¹ Ijesu ọnri eziafụ aani maa kavape Ijerụsanẹmụ, de tụ Ibẹtifage ọgụri Irẹsụfa Onivi, inaani di Ijesu tụ eziafụ aani ẹẹva itụ, ² do kaa yụ wa ka, "Wa ni irẹkụra ana gụrẹyi nini, waa ngwụ izọ kẹne, ụ vee re ikẹtẹkẹtẹ ana za chire tụzọ bẹri ozi aanị. Ngwara waa, dụ wa za wa vetụ mi. ³ Ọọ nyi ọzạ ana karẹyi shi wụ niṇ inọpati aani, dụ wa kaa yọ ka, "Ananyiyi o sụ wa onino," ụmụmọ ọzọnọ vaa navọ ka kụ wa vetụ mi." ⁴ Isẹnẹni vana mẹ fụvọ di irẹyi ana ka tẹtẹ zirẹngwụ ọkisẹ ọ zu gẹ. ⁵ "Ka yi ozi Izayọni ọnyẹnẹ ka, 'Oshinọyi awụ nini aa vẹ vetụ wụ, ọza ana vẹngwụ shẹtẹ, dọọ shirẹ ozi ikẹtẹkẹtẹ."' ⁶ Inaani di eziafụ aani na mi isa ọni Ijesu kẹ mẹ. ⁷ Dẹ si ikẹtẹkẹtẹ ọnri ozi aani, dẹ tụ aụrụ anini tụra wa, di Ijesu shirẹ tura. ⁸ Ẹrụrụ ini azọkọni, de tụ ita anini tụ noze, di aza ẹnyi ji avọ ọchi, dẹ tụọ tuni oze. ⁹ Di azọkọni ana yi inọvidi ọnri irama, dee nowu ka,"Hosanna! ozi Idevidi! Ẹdabẹrẹ ọnọvi yi ọza ana vẹ ini irẹsha Ananyiyi! Hosanna ini ẹbẹẹba keekere!" ¹⁰ Ijesu mẹ ngwụ Ijerụsanẹmụ da, di irẹkụra boo sheni. Dẹ ka, "Ẹnẹ vi ọza ọnọni kẹ?" ¹¹ Di azọkọni voshi ka "Ijesu ọkisẹ fụri Inazarẹti ana yi Iganini yọ." ¹² Umọnọ ngwụ ini itẹmpụrụ, dọ dụ aza ana sofụ ini ireshi Oshomoshi jinẹ. Dọ tụ itevụrụ ene ye che ẹkẹshi ụvọ vakụ, shi irẹfu ̣ẹnẹ yaa na onekụkụ. ¹³ Dọ ka yụ wa ka, "A chẹrẹẹ ka, "A vaa shi ireshi ami, ireshi ana yaa tụozụrenụ, ama dụ varaa tụni ireshi oyi nini." ¹⁴ Inaani, ogụri ọnri osụafụ nini, ee vetụo ini itẹmpụrụ, dọ fụwa ikụ sha. ¹⁵ Ụmọni Oshirẹsụ arụfa nini ọnri ọyofi nin re ụkọrọ oshishozeyi ọni Ijesu mẹ, ọnri ụmẹ ẹnẹ wụ ki ezeweyi nin ee nowụ ini itẹmpụrụ ka, "Hosanna yi ozi Idevidi," di ayi aa kụ wa. ¹⁶ Dẹ kaa yi Ijesu ka, "Ụwa wụ irẹyi ọni azẹnẹ aa ka?" Di Ijesu kaa yụ wa ka, "Ẹẹn! ụwe re zi re ka ini iwe ọnini nin ka, "Fi ini irenụ ezeweyi onri ezinụvọ nin, ọni ụga va ya vi ọgigụ'?" ¹⁷ Dọ fụri ida anini, dọ ni irẹkụra Ibẹtani, dọ na sụ izọ. ¹⁸ Ini ọnẹnẹ, Ijesu mẹ varama ni Ijerụsa-nẹmụ dị ụngwẹ aa kụọ. ¹⁹ O re ọchi ifigi ọnya inoze. Ọ mẹ gụrị ọchi ọnọ, o zi re ẹtụtụ ọnyọnyi ini irẹsụ aani, ọchishi avi renya. Dọ kaa yọ ka. "Wai zụ kụa tụ ẹtụtụ pooro, ụmụmọ, di ọchi ọnọ wẹngwụani. ²⁰ Eziafụ aani me ree, do shụweyi, dẹ ka, "Ọchi ọnọni mẹ mẹ dinẹ si wẹngwụani kẹ?" ²¹ Di Ijesu voshi ka, "Irẹiza ma ka yụ wụ nin, wa nyi ọdọwụ, dụ ra zi ji ayi ẹvẹva nin, ọ zi vi isa ana mẹ shi ọchi ọnọni kẹnẹ ọnụ̣ vaa mẹ nin, ama ụ va zụ kaa yi irẹsụfa ka, 'Fụ kwẹtẹ we zina na ngwụ ini irefụ,' dọ vi ọmimẹ. ²² Isa ọnụ̣ re fisụe ini ozụrenụ awụ, dụụ nyi ọdọwụ, ụ ve ree dọ." ²³ Ijesu mẹ ngwụ ni itẹmpụrụ da, oshirẹsụ arụfa nini ọnri azẹkụ azẹnẹ de vetụo, ọ maa zụ aza isa, dẹ ka, "Yere ụmọ ọnụ wa si mi isẹnẹnị ọnri ka ẹnẹ si ọ yụ wụ?" ²⁴ Di Ijesu voshi dọ kaa yụ wa ka, "Ẹmi zẹ va fọ wụ nin ipẹpẹ ọnya. Waa voshi aani yi mi mva kaa yụ wụ nin ụmọ ọni maa si mẹ isẹnẹni. ²⁵ Izi isami ọi Ijọọnụ, fụrẹ vẹ kẹ? Fi ineekụ wa yọ, navẹki fidi aza? Dẹ va kwa siọ nita ka, "Aaviki yaa ka ki, fi ineekụ yọ, ọ va fọ yi ka, "Sẹnẹvẹ dụ ra zi va dọọ wụ nin kẹ?' ²⁶ "Ama ya kaa ka, Fi idi aza yọ, yee shangwa azọkọni," fuvoki ẹnbo vene re Ijọọnụ vene ọkisẹ." ²⁷ Dẹ voshi yi Ijesu ka, "ya zi yẹ." Dọ zẹ kaa yụ wa ka, "Ẹmi nyẹmbẹ ma za ka yụ wụ nin ụmọ ọni ma si mị isa ẹnẹni." ²⁸ Ama, sẹnẹ ẹwụ nin ro? Ọnọrụ ọnyi ọ nyi ezi anẹrụ ẹẹva. Do ne tụ ọni paapa dọ ka, 'Ozi, na mụkọrọ ini ubazi ami irajini.' ²⁹ Do ozi aani voshi ka, "Ma zaa nọ, ama ụmotụ dọ vara ọtụtụrụma aani, dọ naa mụkọrọ ọnọ. ³⁰ Ọnọrụ ọnọ, ọ tụ ozi aani ọfụva, dọ zẹ karẹyi ọnyọnya yọ. Do ozi ọnọ voshi ka, "Ada mi mva nọ," ama ọzi vaa nọ. ³¹ Ini ezi anẹrụ ẹviva ẹnẹ, yere ana mẹ osisi ada anini kẹ?" Dẹ voshi ka, "Ọzi ipaapa." Di Ijesu kaa yụ wa ka, "Ini irẹiza ma ka yụ wụ nin, ọdimana ọnri