¹ Buluj kpakkan niyono Yeesho Kiriti, birang kan an moli Timataawush we war shikno Pilmon, an jeere ye min leka, birang kan an jeere ti ta shuran, ² kan Aafiya an jeere shuranmu, kan Arkiifush an jeere shuranmu ti ku-dam gei, birang kan me an balla me shinui ti gali ti minako. ³ Kunngu kan kuttan-shaari ti piree kan Fo-mina Yeesho Kiriti mo deeju ti kuuko. ⁴ Kpaaliya ding ne ti pammina ti Yammano ye maa nei ta for-fok, ⁵ longku ne yaaraa wee ti ku li-shaari ye ma kan te ti piree kan Fo-mina Yeesho kan lewan ye ma kan te ka longku memme me shaanani ding. ⁶ Ne ti for-fok na diyo gale she li-shaari mo yooro bang ti shikno koo nong longku pen koo ween kpang ye ti ta aamu kan ti taano Kiriti. ⁷ Longku ne yuwaa beere gbe kan keman shaari ka longku lewanko, longku po-shaari me shaanano Yamma kuttaa ka longkuuko, ta mol. ⁸ Longku kaa te, kaa ye ne deeno ka deri ti taano Kiriti ka we pekroko ka we ya wee nennaa ken ya, ⁹ kan ye kaa teerei, ka longku lewan, ne Buluj, kooro niyo ye wende kpaakii ti ta mina-muruk ka longkuuno Kiriti Yeesho, ne benngako. ¹⁰ Ne ti ku telko ka wee ti ku laano, Yunishimush, ye nei foni ti ta we-eem kpakko. ¹¹ Longku ka toom a doo shuran kuunim, pene wende shii kan shuran kuuni ti piree kan ke kan ne. ¹² Ne shuraa gunnii birang ti shikko, shi ye shii ti poshaarino kping. ¹³ Ne leka ne daa yikka shii ti jeleno longku shii in yiu yuuno shuran ka po-shooko, ti ta koddi ye ne kpakkii ti ta jaklan we-eem ka longku shinnyi yen tomon. ¹⁴ Pene nei lewo nen ya manni wei a gale kan penankom. Nei lewo shuran yen kpang in yooro we pesshanum, pene ti nyimmo yen kpang. ¹⁵ Kergum ka longku peenno tei ye bwaaraa ma po koddi la-wiiu, longku ken meerin ka shii po-ding. ¹⁶ We yikka wende a ta yooni shookum, pene mo yeka shook, tenei ye yaa lewan an moli. Shii lewani kulli toom-toom ti piree kan ne, ar kookaro ti foki ti piree kan ke ti ta lo-shik birang kan ti taano Fo-mina. ¹⁷ Longku kaa te, ke maa yikkano ka jeere an shuran, oo, yiu shii kaa ne. ¹⁸ Ma shii maa daklaako koo ke ta yiu biini jan, telo piri ti kirano. ¹⁹ Ne Buluj, ne ballaa we te ka kirano. Ne po kuuno ne ta anngani, a ye ta tewani ne ta yiu biiko sheekom! ²⁰ Oo, ta mollo, yuuno wen kpang ti ta shommono Fo-mina; ken li poshaarino in we nessho ti taano Kiriti. ²¹ Longku kaa te, ne kan penan gun murkuuko, ne ballaako. Ne penaa ke ta ya wee kookaro ti fok wee ne bennga. ²² Ar wende, limmano-po duro. Longku ne ti ku bengo ti piree kan for-fok, a ta diyoni bakum ta meerin nen piree kan ma. ²³ Abaafarash, an jeere for shunano ti taano Kiriti Yeesho, kaaka ma. ²⁴ Kaa te, ta ma Markush kan Arishtakush kan Dimash kan Lukka, me an jeere shuranno. ²⁵ Kunnguno Fo-mina Yeesho Kiriti mo deero kan shoom ma. Mo yooro kaa te.