¹ Si eyi pẹngwụ awụ nini, doti asi ọviki waa mẹ ụkọrọ ọiza inọvidi aza, fụvọ de zu rewụ nini. Aa vavọ yọ, we ze re ọgụ dọ fini ụvọ Adawụ ana yi ineekụ. ² Fụvavọ, waa mọiza, asụ showụ ẹngwa awụ, vene ọfatụvakụ nini mẹẹ mẹ ini Isinagọgụ, ọnri inorere, di aza ẹzụ ga wa. Irẹiza ma ka yụ wụ nin ka, ẹẹ dọ ọgụ anini da. ³ Ama, waa mẹ ọiza, asụ zẹẹ ki ụvọfa awụ ọọ yẹ isa ọni ụvọri awụ aa mẹ. ⁴ Doti ọiza ọnụ waa mẹ ọvi ini angwụmi. Adawụ ene rewụ ini angwụmi, vee si ọgụ aani yụ wụ. ⁵ Waa tụozụrenụ, asụ mẹ vene ọfatụvakụ nini. Fụvọki ee si ki ẹnẹ dinẹ tụozụrenụ ini Isinagọgụ ọnri ini orere di aza e zụ ree wa. Irẹiza ma ka yụ wụ, nini ka ẹẹ dọ ọgụ anini da. ⁶ Ama, waa tụozụrenụ, ngwụ irẹngwụ awụ na, gụoze awụ, dụ wa tụozụrenụ shi Ada awụ ana yini angwụmi, ụmọnọ Ada awụ ene ree ẹtẹ ini angwụmi vee si ọgụ aani yụ wụ. ⁷ Waa tụozụrenụ nini, asụụ vatụra irẹyi kẹnẹ kẹnẹ nini, vene Ijẹntaini nin mẹẹ mẹ, fụvọki ee ro ka a vaa wụ ozụrenụ anini fụvọ irẹyi ọrụrụ. ⁸ Fụvavo, asụụ fama wa, fụvọki Ada awụ nin ọ yẹ isẹnẹ ọvọrọ kụ wa nyi, dụ va tangwa fisụe nini. ⁹ Fụvavọ, wa maa ni tụozụrenụ nini; Ada ayi ana yi ineekụ, ya da yi irẹsha wụ. ¹⁰ Navọ di ijọva awụ ọ vẹ. Di ya mẹ osisi awụ inẹshẹ venebiri ọ mẹ ya ineekụ. ¹¹ Si isari irajini yi yi. ¹² Si aichamai ayi vaya ayi venebiri imẹ si aichama azẹnẹsa vaya anini. ¹³ Asụụ zayi nangwụ ini amore, ama dọitụ fini ụvọ aza ẹshimi. Fụvọki ijọva vi ayi awụ, ụkata vi ayi awụ, ụga vi ayi awụ, poro-pooro. Aami. ¹⁴ Fụvọki waa si aichama aza vaya anini, Ada awụ ana yi ineekụ, dọ zẹ si aichama wụ vayawụ. ¹⁵ Ama, waa zi si aichama aza vaya anini, Ada awụ ọizụa si aichama wụ vayawụ. ¹⁶ Waa ba awẹ nini, a sụụ sụ-eyi vene ọfatụvakụ nin anaa vẹngwụ shi doti aza ẹ zụ yẹ ki ẹẹ ba awẹ. Irẹiza ma ka yụ wụ, ẹẹ dọ ọgụ anini da. ¹⁷ Ama, waa bawẹ nini, nyineyi awụ, dụwa si angwẹ mụna eyi-irẹsụ, ¹⁸ doti asi azẹnẹsa yẹ kụ waa bawẹ nini, ọchishi Ada awụ nin ana yini angwụmi kẹnẹ. Ada awụ nini enee re ẹtẹ ini angwụmi vaa si ọgu yụ wụ nini ini orere. ¹⁹ Asụụ kụ ogụ tẹ yi ẹngwụ awụ nin inẹshẹ, izi idegụ ve zụ dụo sha, do ze kụrẹ ọnri ki izẹni oyi va zụ chaka, do ne yi o. ²⁰ Ama, kụ ogụ tẹ yi ẹngwụ awụ nin ineekụ, izi idegụ rai zụa dụo, do ze kụrẹ, di oyi nini rai zụa chaka ireshi nee yi o. ²¹ Fụvọki izi ogụ awụ nin raa ya, izọ ọni ọtụtụrụma awụ nini zẹ va yi ya. ²² Iri vi ọpa yi ẹngwụ ọza. Fụvavọ, iri awụ oo zoza, ẹtofei vaa ngwụ ini ẹngwụ awụ bo. ²³ Ama, iri awụ oo dụvi, ẹngwụ awụ bo ve shi yi oozi. Fụvavọ ọọ viki ẹtofei ana yini inẹ awụ vi oozi obooro, oozi ọnọ mẹ va bani tụ kẹ! ²⁴ Ozenya ọi zụa fẹkẹ ọga ẹẹva, fụvọki ọ vaa kụayi ọnya, doo si irẹyi ọsa; ọọ zivọ vavi, dọ kụayitụra ọnya, dọ vasi eyi wụ ọsa. Wai zụa fẹkẹ Oshomoshi, dụ zaa fẹkẹ ogụ. ²⁵ Fuvavọ ma ka yu wu nin ka, asụ nyi ariro inọpati ẹshẹ awụ ka, sụ vaa ri navẹki sụ vee fụ ọnri ki sụ vee si kụ ẹngwụ nini. Ifẹ ọza we re zi fụni isari, navẹki ẹngwụ ọza we re zi fụni ita? ²⁶ Ree ụnomi nin ana yi ẹbẹẹba, e me chire, ẹ ma faa de ve ne pere tụni ụfọ, ama Ada awụ nini, ana yi ineekụ aa pa wa. Navẹki wa zi nyi ụbani fụni ụnomi nini? ²⁷ Yere ọnya ini awụ nin, ana vazụ zirẹngwụ afasha, dọ dụvọ ọnya tụni ifẹ aani kẹ? ²⁸ Sẹnẹvẹ dụ wa shafasha inọpati aụrụ nini? Roo irẹyi ododo ana chi tụni avi, ẹ mẹẹ fụ. Ẹzi makanya, ẹ ma ngwụ-owụ shi ita. ²⁹ Di ma kaa yụ wụ nini ka, Isoromọni mẹ nyi ụbani netu, azẹ zi mẹẹ ẹngwụ vene ọnya ini ododo ẹnẹẹ. ³⁰ Oshomoshi ra vọvọ si ụzoza kụ avi, ọnu wee re rajini, ama ụfụọ, de ne ngwụ ini ira, ụụ we ro ka ọizụa si ita ene zoza fụnavọ kụwụ ẹngwụ nini? Ọdọwụ awụ nini oo weyi. ³¹ Fụvavọ asụ shafasha ka, "Si vaa rii" navẹki "Si vee fụụ" ọnri ka "Si vee chire." ³² Fuvọki isẹnẹni ọni Ijẹntaini ee si zizi. Ada awụ nin ana yi ineekụ, ọ yẹ ki ọvọrọ kụ wa nyi isẹnẹni nini. ³³ Ama, bidi si ijọ̣va aani ọnri ọmimẹ-anasẹrẹ aani da, ụmọnọ, dọ vaa si isa anavọ bo tụọ yụ wụ nini. ³⁴ Fụvavọ, asụ shafasha fụvọ ụfụọ, fụvọki ụfụọ ọnọ vaa shafasha ẹngwani, ọkụshi ọza-ọza ọọ nyi ọshimi ana yi inaani.