ọsẹrẹka nini vaa ngwụ Ijọva Oshomoshi tụ wụ nini. ³² Fụvọki Ijọọnụ ọ vẹ tụ inoze ana vọrọ, ama wazi dọọwụ nini. Ama ọdimana ọnri ọsẹrẹka nini ẹẹ dọọ wụ. Shi ụme ri re isa ẹ̣nẹ̣ni nin, we zi rinẹ varama, wai zẹ di dọọwụ nini. ³³ Batọ tụni ushioche ọsa nini. Ọ nyi ọnọrụ ọnyi ana nyi ẹtẹ. Dọ da ụbazi, dọ fọva kara, dọ chi okoro, iza ya kwọrọ ẹtụtụ eche. Dọ da ireshi oserẹtẹ, dọ si ụbazi ọnọ chire ọkụrarẹ nini ụvọ̣. Dọ jinẹ ni irẹkụravabẹ ọsa. ³⁴ Ẹfi ọni asi fa ẹtụtụ maa gurẹtẹ, dọ tụ ezida ẹnyi ne tụ ọkụrarẹ ẹnẹ ka ẹna di ẹtụtụ awọni vẹ. ³⁵ Ama di ọkụrarẹ ẹnẹ za ezida ẹnẹ, de tụ ọnya, dẹ wụ ọsa; de ne ọsa akụkụ. ³⁶ Dọ zẹ tụ ezida aani ọsa ana rụrụ fụni ọi ipaapa, di ọkụrarẹ ẹnẹ si ụya rụ wa vene ọi ipaapa nin. ³⁷ Inama aani, di ọza ọna nyẹtẹ ọnọ tụ ozi aani ụvọta na, dọ ka, 'Ẹẹ vaa si ụbani yi ozi ami.' ³⁸ Ama, ọkụrarẹ ẹnẹ me re ozi aani ọnọ, dẹ geyi, dẹ kaa, ozi ọnọni ọnọ vaa kụ ogụ ada aani. A navọ di ya wụọ, di ya si ogụ aani vara ayayi. ³⁹ Di ọkụrarẹ ẹnẹ siọ ni irama ụbazi, dẹ wụọ. ⁴⁰ Ụmọni̇ ọnọrụ ana nyụ ụbazi raa vẹ, sẹnụ ro ki ọ vaa mẹ ọkụrarẹ ẹnẹ kẹ?" ⁴¹ Dẹ kaa yi Ijesu ka, "Ọ vaa wụ azẹshimi ẹnẹ bo vasha, dọ si ụbazi ọnọ yi ọkụrarẹ ọsa nin, ana vaa si ẹtụtụ ana vi ayi aani yọọ, ẹfi retụ." ⁴² Di Ijesu kaa yụ wa ka, "Ọnọviki we zi ri ree ka ini iwe ọnini kaa, 'Irẹta ọni ọtụrireshi nini yi tẹtẹ, ọsi vara obooro irẹta ana nyi ụbani tụni ireshi. Ananyiyi ọnọ vọ vọ mẹ, dọ vi oshishozeyi. ⁴³ Fụvavọ, ma kaa yụ wụ nin ka, ijọva Oshomoshi vana vaa dọọ fini ụvọ awụ nini, da si ọ yi irẹkụravabẹ ọsa ana vaa tụ ẹtụtụ. ⁴⁴ Ọzatụrọza ene re zina nya irẹta ọnọni, vana vaa sẹ ripiripi. Ama, ọza ọni irẹta ọnọ ree zina nya, vọnọ vaa kwọrọ̣ vasha. ⁴⁵ Ụmọni arụfa ọbani nin ọnri ifarisi nini wụ ụshioche ẹnẹ, dẹ yẹ ka ẹni ọnọ karẹyi shi. ⁴⁶ Dee ve bee kẹnẹ zaa, ama de shangwa azọkọni ana gụ, fụvọki aza vana si ọ vene ọkisẹ.