¹ Ijesu ọọ zẹ karẹyi yụ wa ini ushioche ka, ² "Ijọva ineekụ oo vene oshinọyi ọnya, ana kwẹnya ụpe ọnyi-nyi ọnẹẹ yi ozi aani. ³ Dọ tụ ezida aani kẹ na shi ẹnẹna tụshi kẹ vi nupe ọnọ, ama dẹ ra zi vẹ. ⁴ Di oshinọyi zẹ varama tụ ezida aani ọsa, 'Kaa yi ẹnẹna si iwe shi ka, "Re, ma mẹ isari tẹtẹ da. Maa zẹ wiwụ ụnọ ọrụrụ tẹtẹ ọnri ki mami isa anavọ bo da. Vee pe mi rupe nini.'" ⁵ Ama ẹ zi shọ irẹyi, dẹ zii na, ọnyi ọ si zi oze irarẹ aani, dọ sa si zi oze ofụ aani. ⁶ Di ẹnẹ ẹnavọ za ezidạ ẹnẹ, dẹ mụya rụwa rụshi rụshi, dẹ wụ wa. ⁷ Di ayikụ oshinọyi ọnọ, dọ va tụ ashoja aani, dẹ na wụ ọwụọza ẹnẹ, dẹ ri irẹkụra anini ira ⁸ Inaani, dọ kaa yi ezida aani ka, "Ẹfị ọnyi-nyi ọnẹẹ ọnọ o tu da, ama ẹnẹna tụshi ẹ zi bẹri. ⁹ Fụvavọ, wa ni noze ọbani, izẹni oze ya gẹ bo, dụ wa na shi ẹzẹnụ re re, ke ve pe mi rupe. ¹⁰ Di ezida aani jinẹ ni noze ọbani, de pere aza ene re gụ, shi aza ọiza, shi ọshimi. Di ireshi ẹnẹ yaa rụpe ọnọ, do shi yi aza. ¹¹ Ụmọni oshinọyi ngwụ ireshi ọni azẹga nin yatụ shi, do re ọnọrụ ọnyi izọ ene ra zi kụẹnya ana si sọnẹẹ. ¹² Di oshinọyi va kaa yọ ka, 'Ọtami, ụme re dụ ngwụ izọ naani vẹ, du ra zi kụẹnya ana si sọnẹẹ kẹ?' Ama di ọnọrụ ọnọ rai zụ voshi. ¹³ Inaani, di oshinọyi kaa yi ezida aani ka, 'Sụ ọnọrụ ọnọni rafụ rụvọ, du we nee jinẹ ngwụ ini oozi rim-rim, izi ayaa jorere, da kụra anyi.' ¹⁴ Fụvọka aza ẹrụrụ ana shi, ama aza chee ana nii. ¹⁵ Di Ifarisi nini na shọma ẹmẹ mẹ vee re Ijesu za ini rẹyi aani. ¹⁶ Dẹ tụ eziafụ anini beri aza Ihẹrọọdụ nin ne tu Ijesu. Dẹ ka, "Ọzụọzisa, yaa yẹ ki ọni irẹiza ọnụvi, dụ wa zụ aza oze irẹiza Oshomoshi. Wee me si ki ọza ọji zụwụ ọnri wa ma ni ọza remeyi inakaakana aza. ¹⁷ Kaa yi yi isuro. Ọ wa vọrọ ki yee si imaana yi Isiza navẹki ọzi vọrọ?" ¹⁸ Ama Ijesu ọ yẹ isa ọshimi ene rọ, dọ kaa yi wa ka, "Sẹnẹvẹ dụ wa mọmire re nin kẹ, ẹwụ ọjọza-vene nini? ¹⁹ Ẹ̣kẹshi imaana ọnụ dọ nin, si ọ zu mi." Dẹ va tu idẹnariọsi tu ẹshẹ zụọ. ²⁰ Di Ijesu fọọ wa ka, "Ẹnẹ nyi ụmọma ọnri irẹsha ọnọni?" ²¹ Dẹ voshi ka, "Isiza yọ." Di Ijesu kaa yụ wa ka, "Si isa ana vi ayi Isiza yi Isiza, dụ wa si ayi