1
Ijesu ọ kyia lẹ gasẹ ẹvholi ọdọdọda nefu ali ekeke, ọọ ngme ingmemhi onogbọ obodẹ aleghyie Ishinẹgba eni ikwhumhọgbe ali ava e rhẹ khali ọ,
2
ali ikpotso egwho ni iyẹmhẹ ebe ali ighwuamhi ọdọdọda e vu egbe le. Wẹwẹ khi Imeli ni a gwe li lu Imagdalini, ni a te egbe ọli kwhu iyẹmhẹ oshila a lase,
3
Ijoana, ugwhẹ Ichuza, ni ọ kyili aghyiusomhi Ẹrodu, Isuzana, ali ikpotso evhese, ni e rhi ẹtsẹkẹ kpaghyiẹ wẹ obọ.
4
Nenaa abhi iọgbọ ebubu e ke rhọ legba, gboghyiẹ iọgbọ ni e te evholi nefu ọdọdọda bhale, ọọ rhi ekpita nu wẹ ngme.
5
"Ọgwaishemhi ọọ ke vu ọ lẹẹ kọ ẹkọmhi egwho. Abhi ọ rhẹẹ kọọ, ẹkọmhi egwo vhọ, e de kwu esọ atuodẹ, a rhi awẹ nwuno wẹ ma ekẹ, ipfele nẹ eda, e bhale a sanọ wẹ lẹ.
6
Egwho, e dena kwu ukhomhi ekẹ agbhẹ, abhi e ke rhọ zẹẹ, e khakhaa rharhi khi e vha mẹ amẹ.
7
Iyọ, egwho e dena kwu iteteva igba, eni igba ali eni ẹkọmhi e gaa fu shele utogwho eni igba e tanọ wẹ gboloa.
8
Ama ẹkọmhi egwho e dena kwu ukhomhi ekẹ ni o ti e mọ ikpamhi nebu e rhi nabhi asha egbhọ ishie bu dala abhi a rhọ kọ wẹ." Abhi Ijesu ọ ke rhọ ngme eni ngmemhi ena pfuase, ọọ ke sọọse lasele, ọọ li, "Ọni ọ zẹ esọ ni a rha suọ ọ rhọ suọ."
9
Eni idibo ọli e ke mhilali emeni oni ekpita o ngme.
10
Ijesu ọọ ke ẹẹ wẹ, "A she rhi oni imasha na vhẹ khi vha rhọ yẹsẹ ogbhagbha ọnyaloa aleghyiele Ishinẹgba, ama iọgbọ ni e kpọẹ, ekpita laa rha wẹna khasẹ wẹ, ishọyọ, imẹmhi, e vha laa mẹ gboo, isuọmhi, e vha laa suọ limhi."
11
Nenaa abhi oni ekpita o ngme lẹẹ khi onaa. Oni ẹkọmhi khi ingmemhi Ishinẹgba.
12
Eni ẹkọmhi ni e dena kwu esọ odẹ wẹwẹ khi eni iọgbọ ni e suọ oni ingmemhi, ama okhyio ọ bhale a sanọ wẹwẹ vhi idu le, khi ee ke lama shi vhọ, khi e kẹ pfue vhọ le.
13
Iyọ, eni e dena kwu ekẹ ukhomhi agbhẹ, wẹwẹ khi iọgbọ ni e suọ oni ingmemhi ni e rhi oghẹlẹ myie oni ingmemhi, ama e vha rhi ikpi nwu ekẹ pẹẹ; ukwukwu ẹrhẹghẹ, abhi ẹrhẹghẹ imhasẹfẹẹ ọ ke rhọ bhẹ e dena kwa.
14
Eni ẹkọmhi ni e dena kwu vhi ifu igba wẹwẹ khi iọgbọ ni e suọ oni ingmemhi, ama e kee je alo ọtomhẹ ali ọsuemhẹ ali ọvyiọlọ oni agbona, e tsese wẹ gboloa, rharhi iyọ, e vha dobẹ mọ ikpamhi ni e womhẹ.
