¹ Fụvọki wa yẹ nin, ẹẹnyara yi, ki ọvivẹ vetụ wu nin ayi, ọzi vi osụsụ. ² Waa yẹ nini kiya bidi rụya, da mụshi nyi yi irẹkụra Ifiripi. Yaa si ayọvi ini Oshomoshi ka irenụbe-ọiza Oshomoshi yụ wu nin inẹngwọkata. ³ Irẹyi ọtitụ wụ nin ụkata ayi, ọzi vi abojinye, ọzi vi arimani, navẹki fini apẹ vẹ. ⁴ Akikọnọ, vene Oshomoshi mẹmẹ sụvọ tụọ, dọva si ụkọrọ irenụbe-ọiza ọkika chire yi ụvọ. Yaa zi karẹyi ki ya ma aza inẹ shine, ama di yaa mẹ Oshomoshi ine shine. Fụvọki ọnọ zama ọtụtụrụma ayi. ⁵ Waa yẹ ki ọzi nyi ụmọni si gawụ nin fụni ụmẹya, navẹki ụmẹyẹ, di ye vene wụ nini disa, vene Oshomoshi mẹ vi onivenụ ayi. ⁶ Yee zi si ụga fini ụvọ awụ nini, navẹki fini ụvọ azẹnẹsa. Ii yaan zụ fisue isa fini ụvọ awụ nini vene ọnitụ Ikristi ọnivi. ⁷ Akikọnọ, yaa vẹngwụ shẹtẹ inakaakana awụ nini, vene ọnyi mee fufu ozi aani. ⁸ Inoze ọnọni, yaa nyi osisi awụ nini. Aavi irenụbe-ọiza Oshomoshi renya ọni si inẹ oshi-shine vaka yụ wụ nini, ama ya zẹ̣ sisi ẹshẹ ayi bẹrẹ aa mụkọrọ yu wu nini, fụvọki ạza ọnim-ngwayani kokoro ọnụụ vi nin. ⁹ Ẹwụ ẹẹnyara yi nini, waa tamayi ụkọro ọni mẹ ọdụ, shi irafụ, ọni ya si mụkọrọ, di yezi si kiya vẹnya yi ọzọnyọnyi. Inẹfi ọnọ, yaa ka irẹnụbe-ọiza Oshomoshi yụ wụ nini. ¹⁰ Ẹwụ nin ọnri Oshomoshi nyẹmbẹ vi onivenụ, imẹ vi ọnini, ọmimanasẹrẹ, ọnri arimanyi-akụvi, di ya zụsẹ ẹtẹrẹ shi anọdọwụ nin. ¹¹ Inoze ọnyọnya, wa yẹ ime sụvọ za ọzọnyọnya awu nini, venebiri Adaa mẹ sụvọ za ezi aani, ¹² diya dipẹ yụ wụ nini, diya tụ wụ nin ụkata, dizẹ tụ nin ki asikamarenụ, dẹ vaa zụsẹ venebiri ozi Oshomoshi ana shụ wụ nini, vangwụ ini ijọva ọnri ụga aani. ¹³ Fụvọ ọnọni, ya kụ Oshiomoshi avọ inẹfitụrẹfi: fụvọ ụmọni uu ree itụ Oshomo-shi dọ, zirẹngwụ ayi, wa zi siọ vene ki irẹ̣yi ọza ọnọvi. Akinọnọ, waa dọ tụni irẹiza ana vi irẹiza Oshomoshi. Irẹyi ọnọni gẹdẹ-gẹdẹ ọna mụkọrọ inakaakana wụ nini ana nyi ọdọwụ. ¹⁴ Ẹwụ nin ẹẹnyara yi, wa fama iragụ ichọọchi Oshomoshi ana yi Ijụdiya ayi Ikristi Ijesu. Ẹwụ nin nyẹmbẹ vana zẹ rirụya fini ụvọ ani irẹkụra awu nin vene ẹmẹ mẹ rụya fini ụvọ ani Ijuu nin. ¹⁵ Ijuu ẹnẹ wụụ, Ananyiyi Ijesu ọnri ọkisẹ nini, Ijuu nin ẹnẹ dụ wa jinẹ. Ẹzi mẹ osisi Oshomo-shi. Akikọnọ, dẹ nyi ayamkụ shi aza boo. ¹⁶ Ee guyi ka si ka irenụbe-ọiza yi ani Ijẹntaini, dẹ zụ nyi ọdidọtụ. Ọvarẹsụ aani ọnọviki, aichama anini ọọ datụọ. Ọikụ Oshomoshi bẹdọ vaa vi inẹsụ anini ini oikọta. ¹⁷ Ini ẹchẹngwụ yaa shashi yẹngwụ inẹfi keere ẹẹnyara ayi, aivi ini ifẹ. Yaa kụeyi tụroze, di yesi kiye rẹngwụ nini. ¹⁸ Yee si oze kiya vi ida awụ nin, Ẹmi, Ipọọrụ, ụmọnyi ụpọsa, ama eshụ ọọ ji yi oze. ¹⁹ Sẹnẹ vi ọkụayitụra ayi ini ramụfụọ, sẹnẹ vi ụje ayi, sẹnẹ vi ade uga ayi ini ọvidi Ananyiyi Ijesu ụmọnọ raa vẹ? Aivẹ ẹwụ nin yọọ, venebiri azẹnẹsa? ²⁰ Fụvọki ẹwụ nin ọnọvi ụbani ọnri ụjẹ ayi.