na'iu. ⁴⁴ Bǝnǝ lei sĩsĩsǝu ɓui langfǝ ɗuabǝ muiu. ⁴⁵ Nǝ kabouma dǝ cue dǝma cue nǝng-aɓaing, a cummu awakǝta. painǝngla ataa vahFih ɓai kaboutsing nda mantaakǝ ɗua. ⁴⁶ Bǝnǝ lei sĩsĩsǝu ɓuiu, langfǝ ɗuaɓǝ muiu. ⁴⁷ Nǝ nǝngma ncue mancue nǝng-aɓain, a ɗũ awakǝtaa. Painǝngla ataa vahvǝFih ɓai nǝngma tsing da manta ɗua ɓai nǝngma na'iu, ⁴⁸ Bǝnǝ lei sĩsĩsǝu ɓuiu, langfǝ ɗuaɓǝ muiu. ⁴⁹ Kon waha ein pyiuwuacuamvou ɓai ɗuakǝ. ⁵⁰ Ɗzakwaĩ la-ing, langfǝ nǝ larǝ ɗzakwaĩ yaungyang ,mancue ũ man memmukǝ laalai? Ɓachi ɗzakwaĩ tangsa ɓai, ɓa ku laala ɓǝlevǝha.''