¹ Kanǝ ei wu Urushelima, bapi ɓai Betafaji, ɓai Betanya, kutei Zaitun, Yeso chum tangsa le muangɓuivou na'iu, ² u' na lei a, ''Ɓa taa vah-ahangnǝ bapi ɓaiɓi kǝnǝ. Nǝɓatalang, ɓanchi yi vamdeila ai cueulaunǝ. Ɓa biu ɓa wumkǝla. ³ Yiivǝnǝha nǝ ɓiɓang, ɓanau naɓa Yicuevah dǝ yiɗi, ain fawkǝ ein wukǝwu.''' ⁴ Ai pai taichi yivamdei tsa nwanǝngã, nǝng ai biu. ⁵ Leivaka jilabibi nale a, ''Nɓa dǝɓa cuerǝnei, dǝɓa bii-yivamdei?'' ⁶ Ai nalela kǝnwa anǝ Yeso nale lanǝ. nǝng levǝɓa yile pai. ⁷ Lei mongɓui na'iuɓǝ wukǝ yivamdei kǝ Yeso la nǝng ai faa nǝngyasǝvai aiku yivamdeiɓi kǝ Yeso la kǝcũ. ⁸ Zaivǝ kpala ɓuile sayinka vai piangku nǝngã, laivaka piang yanka nǝ ai cum faa. ⁹ Leiva chi ɓǝ leiva ɗũ dǝ boubou, ''Hossana! Barka kǝ yiivǝnǝ wu tangsa ing YiicueVah. ¹⁰ Barka kǝ wurǝ vǝ Vah vǝ Dahɓi Dauda! Hosanna tangsa yekpam!'' ¹¹ Nǝngɓǝ Yeso taa tansǝ Urushelima u ta Tangkom gũFii, nǝng u ɓalenǝng kpam. Nda fiba, nǝng u pai utaa Betani ɓale huaruna'iuɓǝ. ¹² Nda bǝgaaka, ai faa Betani, vumdǝ hyaurǝ. ¹³ U chuila, dauɓa yanjka vai nuila, u wu boukaɓǝ ko rinchi chirǝvainchi, u chi nǝng-akalau ɓuasǝn le yanka, don nvi chirǝ vai lau. ¹⁴ U na' a, ''Yiivǝ yaun tang chirǝma aka.'' lei mongɓuivou li-nǝngnǝ. ¹⁵ Ai wu Urushelima u'ta tangsa kom gũFii, uba ni bǝnya leivǝ lyaɓainǝ, ɓai lei lyarǝu tangkom gũFii ɓi. U memka ɗzanǝng vaivǝ pem-saidei u bai, ɓai kakurǝ vaivǝ lya ɓai goo. ¹⁶ U gwalau yiivaka lya ɓai nǝng tangkom gũFii. ¹⁷ U nale a, ''ai viilau manǝngɓǝi, Vam kǝ bǝ gũFii vai zaivǝh? langfǝ ɓa memmukǝ ɓua vai nǝng-inǝng. '' ¹⁸ Lei kunlau angã ɓǝlevǝ vĩnǝng lĩ-nǝngnǝ u'na nǝn, nǝngɓǝ dei ɓabǝ nǝngã hyirǝvou. Dei ɓiɓivou bivǝ ɗung-ɗung zaivǝ dǝ lilarǝ bǝ ninasǝnǝngvou. ¹⁹ Nda ɗunɗui cue, nǝngɓǝ ai yi vah-agãɓǝ. ²⁰ Nda dei pairǝ nwaɗjuɗi, nǝng ai ɓa kavaiɓǝ chi-ha takǝn le-yommu. ²¹ Bitru kem nǝng na'a, ''Rabbi, aɓa, kanǝ a laniu'nǝ uɓuin.'' ²² Yeso nale a, ''Ɓa ɗza-ninisǝ Fii. ²³ Bi-agang dǝmin naɓala, Yivǝnǝ ha nabi kǝ teinǝ a ,''I' ata ta omǝngwuam, 'u na ɓai nini-tsing langfǝ u gwang a nǝngnǝ rinang cuesǝncue yang, Nǝngɓǝ Fii ncueɓala. ²⁴ Dǝmin naɓala; Nǝngnǝha ɓa gũ, ɓai nǝngnǝ ɓa ɓibǝn, ɓa ɗzaninila ɓan-chichin, yang memkǝ aɓang. ²⁵ Nǝ aji-bi'agang a gũ Fii, yang ayilasǝ nǝng-aɓai tangsa mai yivǝ yang, lanɓǝ Dahma ɗuiyeni lonǝng-aɓaiman loo. ²⁶ Nǝ ɓa ainǝng-aɓaiha kǝtan, Dahɓǝ ɗuiye n'ainǝng-aɓai ɓan'aikǝta. ²⁷ Ai fa, awu Urushelima, nǝngɓǝ Yeso dǝ hũrǝ tangkom gũFii, nǝngɓǝ kunlau-angã, bǝle viinǝ, bǝle vangã wusǝu. ²⁸ Ai nau a, ''Ɓai samɓaivǝwa, dǝma cuekǝ lei nǝngnǝ, nwa da samɓai cuerǝu?'' ²⁹ Yeso nale a, ''Min ɓiɓa bi tsing. Nǝɓa namlang, mima min naɓala ɓai samɓai wakǝdǝmin cuekǝ nǝngnǝ. ³⁰ Baptisima vǝ Yohana, aɗuiye kon a zaivǝ? ɓa namla.'' ³¹ Ai banhala ɓuahai, nǝ ɓi na nakǝ a ɗuiye yang, u na a nɓakǝ ɓi dǝ bi-agang lalau?' ³² Langfǝ nǝɓina a, lansǝ zaivǝng,...''Dei ɓiɓi zaivǝ, don zaivǝha gwang Yohana nyiitachum. ³³ Nǝng ai na Yeso a, ɓi ibǝlau.'' Nǝng Yeso nale a, ''Langɓǝ nba naɓala ko ɓai samɓai vǝwa dǝmin cuekǝ nǝngnǝu.