¹ Ini ẹfi ọnọ di Ijesu karẹyi yi aza ọkọni ẹnẹ ọnri eziafụ aani. ² Dọ ka, "Ọyofi ọnri Ifarisi nin vana yatụ tụni irẹfụ Imosisi." ³ Fụvavọ ụmọ bo ẹnẹ ra ka yụ wụ nin, wa mẹ nini, dụ wa si eyi pe wa nini. Ama asụ fama isẹnẹ ẹ mẹ, fụvọki ẹ ma mẹ irẹyi ẹnẹ ka ki aza ẹẹ mẹ. ⁴ Irẹiza yọ, e kụne ẹnya ọrata, ọna ngwẹngwu ọziza, de chema tụra aza. Ama ẹni nyẹmbẹ ẹ za si ozigege ọnya kaniọ. ⁵ Isẹnẹ ẹ mẹ bo, vẹnẹ mẹ doti aza e ̣zụ re wa. Ampo ẹnẹ si gẹngwụ ana chẹri irẹyi Oshomoshi tu, vẹnẹ mẹ bani, dẹ zẹ gana utọ aụrụ anini. ̣̣ ⁶ Ee si irasha ọbani izẹni aza ra ya rụpe ọnri irẹfụ ọbani ini Isinagọgụ, ⁷ e ze si ki a kụ ẹni ụkụ renyi ini ofụ, doti aza ẹ shi ẹni 'ọzuọ-zisa.' ⁸ Ama, azẹ zi bẹdọ shụ wụ 'ọzụọzisa,' fụvọki ọzụọzisa ọnya ọnụ nyi nini, ẹwụ nin bo vi ̣ẹnyara. ⁹ Asụ shi ọzọnyọnyi Ada ini ẹshẹ, fụvọki Ada ọnya ọnụ nyi nini, Ada ọnọ vana yi ineekụ. ¹⁰ A sụụ ze zi zẹẹ ka a shụ wụ ọzuọzisa, fụvọki ọzụọzisa ọnya ọnụ nyi nini, ạna vi Ikrisṫi. ¹¹ Ama ẹzẹ ne re fụ ini akaakana awụ nin, ọnọ va vi ozida awụ nini. ¹² Ọza ana ̣ra si ẹngwụani tụẹba, vana va kaachi, ọza ana ra kẹngwụani chi vana va kashirẹ. ¹³ Ama, oodụụ kụ nin, ọyofi ọnri Ifarisi nin, ọfatụvakụ! Wee gụoze ineeku̇ ọiza shi aza. Ẹwụ nyẹmbẹ wa zi ngwụọ, wa zi navọ ki ene nesi kẹ naa ngwụọ, kẹ ngwụọ. ¹⁴ Oodụụ kụ nini Ọyofi ọnri Ifarisi nini, ọfatụvakụ! fụvọki we dụ ireshi osokụ nini sha, ụma mẹ ọsisi zụ ozụrenụ ọgọdọ. Ishọji ivi one fụ, ọnụ vee re dọ nini. ¹⁵ Oodụụ kụ nin, ọyofi ọnri Ifarisi nini, ọfatụvakụ! Fụvọki, wa jinẹ irefu nangwụ inẹte ̣dụ we re ki waa vara ọza ọnya, ọọ vara ọnya da, du zẹ mẹ avaavọ ẹẹva ki ọ vi ozi ineekụ ọrọkọtọ vene ụmẹ ̣ ya nini. ¹⁶ Oodụụ kụ nini, ẹwụ ogụri ọna zụ ọza oze, ẹwụ nin ana ka, "Ọzatụrọza ọna ra si itẹmpụrụ sheku, ọzi nyi isọnọ ọbẹrị, ama, ẹzẹna ra si igonụ tẹmpụrụ shiekụ," ọ ngwụ ireyi ekụ ọnọ shi." ¹⁷ Ẹwụ ogụri ọnụra nini! Yere onefu kẹ, igonụ navẹki itẹmpụrụ ọna mẹ ki igonụ ọvara ọnini? ¹⁸ Onri, "Ọzatụrọza ọna ra si ọpẹtẹ shieku, ọzi nyi isọnọ ọbẹrị. Ama ẹzẹna ra si isẹnẹ asi tụraa ọpẹtẹ shieku," ọ ngwụ inini irẹyi ekụ ọnọ shi. ¹⁹ Ẹwụ ogụri nini!. Yere onefụ kẹ, Isa ana si tu nẹsụ ọpẹtẹ, navẹki ọpẹtẹ ọna si isa vara ọnini? ²⁰ Fụvavọ, ẹzẹna ra si ọpẹtẹ shiẹkụ, va na shiekụ zi rẹ ọpẹtẹ ọnri isa bo ana yi inaani. ²¹ Ẹzẹna ra vaa si Itẹmpụrụ shiekụ, ọọ si Itẹmpụrụ shiekụ ọnri ẹzẹna ra