¹ Ijọva ineekụ o vene ọnaarẹ ana kwẹtẹ ini ọnẹnẹ viri-viri, do ne si ọnụkọrọ, ana vaa mụkọrọ ini ụbazi aani. ² Ẹ mẹ gẹ sofụ yẹngwụ, dọ gẹrẹngwụ yụ wa ka, ọni ve sụwa Idẹnariọsi ọnya ini irẹkụshi; dọ ka ẹẹ ni inụbazi aani. ³ Ọọ varama jinẹ inọpati iwakati ọfụta, do ze re ọnụkọrọ ọsa ana dinẹ kẹnẹ ini ofụ. ⁴ Dọ kaa yụ wa ka, "Ẹwụ nin ọ zẹ, ngwụ inụbazi ami, dụ wa na mụkọrọ nin ki mve si isẹnẹ ra sẹrẹ yụ wụ nini. "Dẹva na vẹrẹ ụkọrọ. ⁵ Ọọ zẹ jinẹ inọpati iwakati ishinọnyi ọnri iwakati ishinna dọ viki isọnyọnya ọnọ mẹ. ⁶ Ini ụpọnya tụọ, inọpati iwakati ẹwụrọnya, ọọ zẹ jinẹ tụra, do re ọnụkọrọ ọsa nin ana zẹ dinẹ kẹnẹ. Dọ kaa yụ wa ka, 'Sẹnẹvẹ dụ dinẹ kẹnẹ nin, di ọ ra zi nyi ọnụ waa mẹ nini finọnẹnẹ?' ⁷ Dẹ kaa yọ ka, "Fụvọki ọzi nyi ọzọnyọnyi ana shiyi na mụkọrọ." Dọ kaa yụ wa ka, "Ewu nin ọ zẹ ngwụ ini ụbazi, dụ wa na mụkọrọ nin." ⁸ Orụva me tụ, di ọza ana nyi ụbazi kaa yi ọga ọnụkọrọ aani ka, "Shi ọnụkọrọ ẹnẹ, di we sụwa ụta, vẹrẹ finị ene keke nangwụ ọi paapa." ⁹ Ụmọni ọnụkọrọ ana dọ ini iwakati ẹwụrọnya vẹ, de si wa idẹnariọsi ọnya-ọnya. ¹⁰ Ụmọni ọnụkọrọ ipaapa nin vẹ, de ro ka ẹni vaa dọọ fụnavọ. Ama, dọviki idẹnariọsi ọnya ọni ọzọnyọnya anini dọ. ¹¹ Ẹfi enesi wa ụta da, dẹ rifụfụ, de netụ ọza ana nyi ụbazi. ¹² Dẹ ka 'Iwakati ọnya ọni ọnụkọrọ ẹna vẹ keke si mụkọrọ, ama we si ẹyi rụwa ụta ẹbẹbẹ, ẹyi ọnọ viki ya mụkọrọ fụ, di vana yini ọyi fini ọnẹnẹ.' ¹³ Di ọza ana nyi ụbazi ọnọ tụoshi, dọ kaa yi ọzọnya ra anini ka, "Ọtami, ọ zi ̣nyi isa ọshimi ọnim mẹ kawụ vẹ. Ụ wa ra zi zẹ mi ku va di idẹnariọsi ọnyạ?" ¹⁴ Dọ isẹna ra vi ayawụ, dụ wa si zi oze awụ. Ẹmi ono zeyi ki mve si anụkọrọ ene keke vẹ ụta ọnyọnya ọnim si yụ wụ nin. ¹⁵ Navẹki ma zi nyi ụmọ ki me no isa ọnim nyi o me zemeyi? Navẹki ụ waa kụshini nin fụvọ ki ma shụvọsha." ¹⁶ Avọọ mẹ vivi, one keke vaa vi ọni-paapa, di ọni-paapa vi one keke." ¹⁵ Di Ifarisi nini na shọma ẹmẹ mẹ vee re Ijesu za ini rẹyi aani. ¹⁶ Dẹ tụ eziafụ anini beri aza Ihẹrọọdụ nin ne tu