15
Ama eni ikpamhi ni e dena kwu ekẹ aghyie, wẹwẹ khi eni iọgbọ ni e zẹ idu aghyie, abhi e rhọ suọ oni ingmemhi e rhi egbegbe idu aghyie myie eni ingmemhi, e nwu wẹ ma egbe onaghyie, onaghyiẹ, li o rhọ rhi inyakwa rhirhirhi mọ egbegbe ikpamhi ni e ti.
16
Nenaa, a vha mẹ ọgbọ ni ọ rhi akpa rhu pfuse, ọ ke gwe ta atasa nofu gwese ọli ọa liyọ ọ tsua ọli shi ufu agodo, onchi, rhẹmhi ọ rhue ọli a shi asha ni a rhi akpa a nya, khi ishọyọ ọgbọ kwu ni ọ sheda lo le o rhi ọli a mato.
17
Rharhi khi a vha mẹ emeni o gbhagbha, ni a vha laa yẹsẹ, wẹ khi emeni o laa ufu ọli ni a vha laa yẹsẹ ni o vha laa lase vhi alo ufulọ.
18
Iyọ, vha zẹ ẹgbhẹ shi abhi vha li rhi esọ a shi ekẹ, rharhi khi ọni ọ kpọ mhọli, la gwe laa rhọ ma vhọ, ọni ọ vha mhọli, a gwe laa myie ọli oni ọ sa khi lẹ kpọ mhuẹ."
19
Iyọ inyọ Ijesu ali inyọgwho ọli ni emose e bhẹ bhuli ọli le, ama e vha dobẹ chi mama ọli rharhi oni agbaa ni o legba.
20
Aa ke gwu nali eẹ li, "Inyọ ẹ ali inyogwho ẹ, e mugha vhi atuodẹ, ea nono khi wẹwẹ e mẹ."
21
Ama Ijesu ọ ke sọ vhọ ọọ wẹ, "Inyọ mhẹ ali inyọgwho mhẹ wẹwẹ khi eni e suọ ingmemhi Ishinẹgba, ni e rhẹ wẹ gbe akanya."
22
Aa mẹ ogbẹlẹ ogwho ni Ijesu ali eni idibo ọli e rhọ lo elemhi ọkọ okẹ, ọọ ke ẹẹ wẹ, "Eyẹ da okẹ, je esọ opfọ ni o kpọẹ.'' Ayọ li ee te vu.
23
Ama abhi e ke rhọ gwẹ ọkọ ẹẹ lẹẹ, ovhesẹ o ke do Ijesu nwu, ududumhi akpakpa o lasele abhi akpekpe ni o ze o ke rhẹẹ pfi vhi oni ukhomhi okẹ, ọkọ wẹ o she vọ amẹ, o rhẹ wẹ shi ududmhi okhẹna.
24
Iyọ idibo Ijesu e ke bhale a vu ọli ovhesẹ, eẹ li, "Ọga! Ọga! Eyẹ laa ghwuloaa!" Ọọ vu ovhesẹ ọ va nya oni akpekpe vhi ukhomhi oni akpakpa ni o tsua oni okẹ o pfua, ashakhasha o li tọmhi, tọmhi.
25
Iyọ ọọ ke ẹẹ wẹ, "Mhi gyhi irhọshiọ vhẹ?" Udu o fia wẹ elemhi, o nya we aloa onaghyie, onaghyie, ee mhila egbe wẹ, "Ọgwho ọna ọ kyia ena shiọ, ni ọ rhọ li nu okẹ ali akpekpe a ngme, e rhọ shiọ vhọ?"
26
E bhale vhi aloekẹ Igẹrasẹnẹsi ni o la igwepfẹ Igalili.
27
Abhi Ijesu ọ rhọ bhẹ vhi oni aloekẹ, ọmọse ọgwho ọ rhọ te oni elemhi ẹvhuẹ bhẹẹ bhuli ọli le, ọni ọmọse ọna, ọ mhọli iyẹmhẹ ikhyio. O she tẹsẹ, ọ vha sọ edẹ, wẹ khi rhẹmhi ọ nyele vhi owa, sẹkẹnẹ atalimhi li ọ kee le la.
28
Abhi ọ rhọ mẹ Ijesu, ọ sọọse nwu ekẹ, ọ de pfigbe ọ vhi odalo. Ọ rhi urhuli ni o ze ẹẹ li, "Elọ mhi rhẹ a li, Ijesu, Omyi Ishinẹgba ni ọ yagha nẹẹ kwu? Mhi lema ẹ, imhẹ rhi ẹchọ na mhẹ."
29
rhẹmhi Ijesu ọ kwhu oni ayẹmhẹ ni o vha pfuasẹ te ọni ọmọse egbe a lasele, rharhi khi o she rhue ọli sọ ite ingmẹẹ nebu. A kha rhẹ rhi igha shi ọ vhi abọ khi a gwe sọ ọli igha awẹ, khi ọgbọ nu ọli tomugha, khi e kee khẹ ọli, irhẹmhi ọọ kwu eni ighaa, oni ayẹmhẹ okhyio li o khyie kwhu ọli lo ogwa.
30
Ijesu ọọ ke mhila ọli, "See a lu eva e?" Ọọ ke ẹẹ li, "Abuu." rharhi khi iyẹmhẹ ikhyio nebububu e she lono ọli vhi egbe.
31
Rhẹmhi eni iyẹmhẹ ikhyio e lee lema li tsumhi khi imhẹli ọ kwhu wẹwẹ a kwu ugbilimhi ekẹ.
32
Oni ẹrhẹghẹ ona, igwulu ebubu e laa ukhomhi ọkpha ẹẹ le emenale, eni iyẹmhẹ ikhyio ee ke lema ọli khi ọ lama na wẹwẹ lono eni igwulu vhi egbe. Ọọ lama na wẹ khi e lono.
33
Iyọ eni iyẹmhẹ ikhyio e ke te egbe ọni ọmọse lasele a lono eni igwulu eyọ vhi egbe, eni igwulu kwu e nanọ kpẹla ọkpha a lono elemhi okwu, okwu o gbolo wẹ.
34
Abhi eni rhi ẹloe ee kwhu eni igwulu e rhi ẹloe mẹ emeni a mẹ, e nanọ kwa, ea gwu oni ingme khasẹ eni e laa elemhi ẹvhue ali ẹvholi ni e gase obholọ kwu.
35
Iọgbọ ni e suọ oni ingme oyọ kwu e lasele a rhi ẹloe mẹ emeni a mẹ, ee liyọ bhẹ bhuli Ijesu le, e bhale a vhẹ ọni ọmọse ni eni iyẹmhẹ ikhyio e te egbe lasele. Alo e ke ga dala ọli ọ sọnọ ede. ọ deshitọ vhi ẹghẹghẹ Ijesu, ulishi o kee nwu wẹ.
36
Iyọ li eni e rhi ẹloe mẹ emeni a gaa mẹ kwu li e ke ngme khasẹ eni e kpọẹ abhi a ke li tsumhi ọni ọmọse ni iyẹmhẹ ikhyio e kpọ mhasẹ na.
37
Iọgbọ kwu ni e la aloekẹ Igarasenis ali eni e gasẹ ọli kwu e gwu ni Ijesu khi ọ vu wẹwẹ ekẹ le, rharhi khi ududumhi ulishi li o kee nwu wẹ. Iyọ ọ ke lo ọkọ ni ọ rhọ liegbe e je.
38
Ọni ọmọse ni a kwhu iyẹmhẹ ikhyio vhi egbe le ọ lema Ijesu khi ọ dobẹ lẹ rhọ khali ọli vu, ama Ijesu ọ vha lama, ọọ li,
39
"Liegbe je apfẹ ẹ, u kaa to okhẹ ududmhi akanya ni Ishinẹgba o gbe nẹẹ." Ọni ọmọse ọ rhọ te odẹ oli vu, ọ rhi ududumhi akanya ni Ijesu ọ gbe nali tsabọ gasẹ oni aloekẹ oyọ kwu.
40
Abhi Ijesu ọ ke rhọ jele, eni agbaa ni e legba e tsẹ ọli mekyia, rharhi khi li wẹwẹ kwu e kpọ mugha ẹẹ khẹ.
