¹ Oni ẹrhẹghẹ oyọ, iọgbọ egwho vhọ ee gwu ni Ijesu obodẹ iọgbọ Igalili ni Ipaleti ọ rhi ọlia wẹ gboghyiẹ wẹ ilasobo khyiẹ. ² Ijesu ọọ wẹ, "Vha li sa khi eni iọgbọ Igalili eyọ wẹwẹ li e li ingmobe dala iọgbọ Igalili kwu ni e kpọle rharhi khi e mẹ ẹchọ onana? ³ Obho, Mhi gwu na vhẹ. Ama vhavha sheda pfi egbe denegbe, odẹ oyọyọ vha te laa li opfuaa. ⁴ Laa khi iọgbọ ikwhumhi ogbe ali olalee nẹẹ Isilomu ni oweda o de nwu gboloa eyọ, rhẹmhi vha ke sa khi ingmobe wẹ li e vhiemhi dala iyi agbọ ni e la Ijerusalemu? ⁵ Mhi ẹẹ vhẹ obho. Ama vhavha sheda pfi egbe denegbe vhi ingmobe vhẹ, vhaa gaa liyọ laa li opfuaa.'' ⁶ Ijesu ọọ kpe oni ita ona, "Ọgbọ ọgwhọ ọọ kọ oni ukpamhi orhẹ ni a lu ifigi shi ogba ọli, ọ ke bhale a bino ni e she mọ ikpamhi, ọ vha mẹ ukpamhi vhi ukhomhi ọli pẹẹ. ⁷ Ọni ọmọse ọ ke ẹẹ li ọni ọ rhi ẹloe a kwhu oni ogba nali, 'Ghee, ukpe ozi esẹ lẹ khi ona na mhi te bhale laa bino ni ẹẹ khi mhii mẹ ukpamhi vhi oni orhẹ ifigi ona pfa imha mẹ vhọ pẹẹ. khyi ọli gbe. Elọ vha dobẹ ọli pfuẹchẹ oni ekẹ ona kwa shi?' ⁸ Ọni ọ rhi ẹloe a kwhu oni ogba ọ sọ vhọ ọọ li, 'Dobẹ ọli oni ukpe ona lọgwho mhi va lia gasẹ rhi ifataliza shi vhọ. ⁹ O kha ke mọ ikpamhi isukpe, o ti; o vha ke mọ, u chigbe khyi ọli gbe!'" ¹⁰ Oni ẹrhẹghẹ ona Ijesu ọ lẹẹ wẹna iọgbọ owẹna vhi owuka ogbẹlẹ ivhiẹmhia. ¹¹ A kee fẹẹ, a mẹ ọkpotso ọgwho vhi ayọ ni ọ kyia khi ọ she gbe ikpe igbe ali elele abhi ayẹmhẹ igwhuamhi o te la vhi egbe, ọ nwu nyẹsẹ ọ vha dobẹ ẹ yase egbe ekẹ vule tomugha onaghyie. ¹² Abhi Ijesu ọ ke rhọ mẹ ọli, ọ nyalu ọli, ọọ li, "kpotso, ze vhi oni igwhuamhi ẹ ona." ¹³ Ọ rhi obọ nya vhi egbe, obobobọ ọ sheshe egbe tomugha ọ rhi ikiki ni Ishinẹgba. ¹⁴ Ama ọni ọọ mhasẹ vhi owuka ọọ mẹ ọ, oo to ọ vhi egbe shi vhọ rharhi khi Ijesu ọ rhi ọgbọ ze ogbẹlẹ ivhiẹmhia. Iyọ ọni ọọ mhasẹ eyọ ọọ li oni agbaa, "Ogbẹlẹ ẹlesesa li o dea khi a rhọ gbe akanya, u rhi ọgbọ ze, ama a khi ogbẹlẹ ivyiẹmhia." ¹⁵ Ọnọmhọli ọọ ke sọ li vhọ, ọọ li, "Abọmẹmhẹ! Elemhi vhẹ mhi gyhi ọni ọ vhaa taghyiẹ ijaki ọa liyọ ẹna lia ọ rhọ li a da amẹ ogbẹlẹ ivhiẹmhia? ¹⁶ Abegwhoyọ ọmyi Abulahamu ni ọkpotso li ọ kyia, ni okhyio ọ nwu zu elemhi ikpe igbe ali elele, oyọ khi a vha kha taghyiẹ ọlia ogbẹlẹ ivhiẹmhiaa?" ¹⁷ Abhi ọ ke rhọ ngme eni ingmemhi ena pfuse, omama li o kee nwuno eni e kpha dese ọ, ama eni iọgbọ ni e rhọ gba kwu rhẹmhi e kee ghẹlẹ shi akanya ikiki ni ọ gbe. ¹⁸ Iyọ, Ijesu ọọ li, "See aleghyie Ishinẹgba o mẹẹ li laa, e lọ mhi laa rhi ọli khọkhọ? ¹⁹ Irhẹmhi o liabhi oni ukpamhi imọstadi ni ọni ọmọse ọ rhue pfi je elemhi ogba, ni o ke bhale a kyili ududumhi okporhẹ, ni ipfele ni e la eda e kwu ikolo shi igwabọ ọli." ²⁰ Utozeva ọ gwe ẹẹ li, "Elọ mhi dobẹ rhi aleghyie Ishinẹgba a khọkhọ? ²¹ Irhẹmhi o liabhi uduekẹ ni ọkpotso ọ rhọ ma ijakpala emosọmhi esẹ ni o ke fuma vọsẹ ekẹ." ²² Ijesu ọ liyọ kọ lẹ fẹẹ ikwukwu ẹvholi ni e laa atuodẹ Ijerusalẹmu ọọ wena wẹ. ²³ Ọgbọ ọgwho ọ ke ẹẹ li, "Ọnọmhọli, ikwukwu iọgbo la mẹ laa tsumhi? Iyọ, ọ ke ẹẹ li, ²⁴ "Dua khi u rhọ te odẹ na pfiiko lo, rharhi khi ebubu e laa dua khi wẹwẹ e rhọ lo, e vha laa dobẹ lo. ²⁵ Ọdapfẹ ọ kha sheda vule so kpẹ vhi odẹ, irhẹmhi vha ke a mugha elase vhaa kpele odẹ vhaa li ẹẹ li, "Ọnọmhọli, Ọnọmhọli, dobẹ eyẹ lo le,' ọ laa sọ vhẹ vhọ ọọ vhẹ, "Imha yẹsẹ vhẹ wẹ khi obhoni vha te bhale." ²⁶ Ishọyọ vha ke ẹẹ li, 'Eyẹ le, eyẹ da, vhi ukpẹloli ẹ u gwe wẹna iọgbọ ifuoedẹ eyẹ.' ²⁷ Ama ọ laa sọ vhẹ vhọ, ọọ li, 'Mhi ẹẹ vhẹ, imha yẹsẹ vhẹ, Vha vu mhẹ aloa, vhẹvhẹ elingmobe!' ²⁸ Aa laa me evyiẹ ali ilakọ khyiaa ni vha mẹ Abulahamu, Aziki, Ijekọbu ali eni ebolẹ kwu ni e laa aleghyie Ishinẹgba, ama vhẹvhẹ rhẹmhi a kwhu vhẹ a kwa vhi atuode. ²⁹ E laa te opfọni ọwẹ o te a lasele, ali oleda, ali olọkẹ bhale laa deshito vhiẹmhia vhi ukhomhi itabu ni a laa lee emenale vhi aleghyie Ishinẹgba. ³⁰ Vha yẹsẹ ona, khi eni e kposhimhi e laa kpalo, eni e kpalo e ke a kpe oshimhi." ³¹ ke li denẹẹ, Ifarisisi egwho e bhale, eẹ li, "Vu ekẹ ana le rharhi khi Ẹrọdu ọa nono abhi lẹẹ lia gbea." ³² Ijesu ọọ li, "Vha kaa ngme khasẹ ọni anyaka ọyọ, 'Ghee, Mhi a kwhu ikhyio kwa mhi rhi izemhi a ni iọgbọ amo ali akọ, ogbẹlẹ ozi ẹsẹ, mhi rhamhi asha na mhia nono khi mhia rhamhi.' ³³ Abhabhi o rhẹ li, o kyili emeni o nwegbe khi mhi rhọ khyiẹlẹ kee je alo amo, akọ ali akopfua, abhi o rhọ kyia khi o vha dea khi a rhọ gbe ọbolẹ pfia vhi Ijerusalẹmu. ³⁴ Ijerusalẹmu, Ijerusalẹmu, ni e gbolo eni ebolẹa ni e tono eni a ghyie echẹ. Iti ingmẹ mhi nono khi mhi koko imyi vhẹ gba abhi ọkhọkhọ ọ lia nwuno imyi ọlia shi ifu ipfua nee, ama o vha gwhẹ vhẹ. ³⁵ Ghee, a she tsua apfẹ vhẹ pfia. Mhi ngme khasẹ vhẹ, vhavha laa mẹ mhẹ rhili a pfishi ni vha rha li ẹẹ li, 'Izọtena khi uwi ọni ọ rhi eva Ọnọmhọli bhale."