Ijesu. Dẹ ka, "Ọzụọzisa, yaa yẹ ki ọni irẹiza ọnụvi, dụ wa zụ aza oze irẹiza Oshomoshi. Wee me si ki ọza ọji zụwụ ọnri wa ma ni ọza remeyi inakaakana aza. ¹⁷ Kaa yi yi isuro. Ọ wa vọrọ ki yee si imaana yi Isiza navẹki ọzi vọrọ?" ²⁰ Inaani, di ọnyi ezi Izebede ọnri ezi anẹrụ aani vetụ Ijesu. Oo nyimarẹsụ yọ, do fisụe isa fini ụvọ aani. ²¹ Di Ijesu fọọ ka, "Sẹnẹ ya wu ọtụtụrụma ọnụ we si?" Do tụoshi ka,"Si ụmọ kaa ki ezi anẹrụ ami ẹviva ẹnẹni, kẹ zụ yatụ ini ijọva ineekụ awụ, ọnya inụvọọri, ọsa inụvọọfa." ²² Ama di Ijesu tụoshi ka, "Waa zi yẹ isa ọnụ wee fisụe aani? Ụ we ve zu fụ fini ipa ọnim ve ye fu ọmẹyani nin?" Dẹ kaa yọ ka, "Ii ve zụ fụo." ²³ Dọ kaa yụ wa ka, "Maa vana yẹ ka u vee zụ fụ fini ipa ami. Ama ini kụ wa yatụ tụni ụvọọri ọnri ụvọọfa ami, ọzi vi ẹmi ọnọ vaa mẹ ọnọ, fụvọki Ada mi o teni ọ tẹtẹ da yi ẹnẹnọ va siọ yi." ²⁴ Ụmọni eziafu aani ẹẹwụ anavọ wụ irẹyi ọnọ, dẹ mọikụ kokoro shi ẹnyara ẹviva ẹnẹ. ²⁵ Ama, di Ijesu shiụ wa pe ẹngwụ, dọ ka, "Waa yẹ nin ka ọdọvidi anarima-dọwụ nini vana si ụkata ku wa zi, di azẹbani anini a mụ ụmọ tụra wa rẹsụ. ²⁶ Ama ọzi bẹdọ vọvọ ya ini akaakana awụ nini. Akikọnọ, ọzatụrọza ene re si ka ọnọ nyi ụbani ini akaakana awụ nin vọnọ vọrọ ka ọvi ozida awụ nini, ²⁷ ọnri ki ọzatụrọza ene re si ka ọnọvi ọdọvidi ini akaakana awụ nin, bẹdọ vi ozida awụ nini. ²⁸ Venebiri Ozi Ọza mẹ ra zi vẹ ka ava mozida yọni, ama ọọ vẹ ka ọnọ va mozida, dọ ọnọ si ẹshẹ awọni dụdi ayi aza ẹrụrụ. ²⁹ Ẹ mẹ jinẹ furi Ijẹriko, di aza ọkọni vatụraa. ³⁰ Ọọ nyi oguri ẹẹva ana yatu tụni ụtoze. E mẹ wụ ki Ijesu aa parafụ, de nowụ ka, "Ananyiyi, Ozi Idevidi, nyi ayụva yiyi." ³¹ Di aza ọkọni ẹnẹ aa tụ wa ofụvọ ka ẹ navọkụ. Ama, de nowụ fụnavọ ka, "Ananyiyi, Ozi Idevidi, nyi ayụva yiyi." ³² Umavọ di Ijesu pẹkafụ, dọ shụ wa, dọ fọọ wa ka, "Sẹni we si ki ma mẹ yụ wụ nini?" ³³ Dẹ kaa yọ ka, "Ananyiyi, ye si, kiye re ẹtẹ." ³⁴ Inaani, di Ijesu nyi ayụva yu wa, dọ si ụvọ kani iri anini. Ụmụmọ, dẹ vẹrẹ ee retẹ, dẹ vatụra wa.