41
Ghe, ghe, ọmọse ọgwho ni aa lu Ijarusi, ni ọ li la eni e mhasẹ vhi owuka. Ijarusi ọọ de tarhughu ni Ijesu, ọọ lema ọli khi ọ bhale vhi apfẹ lẹ,
42
Rharhi khi ọ mhọli ọmọ ọkpotso ogwho kpe ni ọ gbe ikpe igbe ali eva, ọ she lẹẹ gwhu. Ama abhi ọ ke rhẹ lẹẹ, oni agbaa ee mimi egbe rhẹ khali ọ.
43
Ọkpotso ogwho ọọ la ayọ ni ọ she kwu ọlia vhi egbe elemhi ikpe igbe ali eva ọ she gaa pfuẹchẹ ikpaghọlọ ni ọ mhuẹ kwua shi abọ ebo, ama a vha mẹ ọni ọ dobẹ fẹli ọli vhi oni igwhuamhi.
44
Ọ rhọ te Ijesu oshimhi rhi obọ chi ọli esọ ode, ayayayo ọlia ni e kwu ọli vhi egbe e pfa.
45
Ijesu ọọ li, "Ọgwho ọ rhi obọ chi mhẹ eyọ?" Abhi wẹwẹ kwu e ke rhọ ẹẹ chaa, Ipitẹ ọọ li, "Ọga, agbaa ni o rhọ gba ena ni e chi a nwu ẹ ni e rhi egbe a gbe ẹ ena?"
46
Ama Ijesu ọọ li, " Ọgbọ ọgwho ọ she rhi obọ chi mhẹ, rharhi khi mhi yẹsẹ khi izemhi o she lase mhẹ vhi egbe le."
47
Abhi oni okpotso ọ ke rhọ mẹ khi lẹ vha dobẹ gwe lẹẹ rhi emeni lẹẹ li gbhagbha, ọọ bhale ọọ kphele jẹjẹjẹ. Ọ de vhesẹshi vhi odalo Ijesu, ọ ke ngme vhi ukpẹloe agbọ kwu ni e rhọ gba emeni e zẹ ni lẹ rhọ rhi obọ chi ọli ali abhi lẹ ke li ze ayayayọ.
48
Iyọ ọọ ke ẹẹ li "Omyi mhẹ ni ọkpotso, irhọshiọ ẹ o she rhẹ ze. Rhi ọpfọmhẹ kee lẹẹ."
49
Abhi ọ rhọ khyie le ngme, ọgbọ ọ te apfẹ ọni oa mhasẹ vhi owuka bhẹ, ọọ li, "Omyi ẹ ni ọmoshi ọ she gwhu. I mhẹ gwe kphakpha egbe ẹ Ọwẹnagbọ."
50
Ama abhi Ijesu ọ ke rhọ liyọ suọ, ọọ sọ vhọ, ọọ li, "Imhẹ nu ulishi. Lee rhọ shi vhọ, a la myie ọli pfuese."
51
Abhi ọ ke rho bhẹ vhi oni apfẹ, ọ vha dobẹ ọgbọ nu ọli lo rhọ khali ọli, sẹkẹnẹ Ipitẹ, Ijọni ali Ijamhisi, ali ita ọni ọmọshi, ali inyọ ọli.
52
Oni ẹrhẹghẹ iọgbọ kwu ni e la ekẹ ayọ ẹẹ vyiẹ na li gbii, ama ọọ wẹ, "Imhẹ vha gwe vyiẹ. Ọ vha gwhu, ama rhẹmhi ọ lee vhesẹshi."
53
Ama e gyia lia kpaa, rharhi khi wẹwẹ e yẹsẹ khi ọni ọmọ ọ she gwhu.
54
Ama lẹẹ, ọ nwu ọni omoshi obọ, ọ sọse lasele, ọọ li, "Ọmọ, vule."
55
Ayẹmhẹ ọli o liegbe bhale, ọ chi ekẹ vule ayayayọ. Ọọ khi a rhi emenale nali le.
56
Ọọ nyalu ita ọli ali inyọ ọli aloa, ama ọ kpe ẹka nya wẹ ukhomhi khi imhẹli e gwu ni ọgbọkhọgbọ emeni a mẹ.