¹ Ifarisi ọnri Isadụsi nini e vee tụ Ijesu dẹ zamare. Dẹ kaa yọ, kọ si ami zụ ẹni fini ovụrụkụtụ. ² Ama dọ tụoshi, dọ kaa yụ wa ka, "Ụmẹ orụva retụ, 'dụ kaa nini ka ẹtẹ vee zoza, fụvọki ovụrụkụtụ ọnọọ ovi." ³ Aaviki ini ọnẹnẹ yọ, duụ kaa nin ka, ẹtẹ o zee zoza fụvọki ovụrụkụtụ yi naani, do ze shoozi. Waa yẹ nini ami ọni ovụrụkụtụ si zụ, ama wa zi yẹ ami ọni efi si zụ nini. ⁴ Evereze oodụvi ọnri ayi ọsẹrẹka nini ee si ami, ama ọzi nyi ami ana va si yụ wa, ọchishi ami ọi Ijoona. Inaani di Ijesu fụrẹ wa ụvọ, dọ na. ⁵ Ẹfi ene eziafụ aani tụ akọsa, dẹ tamayi ka ẹnẹ zi si ivụrẹdi. ⁶ Di Ijesu kaa yụ wa ka, "Seyi pẹngwụ awụ nini dụ wa yarazi nin, fụvi ̣ọva Ifarisi ọnri Isadụsi nini. ⁷ Di eziafụ aani gee roo inakaakana anini, dẹ ka, "Fụvọki yazi za ivụrẹdi ọnyọnyi chauvọ yọ." ⁸ Ijesu ọ yẹ isa o nee ro, dọ ka, "Ẹwụ nini ana nyi ọdọwụ oweyi, sẹnẹvẹ dụ we roo inakaakana awụ nin kaa fụvọki wa zi za ivụrẹdi ọnyọnyi nini yọ?" ⁹ Waa zi yiyẹ nini, navẹki waa zi tamayi ivụrẹdi ẹshi ana ga yi aza akaashi oze ẹshi, ọnri ka, waa zi yẹ uji ya ana kụ ewụri ọna vẹtẹ shi? ¹⁰ Navẹki ivụrẹdi shimba ọni aza akaashi oze ẹẹna ri, ọnri ụji ya, ana kụ ọna vẹtẹ shi? ¹¹ Sẹnẹvẹ do re zi ye wụ nin ka ma zi karẹyi inọpati ivụrẹdi yụ wụ nin kẹ?" Si eyi pẹngwụ awụ nini, dụ wa seyi petẹ yi ̣ọva Ifarisi ọnri Isadụsi nini. ¹² Ẹfiavọ dẹ va yẹ ka ọzi vi ̣ọva ọna si ivụrẹdi wụ ọnọ ka, ama ọ si seyi petẹ yi ọzizụ Ifarisi ọnri Isadụsi nini. ¹³ Ini ẹfi ọnọni, Ijesu mẹ vẹ ini ọkakoro ana gụri Isesaria Ifiripi, dọ fọ eziafụ aani ka, "Ẹni aza kaa ki Ozi Ọza ọvi kẹ? ¹⁴ Dẹ ka, "Azẹnyi ki Ijọọnụ Ọsami, azẹnyi ki Enaija; di azẹnẹsa ki Ijeremaya, navẹki ọnya ini ọkisẹ nini." ¹⁵ Dọ ka yụ wa kaa, "Ama, ẹnẹ ẹwụ nin ki mavi kẹ? ¹⁶ Isaimọni Ipita, dọ ka, "Ẹwụ ọnọvi Ikristi, Ozi Oshomoshi ana ra." ¹⁷ Ijesu oo tụoshi, dọ kaa yọ ka, "Ẹdabẹrẹ ọnọ vi yụ wụ Isaimoni ozi Ijoona, fụvọka ọzi vi ẹchẹngwụ ọnri anya ọnọ shafụ irẹyi ọnọni sha yụ wụ, ama Ada mi ana yi ineekụ. ¹⁸ Maa zẹ kaa yụ wụ tụọ ki, ẹwa vi Ipita, ini rẹsụ irẹta ọnọni ọni mva da ichọọchi ami tụ. Ọchọfọ ineekụ ọrọkọtọ ọi zụe fụna ini irẹkụ. ¹⁹ Maa si ikọkọrọ ọi ijọva ineekụ-ọiza yụ wụ. Isatụrisa ọnụ raa sụ inẹshẹ vana vaa sụ ineekụ, isatụrisa ọnụụ raa ngwara inẹshẹ, vana vaa ngwara ineekụ. " ²⁰ Ẹfiavọ, di Ijesu si ụmọ kaa yi eziafu aani ka, a sẹ ka yi ọzọnyọnyi kọni ọvi Ikristi. ²¹ Fụrẹ ẹfiavọ, di Ijesu vẹrẹ aa ka yi eziafụ aani ki ọni bẹdọ vaa ni Ijerụsanẹmụ naa rụya isẹrụrụ ini ụvọ azẹkụ, oshirẹsụ arụfa nin beri oyofi nini, dẹ wụọni, daa va sha ọni kwẹtẹ ini ọkụshi ọfụta. ²² Inaani di Ipita dọ siọ ni oboka, dọ tụo ofụvọ ka, "Isọnọni ọva zi gọdọ yụ wụ Ananyiyi, isọnọni ọ va zi gọdọ yụ wụ." ²³ Ama di Ijesu vareyi, dọ kaa yi Ipita ka, "Parafụ ni naama mi, ẹwụ eshu!" ọmọza sẹdụ ọnụ vi, fụvọki wa zi tẹsi yi isa ana vi ayi Oshomoshi, ama isa anẹshe.̣" ²⁴ Di Ijesu va ka yi eziafụ aani ka, "Aaviki ọ nyi ẹzẹne re si ki ọnọ vatụra mi, o re ki ọnọ yi ẹngwụ aani tẹtẹ, dọ si ọchi-avashi aani, dọ vatura mi." ²⁵ Fụvọki, ọzatụrọza one ree si ka ọna dọ ife awọni tụ, vene vee nee ta, ọzatụrọza ene ree nee ifẹ aani ta fụvọ ami, o ve ree si. ²⁶ Yere ọgụ ọna yi inaani yi ẹzẹna nyi ẹshẹ ọnọni bo, ama do ne ifẹ aani ta? Sẹni ọza va zụ si dụdi ẹshẹ aani kẹ? ²⁷ "Fụvọki, Ozi Ọza vaa vẹ ini ụga Ada aani bẹri angẹni aani nini. Ẹfi ọnọ, ọva si ọgụ ọzọọza yọ venebiri ọmimẹ anini. ²⁸ Irẹiza, ma ka yụ wụ nin, azẹnyi inakaakana awụ nin, ana dinẹ tụzọni, ene zee seyi gẹrẹ isụ poro netụ efi ọne ve si re ki Ozi Ọza oo chi vẹ ini ijọva aani."