Oshomoshi yi Oshomo-shi." ²² Ụmọni ẹwụ ọnọni da, do shuweyi. Inaani, dẹ fi ida aani, dẹ na. ²³ Ini ọkụshi ọnọ di Isadụsi ẹnyi, ana kaa ki ọshisa kwẹtẹ ọzi yi naani, de vetụo. Dẹ fọọ ka, ²⁴ "Ọzụọzisa, Imosisi ọ kaa yi ka, 'Ọnọrụ ree su, dọ ra zi mozi, ọnyara aani ọnọrụ vaa kụo ose aani ogu doti ọ zụ mozi yi ọnyara aani." ²⁵ Ọọ nyi ẹnyara ishimba, di ọi paapa nyi ọnẹẹ, dọva nyi ko osụ, ama dọ ra zi mozi, di ọfụva kụo ogụ. Avọọ ọfụva ọnri ọfụta, pooro ²⁶ nangwụ ọfụ-shimba mẹ ya. ²⁷ Inamani, di ọnyẹnẹ ọnọ ve sụ. ²⁸ Ini ụmẹ ọshisha kwẹtẹ, ẹni ọnyẹnẹ ọnọ vaa vi ose aani, ini ẹni shimba ọnọ." ²⁹ Di Ijesu voshi yụ wa ka, "Wee nyeeyi nini da, fụvọki wa zi yi iwe ọnini ọnri ụkata Oshomoshi." ³⁰ Fụvọki inọpati ọshisha kwẹtẹ, ẹma nyọnẹẹ navẹki ọva. Akikọnọ, ẹ si mẹẹ angẹni ineekụ. ³¹ Inọpati ọshisha kwẹtẹ fini isu, ọnọviki wezi ri re ka, ini isa ọni Oshomoshi kaa yụ wụ nini ka. ³² "Ẹ ma vi Oshomoshi Abra-hamụ, Oshomoshi Aiziki ọnri Oshomoshi Ijakọbụ nini. Oshomoshi ọ zi vi Oshomoshi ẹni ene sụ, ama Oshomoshi ẹnẹna yizọ." ³³ Ụmọni aza ọkọni wụ ọnọni, di isa ọnọ zụ wa shụweyi. ³⁴ Ụmọni Ifarisi nin wụ ka Isadụsi nini e zi re oshi va yi Ijesu, de pere ẹngwụ gụ. ³⁵ Ọza ọnya ina anini ana vi ọyofi, dọ fọọ ipẹpẹẹ ọnọ si zama ree. ³⁶ "Ọzụọzisa, yere ụmọ ene fu keekere inofi kẹ?" ³⁷ Di Ijesu kaa yọ ka, "Si ọtụtụrụma awụ boo sirẹyi Oshomoshi Ananyiyi, vabẹri ifẹ awụ ọnri inẹ awụ." ³⁸ Ọnọni ọnọvi ụmọ ipaapa, ọni o ze fifụ. ³⁹ Ụmọ ụpọfụva, oo vene ọi ipaapa, "Sirẹyi ọnọfụva awụ vene ụmẹ sirẹyi ẹngwụ awụ. ⁴⁰ Inẹsụ ụmọ ẹviva ọnọni, ọ ni ụmọ bo ọnri ọkise ̣nini dinẹ tụ." ⁴¹ Ọmeyani Ifarisi nin me pipere gụ, di Ijesu fọwa ipẹpẹẹ. ⁴² Dọ ka, "Sẹnụ ro inọpati Ikristi nin kẹ?" Yere Ozi ọza ọnọvi kẹ? Dẹ voshi ka, "Ozi Idevidi." ⁴³ Di Ijesu kaa yụ wa ka, "Ọmẹzi di Idevidi ini ifẹ shọọ Ananyiyi ka, ⁴⁴ 'Ananyiyi ọọ kaa yi Ọnanyimi ka, "Yatụ tụni ụvọri ami, netụ kima mẹ ọnivi awụ izụ vaa kwafụ shi?'" ⁴⁵ Aaviki Idevidi ̣ọshi Ikristi 'Ananyimi,' ọmẹ vasi vi Ozi Idevidi?" ⁴⁶ Ọ zi nyi ẹzẹna zụ voshi irẹyi ọnọ ọnri ki fụri ẹfiavọ ọikụ nyi ẹzẹna zai ku fọ ipẹpẹẹ tụọ.