inaani. ²² Ẹzẹna ra si ineekụ shiekụ, ọọ si, ogede Oshomoshi ọnri ẹzẹna ỵatụ tụni irẹsụ ogede ọnọ shiekụ. ²³ Oodụụ kụ nin ọyofi ọnri Ifarisi ọfatụvakụ nini! Wee si oche-ẹwu ̣inoze ẹnyi ọnri isẹpẹ, ama wa zi mẹ ọnasẹrẹ ini ofi nini, ọjiji ishi obooro, ayụva ọnri ọdọwụ. Ama isẹnẹni bo vọnọ vọrọ kụ wa mẹ bẹrẹ anavọ. ²⁴ Ẹwụ ogụri ana si aza zu oze nini, wa navọ ishishine ene weyi, dụ wa mụnẹ irankụmi ọvụọvurụ! ²⁵ Oodụụ kụ nin, Ọyofi ọnri Ifarisi nini, ọfatụvakụ! Fụvọki waa nyini irama ipa ọnri ọnyaa ọrisa nin, ama ininani oshi yi avụka ọnri osisi ẹchẹngwụ. ²⁶ Ẹwụ Ifarisi ogụri nin! Savọ nyini ininẹ ipa ọ̣nri ọnyaa ọrisa da nini, doti ẹshẹshẹ awụ nini nyẹmbẹ ọzẹ va zụ vara ọnini. ²⁷ Oodụụ kụ Ọyofi ọnri Ifarisi ọfatụvakụ nini! Fụvọki wee veni irikụta ene kụazi, di ẹshẹshẹ aani zoza, ama di ininani shi yi ọchụkụ aza ene su da ọnri isẹnẹ ra zi ni bo. ²⁸ Inoze ọnyọnya, wee vene aza ẹnaa mẹtẹrẹ ini eyi aza; ama inẹ awụ nin, o shi yi ofatụvakụ ọnri aichama. ̣̇ ²⁹ Oodụụ kụ, ọyofi ọnri Ifarisi ọfatụvakụ nini!. Waa da irikuta ọkisẹ, du ze teni irikụta ọmẹtẹrẹ nini. ³⁰ Waa kaa nin ka, "Aaviki, yaa yaan yi inẹshẹ ini ụmẹ adayi nini, yazi yaan va bẹrẹ wa nyi ụvọ tụni isu okisẹ nini." ³¹ Fụvavọ ẹwụ nin nyẹmbẹ, wa divenụ ki ezi azẹna wụ ọkisẹ ọnụ vi nini. ³² Ẹwụ ni nyẹmbẹ, waa si gu oshishi ọni ada wụ nini mẹ. ³³ Ẹwụ nin ana vi isẹchichi, dụzẹ vi ezi ibe, ụụ mẹmẹ va javọ fini ishọji ivi ineekụ ọrọkọtọ nini kẹ? ³⁴ Fụvavọ, ree, ma tụ ọkisẹ, ana nyi ụvira ọnri ọyofi shụ wụ nini. Ụva wụ ẹnyi nini, dụ kani wa zọchi, ẹnyi vọnụ ụ ve tụ ini Isinagọgụ awụ nini, dụ dụ ẹnyi jinẹ fini irekụra ọbani ọnya na ngwụ ọsa. ³⁵ Ọvarẹsụ aani ọnọvika, anya ẹzẹna mẹtẹrẹ bo ana ji shẹtẹ vana vaa vini irẹsụ awụ nini, fini anya Ebẹni ọna vi ọmọnasẹrẹ, nangwụ anya Izakaraya ozi Ibarakaya, ọna wụ inakaakana aka ọnini ọnri ọpẹtẹ ireshi Oshomoshi. ³⁶ Ini irẹiza, ma kaa yụ wụ nini, isẹnẹni bo vaa vini irẹsụ evereze ọnọni. ³⁷ Ijerụsanẹmụ, Ijerụsanẹmụ, ẹwụ ana wụ okisẹ nini, dụ nee rẹta shi ẹnẹna tụ shụ wụ nini! Ụpẹrika ya ọnim si si ki me pere ezi awụ nin vabẹ venebiri ọnyụshẹ, mẹẹ pere ezi aani tụni avaka aani, ama we zi voo si nini! ³⁸ Ree, ireshi awụ nin vana navọ yụ wụ nini ki ọ vạra osụsụ. ³⁹ Ma kaa yụ wụ nini, wei kụe re mi nini fụri ụmaani nangwụ efi ọnụva ka ki, "Ẹdabẹrẹ ọnọ vi yi ọna vẹ ini iresha Ananyiyi.'"